Nk’Oku Yahandiikirwe Yohana 11:1-57
11 Hakaba haroho omusaija arukwetwa Lazaaro ow’akaba arwaire; yaikaraga Besaniya, ekyaro nambere Malyamu na mugenzi we Maliza baikaraga.
2 Malyamu onu, nuwe yaseesere amagita ha bigere bya Mukama waitu, kandi yabisimuura naabyomya n’isoke lye. Onu, akaba ali munyaanya Lazaaro ow’akaba arwaire.
3 Nubwo banyaanya Lazaaro baasindikira Yesu obutumwa nibamugambira bati: “Mukama waitu, dora! ow’orukugonza muno arwaire.”
4 Baitu Yesu obu yakihuliire, yagamba ati: “Oburwaire bunu, tibuli bw’okumwita, baitu bw’okuhaisa Ruhanga ekitiinisa, nukwo Omwana wa Ruhanga anyumizibwe kuraba omuli bwo.”
5 Baitu Yesu yagonzaaga Maliza na mugenzi we Malyamu hamu na mugenzi wabo Lazaaro.
6 Baitu obu yahuliire ngu Lazaaro arwaire, yaikara nambere akaba ali, kumara ebiro ebindi bibiri.
7 Hanyuma, yagambira abegeswa be ati: “Leka tugaruke omu Buyudaaya.”
8 Abegeswa baamugambira bati: “Rabbi, ijweri Abayudaaya bakaba nibagonza kukuteera amabaale, kandi hati noogonza kugarukayo?”
9 Yesu yabagarukamu ati: “Ekyererezi eky’obwire obwa nyamusana tikiikaraho kumara esaaha 12? Omuntu weena obu arubatira omu kyererezi eki, tateerwa enkonge, habwokuba aba naarora ekyererezi eky’ensi enu.
10 Baitu omuntu weena obu aba naarubata omu bwire bw’ekiro, ateerwa enkonge, habwokuba aba ataine ekyererezi.”
11 Obu yamazire kubaza ebi, yagamba ati: “Munywani waitu Lazaaro agwijagiire, baitu ningenda kumusisiimura.”
12 Abegeswa be baamugambira bati: “Mukama waitu, obu araaba agwijagiire, naija kuba kurungi.”
13 Baitu Yesu akaba naabazaaho okufa kwe. Baitu baateekereza ngu akaba naabazaaho okugwijagira okw’oturo.
14 Baitu Yesu yabagambirraho ati: “Lazaaro afiire,
15 kandi ninsemererwa ha bwanyu ngu timbaireyo, nukwo musobole kwikiriza. Baitu hati leka tugende nambere ali.”
16 Nubwo Tomasi, ayayetwaga Omurongo, yagambira abegeswa ati: “Na itwe leka tugende nukwo tusobole kufa hamu na uwe.”
17 Yesu obu yahikireyo, yasanga Lazaaro amazire ebiro bbina omu kituuro.
18 Besaniya ekaba eri haihi na Yerusalemu, nka mairo ibiri.
19 Kandi Abayudaaya baingi bakaba baizire kuhuumuza Maliza na Malyamu habw’okufeerwa mugenzi wabo.
20 Maliza obu yahuliire ngu Yesu aliyo naija, yagenda kumutangaana; baitu Malyamu yasigara omuka aikaliire.
21 Nubwo Maliza yagambira Yesu ati: “Mukama wange, kakuba okaba oli hanu, mugenzi wange tiyakufiire.
22 Baitu na hati nkimanyire ngu, kyona eki orasaba Ruhanga naija kukikuha.”
23 Yesu yamugambira ati: “Mugenzi waawe naija kuhumbuuka.”
24 Maliza yamugarukamu ati: “Nkimanyire ngu naija kuhumbuuka omu kuhumbuuka okwa ha kiro ekya ha mpero.”
25 Yesu yamugambira ati: “Ninyowe okuhumbuuka n’obwomeezi. Weena anyakunyikiririzaamu, n’obu alifa, alyongera abe mwomeezi;
26 kandi weena omwomeezi anyakunyikiririzaamu talifa naakake. Eki nokiikiriza?”
27 Maliza yamugarukamu ati: “Ego, Mukama wange, ninyikiriza ngu niiwe Kristo, Omwana wa Ruhanga, ow’akaba ali w’okwija omu nsi.”
28 Hanyuma y’okubaza ebi, yagenda kweta Malyamu kandi yamutwara ha rubaju, yamugambira omu bihwa ati: “Omwegesa aizire kandi naakweta.”
