Nk’Oku Yahandiikirwe Yohana 2:1-25
2 Ha kiro ekya kasatu hakabaho obugenyi obw’okuswera omu Kana eya Galiraaya, kandi nyina Yesu akaba aliyo.
2 Yesu hamu n’abegeswa be na bo bakaba baraaliziibwe ha bugenyi obu.
3 Amaarwa obu gakaba gali haihi kuhwaho, nyina Yesu yamugambira ati: “Tibaine amaarwa.”
4 Baitu Yesu yamugarukamu ati: “Mukazi, eki nyowe na iwe nikitukwatiraho nkaha? Obwire bwange tibukahikire.”
5 Nyina yagambira abo abarukuheereza ati: “Mukole kyona eki arabagambira kukora.”
6 Hakaba haroho ensoha mukaaga ez’amabaale ezaali zitairweho nk’oku kyali nikyetaagisibwa omu biragiro by’Abayudaaya, ebirukukwata ha kwezebwa, kandi buli emu ekaba n’esobora kwijuzibwa ebipimo* bibiri rundi bisatu.
7 Yesu yabagambira ati: “Ensoha muziijuze amaizi.” Baaziijuliza kimu kuhika ha migoma yazo.
8 Hanyuma yabagambira ati: “Mutaheho mutwarre mukuru w’obugenyi.” Baamutwarra.
9 Mukuru w’obugenyi obu yarolezeeho amaizi agakaba gafoirwe amaarwa, atarukumanya nambere garugire, (n’obukiraaba ngu abaheereza abaali batahire amaizi baali bakimanyire), mukuru w’obugenyi yayeta omuswezi
10 yamugambira ati: “Buli muntu weena abanza kuha abantu amaarwa amarungi, kandi obu bamara kutamiira aleeta agatali marungi. Obaire oyahwire amaarwa amarungi kuhikya na hati.”
11 Kinu Yesu akakikora omu Kana ya Galiraaya. Eki nikyo ekyamahano eki yabandize kukora, kandi yayoleka ekitiinisa kye, n’abegeswa be baamwikiririzaamu.
12 Hanyuma y’ebi, Yesu, nyina, bagenzi be, hamu n’abegeswa be baagenda Kaperenaumu, baitu bataikaleyo kumara ebiro bingi.
13 Okuhingurwaho kw’Abayudaaya obu kukaba kuli haihi kuhika, Yesu yagenda Yerusalemu.
14 Yasanga omu yekaru abantu abarukutunda ente, entaama, amaiba, hamu n’abo abarukuhingisa sente baikaliire omu ntebe zaabo.
15 Nubwo yakwata emiguha yagikoramu kibbooko, kandi yabingamu abo boona abakaba baine entaama hamu n’ente kuruga omu yekaru, kandi yaseesa hansi ebinusu by’abo abaali nibahingisa sente kandi yajuumika emeeza zaabo.
16 Kandi yagambira abo abakaba nibatunda amaiba ati: “Ebintu binu mubiihe hanu! Enju ya Isenyowe muleke kugifoora enju y’obusuubuzi.”
17 Abegeswa be baijuka nk’oku kyahandiikirwe ngu: “Okugonza okw’amaani okw’enju yaawe kulimmaraho.”
18 Hanyuma Abayudaaya baamukaguza bati: “Nk’oku oliyo nookora ebintu binu, kokurorraho ki akoosobora kutwoleka?”
19 Yesu yabagarukamu ati: “Museese hansi yekaru enu, kandi ndaagyombeka omu biro bisatu.”
20 Nubwo Abayudaaya baagamba bati: “Kikatwara emyaka 46 kwombeka yekaru enu, iwe nogyombeka omu biro bisatu?”
21 Baitu akaba naabazaaho yekaru ey’omubiri gwe.
22 Hanyuma obu yahumbwirwe kuruga omu bafu, abegeswa be baijuka ngu eki nikyo yakiraga kubaza, kandi bakaikiriza ekyahandiikirwe hamu n’eki Yesu eki yabalize.
23 Baitu obu akaba ali omu Yerusalemu ha bugenyi obw’Okuhingurwaho, abantu baingi bakaikiririza omu ibara lye, obu baarozere ebyamahano ebi akaba naakora.
24 Baitu Yesu atabemarreyo, habwokuba akaba abamanyire boona
25 kandi akaba atarukwetaaga omuntu weena kumugambira ebirukukwata ha muntu habwokuba akaba amanyire ebiri omu mutima gw’omuntu.
Obugambo Obuli Hansi
^ Nikizooka ngu buli kipimo kyali nikigiibwamu lita 22.
