Nk’Oku Yahandiikirwe Yohana 18:1-40
-
Yuda agobeza Yesu (1-9)
-
Petero akozesa empirima (10, 11)
-
Yesu atwarwa hali Anasi (12-14)
-
Petero ayehakana Yesu habw’omurundi ogw’okubanza (15-18)
-
Yesu ali omu maiso ga Anasi (19-24)
-
Petero ayehakana Yesu omurundi ogwakabiri n’ogwakasatu (25-27)
-
Yesu ali omu maiso ga Pirato (28-40)
-
“Obukama bwange tibuli kicweka ky’ensi enu” (36)
-
18 Yesu obu yamazire kubaza ebi, yagenda n’abegeswa be omu musiri ogukaba guli nseeri y’Ekihanga kya Kidurooni.
2 Kandi Yuda ayamugobiize na uwe akaba amanyire ekiikaro eki, habwokuba Yesu yakiraga kutangatanganirayo n’abegeswa be.
3 Yuda yaleeta ekitebe ky’abaserikale hamu n’abalinzi abaatumirwe banyakatagara abakuru n’Abafalisaayo, baija bakwasire emuli, etaara, n’eby’okurwanisa.
4 Habwokuba Yesu akaba amanyire ebintu ebirukugenda kumubaho, yaija omu maiso, yabakaguza ati: “Nimuserra oha?”
5 Baamugarukamu bati: “Yesu Omunyanazaleesi.” Yabagambira ati: “Ninyowe.” Kandi Yuda ow’akaba amugobiize akaba ayemeriire na bo.
6 Baitu Yesu obu yabagambiire ngu, “Ninyowe,” baagaruka enyuma baagwa hansi.
7 Yayongera yabakaguza ati: “Nimuserra oha?” Baagarukamu bati: “Yesu Omunyanazaleesi.”
8 Yesu yabagambira ati: “Mbagambiire nti, ninyowe. Nahabweki obu muraaba nimuserra nyowe, abasaija banu mubaleke bagende.”
9 Kinu kikabaho kuhikiiriza eki akaba abalize ati: “Hali abo abawampaire timbuzirweho n’omu.”
10 Simooni Petero ow’akaba aine empirima yagisomorayo, yatema omwiru wa nyakatagara omukuru, yamucwaho okutu okw’obulyo. Omwiru onu akaba naayetwa Maliko.
11 Baitu Yesu yagambira Petero ati: “Empirima gigarre omu nsaho yayo. Kimpikiriire okunywa ekikopo Isenyowe eki ampaire.”
12 Nubwo abaserikale n’omuduumizi wabo hamu n’abalinzi ba Bayudaaya, baakwata Yesu baamuboha.
13 Baabanza kumutwara mwa Anasi habwokuba akaba ali isezaara Kayaafa ow’akaba ali nyakatagara omukuru omu mwaka ogu.
14 Kayaafa nuwe akaba ahabwire Abayudaaya ngu nikiija kubagasira omuntu omu kufeera abantu.
15 Simooni Petero hamu n’omwegeswa ondi, baahondera Yesu. Omwegeswa ogu akaba amanyirwe nyakatagara omukuru kandi yagenda na Yesu omu zigati ya nyakatagara omukuru,
16 baitu Petero akaba ayemeriire aheeru ha mulyango. Nahabweki omwegeswa ogu ow’akaba amanyirwe nyakatagara omukuru, yagenda aheeru yabaza n’omulinzi wa ha mulyango kandi yataahyamu Petero.
17 Nubwo omuzaana ow’akaba naalinda ha mulyango yagambira Petero ati: “Na iwe toli omu h’abegeswa b’omusaija ogu?” Petero yamugarukamu ati: “Nangwa, tindi omu hali bo.”
18 Omu kasumi ako, abairu n’abalinzi bakaba bemeriire betoroire omurro gw’amakara ogu bakaba bahembere. Bakaba niboota omurro habwokuba hakaba haliyo embeho. Petero na uwe akaba ayemeriire na bo naayota omurro.
19 Nubwo nyakatagara omukuru yakaguza Yesu ebirukukwata h’abegeswa be hamu n’ebi arukwegesa.
20 Yesu yamugarukamu ati: “Natebezaaga abantu omu rwijwire. Kandi nayegesaaga omu isorrokaniro n’omu yekaru, nambere Abayudaaya boona besorooleza kandi ntabaze ekintu kyona omu nsita.
