Nk’Oku Yahandiikirwe Yohana 12:1-50
12 Obu hakaba nihaburayo ebiro mukaaga Okuhingurwaho kuhike, Yesu yaija Besaniya nambere Lazaaro ou yahumbwire akaba ali.
2 Obu akaba ali oku, baamucumbira ekiihuro ekya rwebagyo, kandi Maliza akaba naabaheereza, kandi Lazaaro akaba ali omu hali abo abakaba baikaliire na Yesu ha meeza.
3 Malyamu yakwata kimu kyakabiri ekya lita y’amagita agarukuboya kurungi, agarukwetwa naadi, ag’omuhendo mwingi, kandi agatatabwirwemu kintu ekindi kyona, yagaseesa ha bigere bya Yesu kandi yasiimuura ebigere bye naakozesa isoke lye. Enju yoona yaboya amagita ago.
4 Baitu Yuda Isikalyota, omu h’abegeswa be, ow’akaba ali haihi kumugobeza yagamba ati:
5 “Habwaki amagita ganu agarukuboya, gatatunzirwe dinaali 300, zikaheebwa abanaku?”
6 Kinu atakibaze ngu habwokuba akaba naafaaho abanaku, baitu habwokuba akaba ali musuma kandi nuwe yayahuraga akasanduuko ka sente, kandi yaikaraga naiba sente ezitairwemu.
7 Nubwo Yesu yagamba ati: “Mumuleke akole ekintu kinu, nukwo asobole kuntekaniriza ekiro kyange eky’okuziikwa.
8 Habwokuba nimwija kwikaraga n’abanaku, baitu timurukwija kwikaraga na nyowe.”
9 Ekitebe ky’Abayudaaya baingi obu baakimanyire ngu akaba ali oku, baija hatali habwa Yesu wenka baitu n’okurora Lazaaro ow’akaba ahumbwire kuruga omu bafu.
10 Nubwo banyakatagara abakuru baahanuura kwita na Lazaaro,
11 habwokuba Abayudaaya baingi bakaba nibagendayo kandi nibaikiririza omuli Yesu habwa Lazaaro.
12 Ekiro ekyahondiireho, ekitebe ky’abantu baingi abakaba baizire ha bugenyi baahurra ngu Yesu naija Yerusalemu.
13 Nahabweki baakwata amataagi g’emiti y’emikindo baagenda kumutangaana nibatokera haiguru bati: “Nitukusaba ojune! Aine omugisa ogu ow’aizira omu ibara lya Yahwe, Omukama wa Isaleri!”
14 Yesu obu yasangire omwana gw’endogoya, yagwikarraho nk’oku kyahandiikirwe kiti:
15 “Otatiina iwe muhara wa Sayuni. Dora! Omukama waawe naija aikaliire ha mwana gw’endogoya.”
16 Ebintu binu abegeswa be batabyeteegereze ha kubanza, baitu Yesu obu yanyumiziibwe bakaijuka ngu ebintu binu bikamuhandiikwaho, kandi ebintu binu bakabimukora.
17 Ekitebe ky’abantu abakaba baroho obu yayesere Lazaaro kuruga omu kituuro, kandi yamuhumbuura kuruga omu bafu, bakeyongera kumuheera obwakaiso.
18 Egi niyo ensonga habwaki ekitebe ky’abantu baagenzere kumutangaana habwokuba bakahurra ngu akaba akozere ekyamahano kinu.
19 Nahabweki Abafalisaayo baagambirangana bati: “Nimurora ngu binu byatukiza amaani. Dora! Ensi yoona etandikire kumuhondera.”
20 Omuli abo abakaba baizire ha bugenyi kuramya, hakaba harumu n’Abayonaani.
21 Nubwo baahikirra Firipo ow’akaba naaruga Betesaida ey’omu Galiraaya, baamusaba bati: “Waitu, nitugonza kurora Yesu.”
22 Firipo yagenda yagambira Andereya. Kandi Andereya na Firipo baija baagambira Yesu.
23 Baitu Yesu yabagarukamu ati: “Akasumi kahikire Omwana w’omuntu anyumizibwe.
24 Mananu kwo nimbagambira nti, akajuma k’engano obu katagwa omu itaka kakafa, kaikara kali kajuma kamu; baitu obu kafa, kazaara enjuma ezindi nyingi.
25 Ogu weena ow’agonza obwomeezi bwe, abuhwerekereza, baitu ogu weena ow’anoba obwomeezi bwe omu nsi enu, naija kubulinda nukwo asobole kutunga obwomeezi obutahwaho.
