Nk’oku Yahandiikirwe Matayo 9:1-38
9 Hanyuma y’ebi, Yesu yatemba eryato, yagenda omu rubuga orw’owabu.
2 Kandi dora! baamuleetera omusaija ow’akaba asaraire abyamire h’akatabu. Obu yarozere okwikiriza kwabo, yagambira omusaija ow’asaraire ati: “Mwana wange, guma! Ebibi byawe bikuganyiirwe.”
3 Hakaba haroho abahandiiki, bayegambira bati: “Omuntu onu naajuma Ruhanga.”
4 Yesu obu yamanyire eki barukuteekereza yabagambira ati: “Habwaki nimuteekereza ebintu ebibi omu mitima yanyu?
5 Leka mbakaguze, nikiha ekyanguhire; kugamba ngu, ‘Ebibi byawe bikuganyiirwe,’ rundi kugamba ngu, ‘Imuka orubate’?
6 Baitu inywe kusobora kukimanya ngu Omwana w’omuntu aine obusobozi bw’okuganyira ebibi omu nsi—” yagambira omusaija ow’asaraire ati: “Imuka, ohimbe akatabu kaawe ogende omu ka yaawe.”
7 Omusaija yaimuka yagenda omu ka ye.
8 Abantu obu baarozere eki, baatiina muno kandi baakugiza Ruhanga, ayahaire abantu obusobozi nk’obu.
9 Yesu obu akaba naarugayo, akarora omusaija arukwetwa Matayo aikaliire nambere basorooleza omusoro. Yamugambira ati: “Fooka muhondezi wange.” Ahonaaho yaimuka, yamuhondera.
10 Hanyuma, Yesu obu akaba aikaliire omu nju naalya ekiihuro, abasorooza b’omusoro baingi n’abasiisi bakaija baikarra na uwe hamu n’abegeswa be.
11 Abafalisaayo obu baakirozere baagambira abegeswa be bati: “Habwaki omwegesa wanyu naaliira hamu n’abasorooza b’omusoro n’abasiisi?”
12 Yesu obu yabahuliire, yabagambira ati: “Abomeezi tibetaaga dakitaali, baitu abarwaire nubo bamwetaaga.
13 Nahabweki, mugende mwetegereze amakuru g’ebigambo binu: ‘Ningonza embabazi, hatali ekihongwa.’ Ntaije kweta abantu abahikiriire, baitu abasiisi.”
14 Hanyuma, abegeswa ba Yohana bakaija nambere ali baamukaguza bati: “Habwaki itwe n’Abafalisaayo tusiiba, baitu abegeswa baawe ubo tibasiiba?”
15 Yesu yabagarukamu ati: “Banywani b’omuswezi nibasobora kuganya kandi kunu omuswezi bakyali na uwe? Baitu akasumi nikaija omuswezi obu alibaihwaho, kandi obu nubwo balitandika kusiiba.
16 Busaho omuntu ow’akozesa ekipacu ky’orugoye oruhyaka kuteera ekiraka ha kijwaro ekya haiguru ekikuzire, habwokuba ekiraka nikiija kwesika kandi ekijwaro ekikuzire nikitagukira kimu.
17 Kandi abantu tibateeka amaarwa amahyaka omu ruhu orukuzire orwahurwamu amaarwa. Obu bakikora, oruhu ruhuulika, amaarwa gaseeseka, oruhu narwo rusiisikara. Baitu abantu bateeka amaarwa omu ruhu oruhyaka kandi byona biikara bitasiisikaire.”
18 Yesu obu akaba naakyabagambira binu, dora! omulemi omu akaija yateeza amaju omu maiso ge, yamugambira ati: “Nambere turukubaliza, muhara wange naasobora kuba amazire ira kufa. Baitu ija omukwateho, kandi araaba mwomeezi.”
19 Hanyuma, Yesu akaimuka yamuhondera ali n’abegeswa be.
20 Kandi dora! omukazi ow’akaba amazire emyaka 12 arwaire ekyejwiso ky’esagama, yaruga enyuma yakwata ha mukugiro gw’ekijwaro kya Yesu.
21 Habwokuba akaikara naayegambira omu mutima gwe ati: “N’obu ndakwata kwonka ha kijwaro kye ekya haruguru, ninyija kukira.”
22 Yesu yahinduka yamurora, yamugambira ati: “Mwisiki, leka kutiina! Okwikiriza kwawe nukwo kukukirize.” Kandi omu saaha egi, omukazi yakira.
23 Obu yahikire omu nju y’omulemi, yarora abarukuteera enyamulere n’abantu abandi baingi nibateera empamo.
24 Yesu yabagambira ati: “Murugeho, habwokuba omwisiki tafiire baitu agwijagiire.” Obu baahuliire eki, baamusekereza.
25 Abantu obu baamazire kuturuka aheeru, Yesu yataahamu, yakwata omukono gw’omwisiki kandi omwisiki yaimuka.
26 Amakuru ago gakararanga omu kicweka eki kyona.
27 Yesu obu akaba naaruga omu kicweka eki, abasaija babiri abafiire amaiso bakamuhondera, nibatokera haiguru, nibagamba ngu: “Tugirre embabazi, Omwana wa Daudi.”
28 Obu yataahire omu nju, abafu b’amaiso abo, baija nambere ali kandi Yesu yabakaguza ati: “Mwine okwikiriza ngu ninsobora kubakiza?” Baamugarukamu bati: “Ego, Mukama waitu.”
29 Yakwata h’amaiso gaabo, yagamba ati: “Habw’okwikiriza kwanyu, leka nukwo kibe kiti.”
30 Kandi amaiso gaabo gaatandika kurora. Yesu yabatererra ati: “Mutagira omuntu weena ou mwakigambira.”
31 Baitu obu baaturukire aheeru, baakirarangya omu kicweka eki kyona.
32 Obu akaba naaruga oku, abantu baamuleetera omusaija ow’akaba afiire omunwa kandi naatalibanizibwa daimooni;
33 obu yamubingiremu daimooni, omusaija ogu yatandika kubaza. Ekitebe ky’abantu baahunirra muno nibagamba bati: “Ekintu nka kinu titukakiroga omu Isaleri.”
34 Baitu Abafalisaayo bakaba nibagamba ngu: “Naabinga daimooni naakonyerwa amaani ga mukuru wa daimooni.”
35 Yesu yagenda omu mbuga zoona n’omu byaro, naayegesa omu masorrokaniro gaabo, naatebeza amakuru amarungi ag’Obukama kandi naakiza endwaire eza buli mulingo n’obulema obwa buli mulingo.
36 Obu yaboine ekitebe ky’abantu baingi, yabakwatirwa embabazi, habwokuba bakaba nibabonabona kandi balekerweho nk’entaama ezitaine omuliisa.
37 Hanyuma yagambira abegeswa be ati: “Eby’okugesa bingi, baitu abakozi bake.
38 Nahabweki, musabe Mukama w’okugesa asindike abakozi omu mulimo gw’okugesa.”