21 Habwaki nonkaguza? Kaguza abo abaahuliire ebi nabalize. Dora! Abo bamanyire ebi nabalize.”
22 Obu yamazire kubaza ebintu ebi, omu h’abalinzi ow’akaba ayemeriire haihi aho yateera Yesu oruhi h’amaiso kandi yagamba ati: “Ogu nugwo omulingo osemeriire kugarukamu nyakatagara omukuru?”
23 Yesu yamugarukamu ati: “Obu ndaaba mbalize ekitahikire, ha obwakaiso kwoleka ngu eki mbalize tikihikire. Baitu obu ndaaba mbalize ekihikire, habwaki ontiire?”
24 Hanyuma Anasi yamusindika hali Kayaafa nyakatagara omukuru, aboherwe.
25 Omu kaire ako, Petero akaba ayemeriire aho naayota omurro. Nubwo baamukaguza bati: “Na iwe toli omu h’abegeswa be?” Yakyehakana naagamba ati: “Nangwa, tindi omu hali bo.”
26 Omu h’abairu ba nyakatagara omukuru, ow’akaba ali munyabuzaale w’omusaija Petero ou yatemereho okutu, yagamba ati: “Iwe, tinkurozerege oli na uwe omu musiri?”
27 Baitu Petero yayongera yakyehakana kandi ahonaaho enkoko yakooka.
28 Kandi baiha Yesu mwa Kayaafa baamutwara muka y’omulemi. Kandi obwire bukaba buli bwa nyenkyakara muno. Baitu bo batataahe omu nju y’omulemi nukwo batafooka abatasemiire nukwo basobole kulya Okuhingurwaho.
29 Pirato yaturuka aheeru yaija nambere bali, yabakaguza ati: “Omusaija onu nimumujunaana ki?”
30 Baamugarukamu bati: “Kakuba omusaija onu abaire atali nkozi y’ebibi, titwakumuleesere nambere oli.”
31 Pirato yabagambira ati: “Inywe mumutwale, mumucwere omusango kusigikirra ha biragiro byanyu.” Abayudaaya baamugambira bati: “Ebiragiro tibirukutwikiriza kwita omuntu weena.”
32 Kinu kikabaho nukwo kisobole kuhikiiriza Yesu eki yabalize kwoleka omulingo yaakufiiremu.
33 Nubwo Pirato yagarukayo omu nju yayeta Yesu kandi yamukaguza ati: “Oli Omukama w’Abayudaaya?”
34 Yesu yamugarukamu ati: “Eki okinkagwize habwawe, rundi haroho abakugambiire ebirukunkwataho?”
35 Pirato yagamba ati: “Nyowe ndi Muyudaaya? Abantu ab’ihanga lyawe bonyini na banyakatagara abakuru nubo bakundetiire hanu. Okozere ki?”
36 Yesu yamugarukamu ati: “Obukama bwange tibuli kicweka ky’ensi enu, kakuba Obukama bwange bubaire kicweka ky’ensi enu, abahondezi bange baakurwaine nukwo ntaheebwayo omu mikono y’Abayudaaya. Baitu Obukama bwange tibuli bw’omu nsi enu.”
37 Pirato yamukaguza ati: “Hati oli Mukama?” Yesu yamugarukamu ati: “Iwe wenka wakyegambira ngu ndi Mukama, kinu nikyo nazaaliirwe kandi egi niyo ensonga habwaki naizire omu nsi, kuha obwakaiso oburukukwata h’amananu. Buli omu ow’ali harubaju rw’amananu ahuliiriza iraka lyange.”
38 Pirato yamukaguza ati: “Amananu nikyo kiki?”
Obu yamazire kubaza ebi yayongera yaturuka aheeru, yagenda hali Abayudaaya yabagambira ati: “Nindora ataine musango.
39 Eri ngeso yanyu ngu ha Kuhingurwaho ngire omuntu ou nalekera, mmubahe. Hati nimugonza ndekere Omukama w’Abayudaaya?”
40 Baayongera baatokera haiguru bati: “Otalekera omusaija ogu, baitu lekera Bbarabba.” Bbarabba akaba ali musuma.