26 Weena arukugonza kumpeereza, asemeriire kumpondera, kandi hoona nambere ndi, omuheereza wange nuho aliba. Kakuba omuntu weena agonza kumpeereza, Isenyowe alimuha ekitiinisa.
27 Hati nyetuntwire muno, kandi ngambe ki? Taata, njuna kuruga omu kasumi kanu. Baitu n’obu kiraaba nukwo kiri kiti, enu niyo ensonga habwaki mpikire h’akaire kanu.
28 Taata, nyumiza ibara lyawe.” Nubwo iraka lyaruga omu iguru nirigamba liti: “Ndinyumiize kandi ndyongera ndinyumize.”
29 Ekitebe ky’abantu abakaba bemeriire aho baalihurra kandi baatandika kugamba ngu enkuba niyo ebbwatukire. Abandi baagamba bati: “Malaika nuwe abalize na uwe.”
30 Yesu yagamba ati: “Iraka linu tiryahulirwa habwange baitu habwanyu.
31 Hati ensi enu n’ecwerwa omusango; kandi omulemi w’ensi enu naija kubingirwa aheeru.
32 Kandi nyowe, obu ndaimukibwa kuruga omu nsi,* ndicunda abantu aba buli mulingo mbairize nambere ndi.”
33 Kinu akakibaza kwoleka omulingo akaba naagenda kufa.
34 Nubwo ekitebe ky’abantu baamugarukamu bati: “Tukahurra kuruga omu Biragiro ngu Kristo aikaraho ebiro n’ebiro. Nosobora ota kugamba ngu Omwana w’omuntu naagenda kwimukibwa? Omwana w’omuntu onu nooha?”
35 Yesu yabagambira ati: “Ekyererezi kiriba na inywe habw’akacu kake. Murubate mukyaine ekyererezi, nukwo omwirima gutabakiza amaani; ogu weena ow’arubatira omu mwirima tamanya nambere arukugenda.
36 Nk’oku mukyaine ekyererezi, mwikiririze omu kyererezi, nukwo musobole kufooka abaana b’ekyererezi.”
Yesu akabaza ebintu ebi kandi yarugaho yagenda yabesereka.
37 N’obu kiraaba ngu akakora ebyamahano bingi nibarora, bakaba batarukumwikiririzaamu,
38 nukwo ebigambo bya nabbi Isaya bisobole kuhikirra, ayagambire ati: “Yahwe, nooha aikiririize omu bigambo ebi ahuliire kuruga hali itwe? Kandi nooha yasukuliirwe omukono gwa Yahwe?”
39 Ensonga habwaki batarasoboire kwikiriza eri ngu habwokuba Isaya akongera yagamba ati:
40 “Aisire amaiso gaabo kandi agumanganiize emitima yabo, nukwo batahweza n’amaiso gaabo kandi bateetegereza n’emitima yabo nukwo bahinduke mbakize.”
41 Isaya akabaza ebintu binu habwokuba akarora ekitiinisa kye, kandi yamubazaaho.
42 Baitu baingi, otwaliiremu n’abalemi baamwikiririzaamu, baitu batakibaze habw’Abafalisaayo, nukwo batababinga omu isorrokaniro;
43 habwokuba bakagonza ekitiinisa kuruga h’abantu kukira ekitiinisa kuruga hali Ruhanga.
44 Baitu Yesu yagambira haiguru ati: “Ogu weena ow’anyikiririzaamu, aba ataikiririize omuli nyowe nyenka, baitu n’omuli ogu ayantumire;
45 kandi n’ogu ow’andora aba arozere n’Ogu ayantumire.
46 Nyizire omu nsi nk’ekyererezi, nukwo ogu weena ow’anyikiririzaamu ataikara omu mwirima.
47 Baitu kakuba omuntu weena ahurra ebigambo byange kandi atabitaire omu nkora, timmucwera omusango; habwokuba ntaije kucwera ensi omusango, baitu kugijuna.
48 Ogu weena arukunyanga kandi atarukwikiriza ebigambo byange, aine ow’aramucwera omusango. Ekigambo eki mbalize nikyo kirimucwera omusango ha kiro ekya ha mpero.
49 Habwokuba tingambire habwange nyenka, baitu Isenyowe ayantumire nuwe wenyini yandagiire ebi nsemeriire kubaza.
50 Kandi nkimanyire ngu ekiragiro kye nikihikya omu bwomeezi obutahwaho. Nahabweki byona ebi mbaza, mbibaza nk’oku Isenyowe yangambiire.”
Obugambo Obuli Hansi
^ Ekirukumanyisa, kuhanikwa ha muti.