29 Obu yakihuliire yarahuka yagenda nambere ali.
30 Yesu akaba atakataahire omu kyaro, baitu akaba akyali nambere Maliza akaba amutangatangaine.
31 Abayudaaya abakaba bali na Malyamu omu nju nibamuhuumuza, obu baarozere yarahuka bwangu yaturuka aheeru, baamuhondera nibateekereza ngu agenzere ha kituuro kulirirrayo.
32 Malyamu obu yahikire nambere Yesu akaba ali kandi yamurora, yagwa ha bigere bye yamugambira ati: “Mukama wange, kakuba okaba oli hanu, mugenzi wange tiyakufiire.”
33 Yesu obu yamurozere narra, kandi yarora n’Abayudaaya abaakaba aizire na bo nibarra, yasaasa muno omu mutima gwe kandi yatuntura.
34 Yakaguza ati: “Mukamubyamya nkaha?” Baamugambira bati: “Mukama waitu, ija oroleyo.”
35 Yesu yarra amaziga.
36 Nubwo Abayudaaya baatandika kugamba bati: “Dora, abaire naamugonza muno.”
37 Bamu hali bo baagamba bati: “Omusaija onu ayaigwire amaiso g’omufu w’amaiso tiyakusoboire n’okutanga onu kufa?”
38 Hanyuma ya Yesu kuganya muno, yaija ha kituuro. Bukaba buli bwingira kandi bukingirweho n’ibaale.
39 Yesu yagamba ati: “Mwiheho ibaale.” Baitu Maliza munyaanya kifa, yagamba ati: “Mukama wange, hati aine kuba naanunka, habwokuba harabireho ebiro bbina afiire.”
40 Yesu yamugambira ati: “Tinkugambiirege ngu obu oraikiriza noija kurora ekitiinisa kya Ruhanga?”
41 Nahabweki, baihaho ibaale. Nubwo Yesu yarora haiguru, yagamba ati: “Isenyowe, ninkusiima habwokuba ompuliire.
42 Amananu gali ngu, nkimanyire nk’oku ompurra obwire bwona; baitu kinu nkibalize nukwo abantu abemeriire hanu basobole kwikiriza ngu niiwe wantumire.”
43 Obu yamazire kubaza ebintu binu, yayamirra omu iraka erya haiguru ati: “Lazaaro, turuka oije!”
44 Omusaija ow’akaba afiire, yaturuka aheeru ebigere bye n’emikono ye biboherwe omu ngoye kandi orugoye ruzingirwe h’amaiso ge. Yesu yabagambira ati: “Mumubohorre, mumuleke agende.”
45 Nubwo baingi h’Abayudaaya abakaba baizire hali Malyamu kandi abaarozere Yesu eki akaba akozere baamwikiririzaamu,
46 baitu abamu baagenda hali Abafalisaayo baabagambira Yesu eki akaba akozere.
47 Nubwo banyakatagara abakuru n’Abafalisaayo baayesorooza hamu omu Rukurato Orukuru, baagamba bati: “Omusaija onu naakora ebyamahano bingi, tukole ki?
48 Obu turamuleka, boona nibaija kumwikiririzaamu, kandi Abarooma nibaija kwija batutwaleho ekiikaro kyaitu n’ihanga lyaitu.”
49 Baitu omu hali bo arukwetwa Kayaafa, ow’akaba ali nyakatagara omukuru omu mwaka ogu, yagamba ati: “Timwine eki murukumanya kyona,
50 kandi timukakyetegeriize ngu nikibagasira omuntu omu kufeera abantu omu kiikaro ky’ihanga lyona kuhwerekerezebwa.”
51 Kinu atakibaze nka uwe wenka, baitu habwokuba akaba ali nyakatagara omukuru omu mwaka ogu, akaranga ngu Yesu akaba ali w’okufeera ihanga,
52 kandi hatali habw’ihanga lyonka, baitu n’okusorooza hamu abaana ba Ruhanga abaararangire.
53 Kuruga obu, baatandika kuhanuura kumwita.
54 Nahabweki, Yesu atongere kugenda bwerebwere omu Bayudaaya, baitu akarugayo oku yagenda omu kiikaro ekiri haihi n’irungu omu rubuga orurukwetwa Efuraimu, yaikarayo n’abegeswa be.
55 Okuhingurwaho kw’Abayudaaya kukaba kuli haihi kuhika, kandi abantu baingi baaruga omu byaro baagenda Yerusalemu nukwo beezebwe, Okuhingurwaho kutakahikire.
56 Bakaba bemeriire omu yekaru nibaserra Yesu, kandi nibagambirangana bati: “Nimuteekereza araija ha bugenyi?”
57 Baitu banyakatagara abakuru n’Abafalisaayo bakaba bahaire ekiragiro ngu kakuba omuntu weena amanya nambere Yesu ali, asemeriire kubagambira nukwo bamukwate.
