Nk’Oku Yahandiikirwe Yohana 14:1-31
14 “Mutaikiriza emitima yanyu kutuntura. Mwikiririze omuli Ruhanga; kandi na nyowe munyikiririzeemu.
2 Omu nju ya Isenyowe haliyo ebiikaro bingi. Kakuba kitali eki, naakubagambiire, habwokuba ningenda kubateekaniriza ekiikaro.
3 Kakuba ngenda kandi nkabateekaniriza ekiikaro, ndigaruka mbatwale omuka nambere ndi, nukwo nambere ndi, na inywe nuho mube.
4 Kandi nambere ndukugenda, mumanyire omuhanda.”
5 Tomasi yamugambira ati: “Mukama waitu, titumanyire nambere orukugenda. Turamanya tuta omuhanda?”
6 Yesu yamugambira ati: “Ninyowe omuhanda, amananu, n’obwomeezi. Busaho n’omu ow’aija hali Isenyowe rundi buli arabire omuli nyowe.
7 Kakuba mubaire mummanyire, mwakubaire mumanyire na Isenyowe; habwokuba kuruga hati mumumanyire kandi mumurozere.”
8 Firipo yamugambira ati: “Mukama waitu, twoleke Isiitwe, kandi eki kiratumara.”
9 Yesu yamugambira ati: “Hanyuma y’okumara na inywe akasumi kanu akaraihire, Firipo, tokammanyire? Weena ow’arozere nyowe aba arozere na Isenyowe. Habwaki nogamba oti, ‘Twoleke Isiitwe’?
10 Timurukwikiriza ngu nyowe ndi omu bumu na Isenyowe, na Isenyowe ali omu bumu na nyowe? Ebintu ebi ndukubagambira, timbibaza habwange baitu Isenyowe anyakwikara na nyowe omu bumu naakora emirimo ye.
11 Mwikirize obu mbagambira ngu nyowe ndi omu bumu na Isenyowe, kandi na Isenyowe ali omu bumu na nyowe; kitali eki, mwikirize habw’emirimo ei ndukukora.
12 Mananu kwo nimbagambira nti, ogu weena ow’arukunyikiririzaamu, alikora ebi ndukukora kandi alikora ebirukukira na binu habwokuba ningenda hali Isenyowe.
13 Kandi kyona eki mulisaba omu ibara lyange, ndikikora nukwo Isenyowe asobole kunyumizibwa kuraba omu Mwana.
14 Kakuba musaba ekintu kyona omu ibara lyange, ndikikora.
15 “Obu muraaba nimungonza, nimwija kworobera ebiragiro byange.
16 Kandi ndisaba Isenyowe kandi alibaha omukonyezi ondi ow’aliba na inywe ebiro n’ebiro,
17 ogu nugwo omwoyo ogw’amananu ensi ogw’etasobora kutunga habwokuba tegurora kandi tegumanyire. Inywe mugumanyire habwokuba gwikara na inywe kandi guli omuli inywe.
18 Tindukwija kubaleka muli nfuuzi. Ninyija nambere muli.
19 Omu kacu kake, ensi teryongera kundora, baitu inywe mulindora, habwokuba ndi mwomeezi kandi na inywe nimwija kuba bomeezi.
20 Omu kasumi ako, mulikimanya ngu ndi omu bumu na Isenyowe, kandi na inywe muli omu bumu na nyowe; na nyowe ndi omu bumu na inywe.
21 Ogu weena ow’aikiriza ebiragiro byange kandi akabyorobera, nuwe ogu ow’angonza. Kandi weena ow’angonza, Isenyowe alimugonza, kandi na nyowe ndimugonza, kandi mweyolekere kimu.”
22 Yuda ondi atali Isikalyota, yamugambira ati: “Mukama waitu, kiki ekikuletiire kugonza kutweyolekera kimu hatali ensi?”
23 Yesu yamugarukamu ati: “Kakuba omuntu weena aba nangonza, naija kworobera ekigambo kyange kandi Isenyowe naija kumugonza kandi twije nambere ali, twikale na uwe.
24 Omuntu weena ow’atarukungonza, tayorobera ebigambo byange. Ebigambo ebi murukuhurra tibiri byange, baitu bya Isenyowe ayantumire.
25 “Nabagambira ebintu binu nkyali hamu na inywe.
26 Baitu omukonyezi, omwoyo ogurukwera Isenyowe ow’alibasindikira omu ibara lyange, alibeegesa ebintu byona kandi abaijukye ebintu byona ebi nabagambiire.
27 Nimbasigira obusinge; nimbaha obusinge bwange. Tindukububaha nk’oku ensi ebugaba. Mutaleka emitima yanyu kwetuntura n’obukwakuba okutiina.
28 Muhuliire nk’oku mbagambiire nti, ‘Ningenda kandi ningaruka nambere muli.’ Kakuba mubaire nimungonza, mwakusemeriirwe ngu ningenda hali Isenyowe, habwokuba Isenyowe naankira obukuru.
29 Nabagambira hati kitakabaireho nukwo musobole kwikiriza obu kiraabaho.
30 Tinkyaine bingi eby’okubagambira habwokuba omulemi w’ensi naija kandi tanyineho obusobozi.
31 Baitu ensi kusobora kumanya ngu ningonza Isenyowe, ninkora nk’oku Isenyowe andagiire kukora. Mwimuke, turuge hanu.
