Nk’Oku Yahandiikirwe Yohana 19:1-42
19 Nubwo Pirato yaragira batwale Yesu kandi bamuteere.
2 Kandi abaserikale baaruka ekondo y’amahwa baagimuta ha mutwe, baamujweka orugoye orurukugaajuka,
3 kandi baikara nibaija nambere ali nibamugambira bati: “Obusinge bube na iwe Omukama w’Abayudaaya!” Kandi baikara nibamuteera empi h’amaiso.
4 Pirato yayongera yaturuka aheeru yabagambira ati: “Dora! Namubaleetera aheeru, nukwo mukimanye ngu naasanga ataine musango.”
5 Yesu yaturuka aheeru ajwaire ekondo y’amahwa n’orugoye orurukugaajuka. Kandi Pirato yabagambira ati: “Dora! Onu nuwe omusaija!”
6 Baitu banyakatagara abakuru hamu n’abalinzi obu baamurozere baatoka nibagamba ngu: “Ahanikwe ha muti! Ahanikwe ha muti!” Pirato yabagambira ati: “Inywe mumutwale mumwite, habwokuba nyowe nsangire ataine musango.”
7 Abayudaaya baamugarukamu bati: “Twine ekiragiro, kandi kusigikirra ha kiragiro eki, asemeriire kufa habwokuba ayefoire Omwana wa Ruhanga.”
8 Pirato obu yahuliire ebi bakaba nibabaza, yayeyongera kutiina,
9 yayongera yataaha omu nju y’omulemi, yagambira Yesu ati: “Owanyu ninkaha?” Baitu Yesu tiyamugarukamu.
10 Nubwo Pirato yamukaguza ati: “Tokimanyire ngu nyine obusobozi obw’okukulekera kandi nyine obusobozi obw’okukwita?”
11 Yesu yamugarukamu ati: “Tiwakubaire n’obusobozi bwona hali nyowe kakuba butarakuhairwe kuruga haiguru. Egi niyo ensonga habwaki omuntu ayampaireyo hali iwe aine ekibi ekirukukira ekyawe.”
12 Habw’ensonga egi, Pirato akaikara naaserra omulingo aramulekera, baitu Abayudaaya baatoka nibagamba bati: “Kakuba olekera omusaija onu, toli munywani wa Kaisaali. Ogu weena ow’ayefoora mukama aba naahakaniza Kaisaali.”
13 Pirato hanyuma y’okuhurra ebigambo ebi, yaleeta Yesu aheeru, Pirato yaikarra omu ntebe y’okucweramu omusango* omu kiikaro ekirukwetwa Amabaale Agaaliriirwe omu Ruheburaniya, ekirukwetwa Gabasa.
14 Kikaba kiri kiro eky’okuteekaniza Okuhingurwaho; zikaba ziri nka saaha mukaaga kandi yagambira Abayudaaya ati: “Dora! Omukama wanyu!”
15 Baitu bakatoka bati: “Mutwale! Mutwale! Ahanikwe ha muti!” Pirato yabakaguza ati: “Nyowe nyite Omukama wanyu?” Banyakatagara abakuru baagarukamu bati: “Titwine Omukama, oihireho Kaisaali.”
16 Hanyuma yamubaha bamutwale kumwitira ha muti.
Nahabweki baatwara Yesu.
17 Yayetweka omuti, yagenda omu kiikaro ekirukwetwa eky’Akahangara, omu Ruheburaniya ekirukwetwa Gologoosa.
18 Obu baahikireyo, baamuterra emisumaali ha muti, n’abasaija abandi babiri, omu ha rubaju rumu, n’ondi ha rubaju orundi, kandi Yesu ali hagati yabo.
19 Pirato yahandiika ebigambo h’akaapa yabiteeka ha muti. Bikaba nibigamba biti: “Yesu Omunyanazaleesi, Omukama w’Abayudaaya.”
20 Abayudaaya baingi bakasoma ebigambo ebi, habwokuba ekiikaro nambere Yesu yateeriirwe emisumaali ha muti kikaba kiri haihi n’orubuga, kandi bikaba bihandiikirwe omu Ruheburaniya, Orulatini hamu n’Oruyonaani.
21 Baitu banyakatagara abakuru ab’Abayudaaya baagambira Pirato bati: “Otahandiika oti, ‘Omukama w’Abayudaaya,’ baitu handiika oti, ‘Akagamba ngu ninyowe Omukama w’Abayudaaya.’”
