Nk’Oku Yahandiikirwe Yohana 16:1-33
16 “Mbagambiire ebintu binu nukwo mutatabaijuka.
2 Abantu balibabinga omu masorrokaniro. Amananu gali ngu, akasumi nikaija omuntu weena alibaita obu aliteekereza ngu omu kukora eki, naahereza Ruhanga.
3 Baitu balikora ebintu binu, habwokuba tibamanyire Isenyowe n’obwakuba nyowe.
4 Mbagambiire ebintu binu, nukwo akasumi kaabyo obu kalihika, mwijuke ngu nkabibagambira.
“Ebintu binu ntabibagambire ha kubanza, habwokuba nkaba ndi na inywe.
5 Baitu hati ningenda hali Ogu ayantumire, kandi busaho n’omu omuli inywe arukunkaguza ati: ‘Noogenda nkaha?’
6 Baitu habwokuba mbagambiire ebintu binu, mwaijura obujune omu mitima yanyu.
7 Nyowe nabagambira amananu, kandi okugenda kwange nikubagasira. Habwokuba kakuba ntagenda, omukonyezi taliija nambere muli; baitu obu ndaagenda, ninyija kumubasindikira.
8 Kandi ogu obu aliija, aliha ensi obwakaiso oburukunanura oburukukwata ha kibi, okuhikirra hamu n’okucwa omusango:
9 eky’okubanza; oburukukwata ha kibi, habwokuba tibarukunyikiririzaamu;
10 hanyuma oburukukwata ha kuhikirra, habwokuba ningenda hali Isenyowe kandi timulyongera kundora;
11 kandi oburukukwata ha kucwa omusango, habwokuba omulemi w’ensi enu acweriirwe omusango.
12 “Nkyaine ebintu bingi eby’okubagambira, baitu timusobora kubyeteegereza hati.
13 Baitu omukonyezi obu aliija, omwoyo ogw’amananu, alibebembera nukwo musobole kweteegereza kurungi amananu goona, habwokuba talibaza habwe wenka, baitu ebi ahurra nibyo alibaza, kandi alibamanyisa ebintu ebirukugenda kwija.
14 Ogu aliinyumiza, habwokuba ebi atunga kuruga hali nyowe nibyo alibamanyisa.
15 Ebintu byona Isenyowe ebi aine byange. Egi niyo ensonga habwaki ngambire ngu omukonyezi ebi atunga kuruga hali nyowe nibyo alibamanyisa.
16 Omu kacu kake nimwija kuba mutakyandora, baitu hanyuma y’akacu kake, nimwija kwongera mundole.”
17 Nubwo bamu h’abegeswa be baagambirangana bati: “Naamanyisa ki obu arukutugambira ati, ‘Omu kacu kake nimwija kuba mutakyandora, baitu hanyuma y’akacu kake, nimwija kwongera mundole,’ kandi ngu ‘habwokuba ningenda hali Isenyowe’?”
18 Nahabweki bakaba nibagamba bati: “Naamanyisa ki obu arukugamba ngu, ‘omu kacu kake’? Titurukumanya eki arukubazaaho.”
19 Yesu obu yakimanyire ngu nibagonza kumukaguza, yabagambira ati: “Muliyo nimukaguzangana kinu, habwokuba ngambire ngu: ‘Omu kacu kake nimwija kuba mutakyandora, baitu hanyuma y’akacu kake, nimwija kwongera mundole’?
20 Mananu kwo nimbagambira nti, mulirra kandi muganye, baitu ensi erisemererwa; mulisaasa, baitu okusaasa kwanyu kulirugamu okusemererwa.
21 Omukazi obu aba naazaara, asaasa muno habwokuba akasumi ak’okuzaara kaba kahikire, baitu obu amara kuzaara omwana, taijuka obusaasi obu ahuliire habw’okusemererwa ngu omuntu azairwe omu nsi.
22 Omu mulingo nugwo gumu, inywe nimusaalirwa hati, baitu ndyongera mbarole, n’emitima yanyu erisemererwa kandi busaho n’omu alibaihaho okusemererwa kwanyu.
23 Omu kasumi ako timulinkaguza ekikaguzo kyona. Mananu kwo nimbagambira nti, obu musaba Isenyowe ekintu kyona, naija kukibaha omu ibara lyange.
24 Kuhikya na hati timukasabire ekintu kyona omu ibara lyange. Musabe muraheebwa, nukwo okusemererwa kwanyu kusobole kuhikirra.
25 “Ebintu binu mbibagambiire omu nfumo, akasumi nikaija obu ntalyongera kubibagambira omu nfumo, baitu ndibagambira ebirukukwata hali Isenyowe bbwa.
26 Omu kasumi ako mulisaba Isenyowe omu ibara lyange; omu kubaza eki, tindukumanyisa ngu ndibasabira ekintu kyona hali Isenyowe.
27 Isenyowe naabagonza habwokuba na inywe mungondeze kandi mwikiriize ngu nkaija kukiikirra Ruhanga.
28 Nkaija omu nsi kukiikirra Isenyowe. Hati ninduga omu nsi kandi ningenda hali Isenyowe.”
29 Abegeswa be baagamba bati: “Dora! Hati nobaza na itwe bbwa kandi torukukozesa enfumo.
30 Hati tukimanyire ngu omanyire ebintu byona kandi torukwetaaga omuntu weena kukukaguza. Habw’eki, nikyo turukwikiririza ngu okaruga hali Ruhanga.”
31 Yesu yabagarukamu ati: “Hati nimwikiriza?
32 Dora! Akasumi nikaija, kandi kahikire, buli omu hali inywe obu aliraranga agende owe kandi munsigeho nyenka. Baitu tindinyenka, habwokuba Isenyowe ali hamu na nyowe.
33 Mbagambiire ebintu binu, nukwo kuraba omuli nyowe, musobole kuba n’obusinge. Omu nsi nimwija kutunga obujune, baitu mugume! Nyowe nsingwire ensi.”
