Nk’Oku Yahandiikirwe Yohana 10:1-42
10 “Mananu kwo nimbagambira nti, ogu ow’ataaha omu rugo rw’igana ly’entaama atarabire omu mulyango, baitu akatemba akataahamu naakozesa omulingo ogundi, ogu aba musuma kandi munyagi.
2 Baitu weena ow’ataahamu naaraba ha mulyango, nuwe muliisa w’entaama.
3 Omulinzi w’omulyango amukingurraho kandi entaama zihurra iraka lye. Entaama ze azeeta amabara gaazo kandi aziturukya aheeru.
4 Obu amara zoona kuziturukya aheeru, azebembera zoona, kandi zimuhondera, habwokuba zimanyire iraka lye.
5 Tizirihondera omuntu ou zitarukumanya, baitu zirimwiruka, habwokuba tizimanyire iraka lye.”
6 Yesu akabagambira ekyokurorraho kinu, baitu bateetegereze eki akaba naabagambira.
7 Yayongera yabagambira ati: “Mananu kwo nimbagambira nti, ninyowe mulyango gw’entaama.
8 Abo boona abaizire nibefoora kuba nyowe, basuma kandi banyagi; baitu entaama tizibahuliriize.
9 Ninyowe mulyango; ogu weena ow’araba omuli nyowe alijunwa, kandi ogu alitaahamu, naaturuka kandi azoole obunyansi.
10 Omusuma aija n’ekigenderewa eky’okwiba, eky’okwita, hamu n’eky’okuhwerekereza. Nyowe nkaija nukwo zisobole kutunga obwomeezi kandi zibutunge omu bwingi.
11 Ninyowe omuliisa omurungi; omuliisa omurungi ahayo obwomeezi bwe habw’entaama ze.
12 Ogu arukukorra empeera atali muliisa, kandi atali mukama wazo, obu arora omwaga nigwija, asigaho entaama kandi airuka—omwaga guzikwata kandi guzirarangya—
13 habwokuba naakolerra empeera kandi tarukufaaho entaama.
14 Ninyowe omuliisa omurungi. Mmanyire entaama zange kandi n’entaama zange ziimmanyire,
15 nk’oku Isenyowe ammanyire kandi na nyowe mmumanyire; kandi mpayo obwomeezi bwange habw’entaama.
16 “Kandi nyine entaama ezindi ezitali ez’omu isibiko linu, ezo nazo nsemeriire kuzireeta kandi zirihurra iraka lyange kandi zirifooka igana limu hansi y’omuliisa omu.
17 Enu niyo ensonga habwaki Isenyowe naangonza, habwokuba mpayo obwomeezi bwange nukwo nsobole kwongera kubutunga.
18 Baitu busaho muntu ow’asobora kubunyihaho baitu nyowe mbuhayo nyegondiize. Nyine obusobozi obw’okubuhayo kandi nyine obusobozi obw’okwongera kubutunga. Ekiragiro kinu nkakitunga kuruga hali Isenyowe.”
19 Hakongera haabaho okwebaganizaamu omu Bayudaaya habw’ebigambo binu.
20 Baingi hali bo bakaba nibagamba bati: “Aine daimooni kandi agwire iraro. Habwaki nimumuhuliiriza?”
21 Abandi baagamba bati: “Omuntu ow’aroho daimooni tasobora kubaza ebigambo binu. Daimooni n’esobora kwigura amaiso ag’abantu abafiire amaiso?”
22 Omu kasumi ako omu Yerusalemu, hakabayo Obugenyi obw’Okuhayo yekaru.* Kakaba kali kasumi ak’obutiti,
23 kandi Yesu akaba naarubata omu yekaru omu muhanda* gwa Suleimani.
24 Nubwo Abayudaaya baamwetoroora baamugambira bati: “Olihikya nkaha kutatugambira kiki eki oli? Obu oraaba niiwe Kristo tugambire bbwa.”
25 Yesu yabagarukamu ati: “Mbagambiire baitu timurukwikiriza. Ebyamahano ebi nkora omu ibara lya Isenyowe bimpeera obwakaiso.
26 Baitu timurukwikiriza habwokuba timuli ntaama zange.
27 Entaama zange zihurra iraka lyange, nzimanyire kandi zimpondera.
28 Nziha obwomeezi obutahwaho, tizirihwerekerezebwa kandi busaho n’omu aliziinyaka omu mukono gwange.
29 Isenyowe entaama ezi ampaire z’omuhendo kukira ebintu ebindi byona, kandi busaho n’omu asobora kuzaaka Isenyowe omu mukono gwe.
30 Nyowe na Isenyowe tuli omu.”
31 Abayudaaya baayongera kukoma amabaale kugamuteera.
32 Yesu yabagambira ati: “Nkabooleka ebikorwa bingi ebirungi kuruga hali Isenyowe. Omu bikorwa ebi, kiraha eki murukunterra amabaale?”
33 Abayudaaya baamugarukamu bati: “Titurukukuteera amabaale habw’ekikorwa ekirungi eki wakozere, baitu nitugakuteera habwokuba nojuma Ruhanga; iwe oyefoora ruhanga kandi kunu oli omuntu.”
34 Yesu yabagarukamu ati: “Tikihandiikirwe omu biragiro byanyu ngu, ‘Nkagamba ngu, “Muli baruhanga”’?
35 Obu kiraaba kiri ngu abo ekigambo kya Ruhanga kyajumiriire akabeeta ‘baruhanga’—kandi ebyahandiikirwe tibisobora kuhindurwa—
36 hati nyowe, Isenyowe ou yayereze kandi yatuma omu nsi, nimungambira ngu, ‘Ojumire Ruhanga,’ habwokuba ngambire ngu ‘Ndi Mwana wa Ruhanga’?
37 Obu ndaaba ntarukukora emirimo ya Isenyowe mutanyikiriza.
38 Baitu obu ndaaba ningikora, n’obu muraaba mutanyikiriize, mugiikirize, nukwo musobole kumanya kandi mweyongere kumanya ngu Isenyowe ali omu bumu na nyowe, kandi na nyowe ndi omu bumu na uwe.”
39 Nubwo baayongera kulengaho kumukwata baitu yabatorokaho yagenda.
40 Yayongera yagenda omu kiikaro nambere Yohana akaba naabatiriza ha kubanza kandi yaikara oku.
41 Kandi abantu baingi baija nambere ali baatandika kugamba bati: “Yohana taine ekyamahano kyona eki yakozere, baitu ebintu byona ebi yabalizeeho omusaija onu mananu.”
42 Kandi obu akaba ali oku, baingi bakamwikiririzaamu.
Obugambo Obuli Hansi
^ Rora, Kusoborra Ebigambo.
^ Omuhanda gunu gukaba gwine orusu kandi gusagikirwe enyomyo nyingi. Rora, Kusoborra Ebigambo.
