Nk’oku Yahandiikirwe Matayo 7:1-29
7 “Muleke kucwera abandi omusango, nukwo na inywe bataligubacwera.
2 Habwokuba, omulingo mucweramu abandi omusango, na inywe nukwo muligucwerwa. Kandi ekipimo eki mukozesa kupimira abandi, nikyo kirikozesebwa kubapimira.
3 Habwaki norora akanyansi akali omu liiso lya mugenzi waawe, baitu otarukurora empinju enyakuli omu liiso lyawe?
4 Rundi nosobora ota kugambira mugenzi waawe oti: ‘Nyikiriza nkwihe akanyansi omu liiso,’ kandi kunu iwe omu liiso lyawe harumu empinju?
5 Mugobya we iwe! Banza oihemu empinju enyakuli omu liiso lyawe, ohweze kurungi, nukwo osobole kwihamu akanyansi akali omu liiso lya mugenzi waawe.
6 Mutaha embwa ebintu ebirukwera, n’obukwakuba kunagira empunu eruuru zanyu, nukwo zikazirubatirra n’ebigere byazo kandi hanyuma zikabehindukirra, zikabataagura.
7 Mwikale nimusaba, muliheebwa; mwikale nimuserra, mulizoora; mwikale nimuteera kodi, mulikingulirwaho.
8 Weena ow’asaba, aheebwa; weena ow’aserra, azoora, kandi weena ow’ateera kodi akingulirwaho.
9 Nooha omuli inywe asobora kuha omwana we ibaale, kakuba amusaba omugaati?
10 Rundi nooha omuli inywe asobora kumuha enjoka, kakuba amusaba encu?
11 Obu kiraaba ngu inywe ababi mumanyire kuha abaana banyu ebisembo ebirungi, Isiinywe ali omu iguru talikiraho kuha ebintu ebirungi abo abamusaba?
12 “Nahabweki, ebintu byona ebi mugonza abantu abandi babakorre, na inywe nibyo mubakorrege. Kandi kinu nikyo Ebiragiro na Banabbi ekibirukumanyisa.
13 “Mutaahe omu mulyango ogufunzire, habwokuba omulyango ogurukutaaha omu kuhwerekerra gugalihire, n’omuhanda ogurukugendayo gugalihire kandi baingi nugwo barukurabamu;
14 baitu omulyango ogurukutaaha omu bwomeezi gufunzire, n’omuhanda ogurukugendayo gufunzire, kandi bake nubo baguzoora.
15 “Mwerinde banabbi ab’ebisuba ababaizira bali omu kisisani ky’entaama baitu omunda bali nyamaiswa ezirukutaagura.
16 Mulibamanyira ha byana byabo. Abantu nibasobora kunoga emizabbibbu ha miti y’amahwa? Rundi nibasobora kunoga emitini h’amatojo?
17 Omuti gwona omurungi gwana ebyana ebirungi, baitu omuti gwona ogujunzire gwana ebyana ebibi.
18 Omuti omurungi tigusobora kwana ebyana ebibi, kandi n’omuti ogujunzire tigusobora kwana ebyana ebirungi.
19 Omuti gwona ogutarukwana ebyana ebirungi bagutema kandi bagwokya.
20 Nahabweki, abantu abo mulibamanyira ha byana byabo.*
21 “Tali buli muntu weena anyakungambira ati: ‘Mukama wange, Mukama wange,’ alitaaha omu Bukama bwa Ruhanga, baitu ogu wenka ow’akora Isenyowe ow’omu iguru ebi agonza nuwe alibutaahamu.
22 Ha kiro eki, baingi balingambira bati: ‘Mukama wange, Mukama wange, tutarange obunabbi omu ibara lyawe, twabinga daimooni omu ibara lyawe, kandi twakora ebyamahano bingi omu ibara lyawe?’
23 Baitu nyowe ndibagambirraho nti: ‘Tinkabamanyaga, mundugeho inywe enkozi z’ebibi!’
24 “Nahabweki, omuntu weena ow’ahurra ebigambo byange binu kandi akabihondera, alisisana nk’omusaija ow’amagezi ayayombekere enju ye ha mwandara.
25 Enjura obu yagwire, amaizi gaasandaara kandi ekiyaga kyateera enju egi, etaseeseke habwokuba ekaba eyombekerwe ha mwandara.
26 Baitu omuntu weena ow’ahurra ebigambo byange binu atarukubihondera, alisisana nk’omusaija omudomadoma ayayombekere enju ye ha musenyi.
27 Enjura obu yagwire, amaizi gaasandaara kandi ekiyaga kyateera enju egi, ekaseeseka kandi yahweraho kimu.”
28 Yesu obu yamazire kubaza ebigambo binu, abantu baahunirra muno habw’omulingo yayegeseze,
29 habwokuba akaba naabeegesa nk’omuntu anyakwine obusobozi, hatali nk’abahandiiki.
Obugambo Obuli Hansi
^ Rundi, “ebikorwa byabo.”
