Nk’Oku Yahandiikirwe Yohana 13:1-38
13 Obugenyi obw’Okuhingurwaho obu bukaba butakahikire, kandi habwokuba Yesu akaba akimanyire ngu akasumi ke ak’okuruga omu nsi enu kugenda hali Ise kakaba kahikire, abe abali omu nsi abaakaba naagonza, akabagonza kuhikira kimu ha kumalirra.
2 Bakaba bali ha kiihuro ekya rwebagyo, kandi Sitaani* akaba amazire ira kuteeka omu mutima gwa Yuda Isikalyota, mutabani wa Simooni, ekiteekerezo eky’okugobeza Yesu.
3 Nahabweki, Yesu obu yakimanyire ngu Ise amuhaire ebintu byona omu mikono ye, kandi ngu akaba arugire hali Ruhanga kandi naagenda hali Ruhanga,
4 akaimuka ha kiihuro ekya rwebagyo, yajuura ekijwaro kye ekya haruguru yakiteeka ha rubaju. Yakwata etaulo yagyeteega omunda.
5 Hanyuma y’okuteeka amaizi omu bbeeseni,* yatandika kunaabya ebigere by’abegeswa be naabyomesa n’etaulo ey’akaba ayeteegere omunda.
6 Hanyuma yahika hali Simooni Petero. Petero yamukaguza ati: “Mukama wange, noonaabya ebigere byange?”
7 Yesu yamugarukamu ati: “Eki ndukukora torukukyeteegereza hati, baitu noija kukyeteegereza hanyuma y’ebintu binu.”
8 Petero yamugambira ati: “Tolinaabya ebigere byange naakake!” Yesu yamugarukamu ati: “Toine omugabo na nyowe rundi buli nkunaabize ebigere.”
9 Simooni Petero yamugambira ati: “Mukama wange, otaanaabya ebigere byonka, baitu onaabye emikono n’omutwe gwange.”
10 Yesu yamugambira ati: “Ogu anyakwogere aba ali mwecumi weena kandi aba naayetaaga kunaaba ebigere byonka. Kandi inywe muli becumi, baitu hatali inywena.”
11 Habwokuba akaba amanyire omusaija ow’akaba naija kumugobeza. Nikyo yagambiire ati: “Inywena timuli becumi.”
12 Obu yamazire kubanaabya ebigere n’okujwara ekijwaro kye ekya haruguru, yayongera yaikarra ha meeza kandi yabagambira ati: “Mwetegeriize habwaki mbanaabize ebigere?
13 Inywe munyeta ‘Omwegesa’ kandi ‘Mukama waitu,’ kandi muhikire habwokuba nukwo kiri.
14 Nabahweki, obu kiraaba ngu nyowe, Mukama wanyu kandi Omwegesa, mbanaabize ebigere, na inywe musemeriire kunaabisangana ebigere.
15 Habwokuba mbateeriireho ekyokurorraho, nk’oku mbakozere na inywe nukwo musemeriire kukora muti.
16 Mananu kwo nimbagambira nti, omwiru tasobora kukira mukama we, n’ogu ayatumirwe, tasobora kukira ayamutumire.
17 Obu muraaba mumanyire ebintu binu, muli b’okusemererwa obu mubikora.
18 Tindukubazaaho inywena; mmanyire abanakomere. Baitu eki kikaba kiti, nukwo kihikiirize ekyahandiikirwe ekirukugamba ngu: ‘Ogu ayalyaga ebyokulya byange, nuwe anyimukiize ekikongoijo kye.’
19 Kuruga hati, nimbagambira kitakabaireho, nukwo obu kiraabaho, musobole kwikiriza ngu ninyowe ogu.
20 Mananu kwo nimbagambira nti, ogu weena anyakutangirra omuntu ou ntumire, aba atangiriire na nyowe, kandi n’ogu anyakuntangirra, aba atangiriire Ogu ayantumire.”
21 Hanyuma y’okubaza ebintu binu, Yesu yatuntura muno kandi yabagambirraho ati: “Mananu kwo nimbagambira nti, omu hali inywe naija kungobeza.”
22 Abegeswa baatandika kurorangana nibeekaguza nooha ow’akaba naabazaaho.
23 Omu h’abegeswa, Yesu ou yagonzaaga muno, akaba aikaliire haihi na* Yesu.
24 Nubwo Simooni Petero yacikiza omutwe omwegeswa onu, yamugambira ati: “Tugambire naabazaaho oha.”
25 Omwegeswa ogu yaigamira ekifuba kya Yesu, yamukaguza ati: “Mukama waitu, nooha?”
26 Yesu yamugarukamu ati: “Nuwe ogu ou ndaaha ekicweka ky’omugaati eki ndaakoza.” Hanyuma y’okukoza omugaati, yagukwatwa yaguha Yuda, mutabani wa Simooni Isikalyota.
27 Yuda obu yamazire kukwata ekicweka ky’omugaati, Sitaani yamutaahamu. Kandi Yesu yamugambira ati: “Eki orukukora, kikole omu bwangu.”
28 Baitu busaho n’omu hali abo abakaba baikaliire ha meeza ayayetegeriize habwaki yamugambiire ati.
29 Habwokuba Yuda nuwe yayahuraga akasanduuko ka sente, abamu bakateekereza ngu Yesu akaba naamugambira ati: “Gura ebi turukwetaaga ha bugenyi,” rundi ngu agire eki yagabira abanaku.
30 Nahabweki, hanyuma y’okukwata ekicweka ky’omugaati, ahonaaho yaturuka aheeru. Kandi bukaba buli bwire bw’ekiro.
31 Obu yamazire kuturuka aheeru, Yesu yagamba ati: “Hati Omwana w’omuntu anyumiziibwe kandi Ruhanga na uwe anyumiziibwe kuraba omuli uwe.
32 Ruhanga wenyini naija kumunyumiza kandi naija kumunyumiza ahonaaho.
33 Inywe abaana abagonzebwa, ndi na inywe habw’akacu kake. Nimwija kunserra; kandi nk’oku nagambiire Abayudaaya nti, ‘Nambere ndukugenda timusobora kwijayo’ na inywe nakibagambira.
34 Nimbaha ekiragiro ekihyaka ngu, mugonzanganege nk’oku na nyowe mbagondeze, na inywe nukwo mugonzanganege.
35 Obu murakoraga muti, boona balimanya ngu muli begeswa bange—obu muragonzangana.”
36 Simooni Petero yamukaguza ati: “Mukama waitu, noogenda nkaha?” Yesu yamugarukamu ati: “Nambere ndukugenda tosobora kumpondera hati, baitu olimpondera hanyuma.”
37 Petero yamukaguza ati: “Mukama waitu, habwaki ntasobora kukuhondera hati? Ndahayo obwomeezi bwange ha bwawe.”
38 Yesu yamugarukamu ati: “Mali oyeteekaniize kuhayo obwomeezi bwawe ha bwange? Mananu kwo ninkugambira nti, nambere enkoko erakookera, noija kuba omazire kunyehakana emirundi esatu.”
Obugambo Obuli Hansi
^ “Omu Ruyonaani, diabolos, ekirukumanyisa ‘omuhangirizi.’”
^ Rundi, “bbaafu.”
^ Nk’oku kiri, “haihi n’ekifuba kya.” Kinu kyayolekaga ngu omuntu ogu naagonzebwa muno.