22 Pirato yabagarukamu ati: “Eki mpandiikire nikyo eki.”
23 Abaserikale obu baamazire kuterra Yesu emisumaali ha muti, baakwata ebyokujwara bye ebya haruguru baabicwamucwamu ebicweka bbina, buli muserikale yatwara ekicweka kimu kandi baatwara n’ekijwaro kye eky’omunda. Baitu ekijwaro kye eky’omunda kikaba kitaine rubaziro, habwokuba kikaba kirukirwe kyona kuruga haiguru kuhika ha mukugiro.
24 Baagambirangana bati: “Tutakitaagura, leka tutome kucwamu nooha arakitwara.” Kinu kikabaho kuhikiiriza ekyahandiikirwe ekirukugamba kiti: “Bakabagana ebijwaro byange, kandi bakatoma habw’ebijwaro byange.” Mananu kwo ebintu binu bikakorwa abaserikale.
25 Harubaju rw’omuti Yesu ogw’akaba ahanikirweho, hakaba hemeriireho nyina na nyinento, Malyamu mukazi wa Kileopasi, na Malyamu Magadalene.
26 Yesu obu yarozere nyina hamu n’omwegeswa ou yagonzaaga muno bemeriire haihi aho, yagambira nyina ati: “Mukazi, dora! Mutabani waawe!”
27 Hanyuma yagambira omwegeswa ati: “Dora! Nyoko!” Kandi kuruga kasumi ako, omwegeswa akatwara nyina Yesu omu ka ye.
28 Hanyuma y’ebi, Yesu obu yakimanyire ngu hati ebintu byona bimazire kuhikirra, kusobora kuhikiiriza ebyahandiikirwe, yagamba ati: “Nyine iroho.”
29 Aho hakaba haroho ekibindi ekiijwire amaarwa agarukusarra. Baateeka siponji ijwire amaarwa agarukusarra h’akati ka izobu,* baagimuta ha munwa.
30 Obu yamazire kurozaaho amaarwa ago agarukusarra, Yesu yagamba ati: “Kihoire!” yainamya omutwe gwe, yafa.*
31 Nk’oku kikaba kiri kiro eky’Okuteekaniza, kandi Abayudaaya bakaba batarukugonza emitumbi ikale ha miti ha kiro kya Sabbiti habwokuba (Sabbiti egi ekaba eri nkuru muno), baasaba Pirato amaguru g’abasaija abo gahendwe kandi emitumbi yabo ehanuurwe kuruga ha miti.
32 Kandi abasaija bakaija baahenda amaguru g’omusaija ow’okubanza n’ag’omusaija ondi ow’akaba ahanikirwe harubaju rwe.
33 Baitu obu baahikire hali Yesu, baasanga amazire ira kufa, nahabweki batahende amaguru ge.
34 Omu h’abaserikale yamucumita icumu omu rubaju rwe, kandi ahonaaho harugamu esagama n’amaizi.
35 Kandi ogu ayakiboine nuwe arukuha obwakaiso bunu, obwakaiso bwe bw’amananu kandi akimanyire ngu ebi arukubaza by’amananu, nukwo na inywe musobole kwikiriza.
36 Mananu kwo ebintu binu bikabaho nukwo bisobole kuhikiiriza ekyahandiikirwe kinu: “Busaho igufa lye na limu eririhendwa.”
37 Kandi ekyahandiikirwe ekindi nikigamba kiti: “Balirora ogu ou baacumisire.”
38 Hanyuma y’ebintu ebi, Yusufu owa Alimasiya, ow’akaba ali mwegeswa wa Yesu baitu ow’omu nsita habwokuba akaba naatiina Abayudaaya, yasaba Pirato amwikirize atwale omutumbi gwa Yesu. Kandi Pirato yamwikiriza. Nahabweki yaija yagutwara.
39 Nikodemu, ow’akaba amwiziire ha kubanza omu bwire bw’ekiro, na uwe yaija, yaleeta ebirukuboya ebitabwirwe, ebya alowe na miira ebirukwingana nka kilo 33.
40 Nahabweki, baakwata omubiri gwa Yesu baaguzinga omu ngoye z’ekitaani n’ebirukuboya kusigikirra ha ngeso y’Abayudaaya ey’okuziika.
41 Omu kiikaro nambere baitiire Yesu hakaba haroho omusiri kandi omu musiri ogu hakaba harumu ekituuro ekihyaka ekitakazikwamuga omuntu weena.
42 Habwokuba kikaba kiri kiro ky’Abayudaaya eky’Okuteekaniza, kandi ekituuro kiri haihi, baabyamyayo omubiri gwa Yesu.
Obugambo Obuli Hansi
^ Rora, Kusoborra Ebigambo.
^ Rora, Kusoborra Ebigambo.
^ Nk’oku kiri, “yahayo omwoyo gwe.”
