Nk’Oku Yahandiikirwe Yohana 3:1-36
3 Hakaba haroho omusaija Omufalisaayo arukwetwa Nikodemu, kandi akaba ali mulemi w’Abayudaaya.
2 Omusaija onu akaija hali Yesu omu bwire bw’ekiro, yamugambira ati: “Rabbi, tukimanyire ngu oli mwegesa ayarugire hali Ruhanga, habwokuba busaho muntu weena ow’asobora kukora ebyamahano ebi orukukora rundi buli Ruhanga ali na uwe.”
3 Yesu yamugarukamu ati: “Mananu kwo ninkugambira nti, omuntu weena obu atazaarwa omurundi ogwakabiri, tasobora kurora Obukama bwa Ruhanga.”
4 Nikodemu yamukaguza ati: “Omuntu naasobora ata kuzaarwa omurundi ogwakabiri kandi kunu akuzire? Mali naasobora kutaaha omu nda ya nyina akazaarwa omurundi ogwakabiri?”
5 Yesu yamugarukamu ati: “Mananu kwo ninkugambira nti, omuntu obu atazaarwa kuruga omu maizi hamu n’omwoyo, tasobora kutaaha omu Bukama bwa Ruhanga.
6 Ekizaarwa omubiri guba mubiri, n’ekizaarwa omwoyo, guba mwoyo.
7 Otahunirra habwokuba nkugambiire nti: Bantu inywe musemeriire kuzaarwa omurundi ogwakabiri.
8 Omuyaga guteera nigugenda nambere gurukugonza kandi ohurra okuhirra kwagwo, baitu tomanya nambere gurukuruga rundi nambere gurukugenda. Nukwo kiba kiti obukirukuhika ha muntu weena ow’azaarwa omwoyo.”
9 Nikodemu yamugarukamu ati: “Ebintu binu nibisoboka bita?”
10 Yesu yamugarukamu ati: “Oli mwegesa omu Isaleri kandi kunu tomanyire ebintu ebi?”
11 Mananu kwo ninkugambira nti, ebi tumanyire tubibaza, kandi n’ebi tuboine tubiheera obwakaiso, baitu inywe timwikiriza obwakaiso obu turukuha.
12 Obu ndaaba mbagambiire ebintu eby’omu nsi kandi timwaikiriza, muraikiriza muta obu ndabagambira ebintu eby’omu iguru?
13 Busaho muntu aratembere omu iguru, oihireho ogu ayasirimukire kuruga omu iguru, nuwe Omwana w’omuntu.
14 Kandi nk’oku Musa yahanikire enjoka omu irungu, n’Omwana w’omuntu nukwo asemeriire kuhanikwa ati,
15 nukwo buli omu weena arukumwikiririzaamu asobole kutunga obwomeezi obutahwaho.
16 “Habwokuba Ruhanga akagonza muno ensi, yahayo Omwana we ayazairwe omu wenka, nukwo ogu weena arukumwikiririzaamu atahwerekerezebwa baitu atunge obwomeezi obutahwaho.
17 Ruhanga atatume Omwana we omu nsi kugicwera omusango, baitu akamutuma nukwo ensi esobole kujunwa kuraba omuli uwe.
18 Ogu weena arukumwikiririzaamu tacwerwa musango. Baitu ogu weena atarukumwikiririzaamu amazire ira kucwerwa omusango, habwokuba taikiririize omu Mwana wa Ruhanga, ayazairwe omu wenka.
19 Kucwerwa omusango nikisigikirra hali kinu: ekyererezi kiizire omu nsi baitu abantu bagondeze omwirima omu kiikaro ky’ekyererezi, habwokuba ebikorwa byabo bikaba biri bibi muno.
20 Habwokuba ogu weena ow’akora ebintu ebibi, anoba ekyererezi kandi taija omu kyererezi, nukwo ebikorwa bye bitamanywa.
21 Baitu ogu weena ow’akora eby’amananu, aija omu kyererezi nukwo ebikorwa bye birorwe habwokuba bikozerwe kuhikaana n’ebi Ruhanga agonza.
22 Hanyuma y’ebi, Yesu n’abegeswa be baagenda omu kyaro kya Buyudaaya, oku yamarayo na bo obwire kandi akaba naabatiza.
23 Baitu Yohana na uwe akaba naabatiza omu Ayinoni ekiri haihi na Salimu, habwokuba oku hakaba haliyo amaizi maingi, kandi abantu bakaikara nibaija kandi nibabatizibwa;
24 habwokuba Yohana akaba atakatairwe omu nkomo.
25 Nubwo abegeswa ba Yohana baateera n’Abayudaaya empaka ezirukukwata ha kwezebwa.
26 Bakaija hali Yohana baamugambira bati: “Rabbi, omusaija ow’okaba oli na uwe nseeri ya Yorudaani ou waheeriire obwakaiso, dora na uwe aliyo naabatiza, kandi boona nibagenda nambere ali.”
27 Yohana yabagarukamu ati: “Omuntu tasobora kutunga ekintu kyona rundi buli akihairwe kuruga omu iguru.
28 Inywe inywenka nimumpeera obwakaiso nk’oku nagambire nti, ‘Tindi Kristo, baitu ntumirwe kumwebembera.’
29 Ogu weena ow’aine omugole nuwe omuswezi, baitu munywani w’omuswezi obu ayemerra, akamuhurra, asemererwa muno habw’okuhurra iraka ly’omuswezi. Nahabweki nyijwire okusemererwa.*
30 Ogu asemeriire kwikara naayeyongera baitu nyowe nsemeriire kwikara ninkeeha.”
31 Ogu ow’arukuruga haiguru, naakira abandi boona. Ogu ow’arukuruga omu nsi, w’omu nsi kandi abaza ebintu eby’omu nsi. Ogu ow’arukuruga omu iguru naakira abandi boona.
32 Aha obwakaiso obw’ebintu ebi yarozere n’ebi yahuliire, baitu abantu tibaikiriza obwakaiso bwe.
33 Ogu weena anyakwikiriize obwakaiso bwe, aba akigumize* ngu Ruhanga w’amananu.
34 Ogu anyakusindikirwe Ruhanga abaza ebigambo bya Ruhanga, habwokuba Ruhanga agaba omwoyo gwe omu bwingi.
35 Ise mwana naagonza Omwana kandi amukwasize ebintu byona omu mikono ye.
36 Ogu weena anyakwikiririza omu Mwana aine obwomeezi obutahwaho; kandi ogu anyakujemeera Omwana talirora obwomeezi, baitu ekiniga kya Ruhanga kiikara hali uwe.
Obugambo Obuli Hansi
^ Nk’oku kiri, “Nahabweki okusemererwa kwange kuhikiriire.”
^ Nk’oku kiri, “aba ataireho emanyikirizo.”
