Nk’Oku Yahandiikirwe Yohana 7:1-52
7 Hanyuma y’ebi, Yesu yaikara omu Galiraaya, akaba atarukugonza kugenda Buyudaaya habwokuba Abayudaaya bakaba nibagonza kumwita.
2 Baitu Obugenyi bw’Abayudaaya obw’Obusiisira* bukaba bwiriire haihi.
3 Nubwo bagenzi be baamugambira bati: “Ruga hanu ogende Buyudaaya, nukwo abegeswa baawe na bo barole ebi orukukora.
4 Habwokuba busaho omuntu akora ekintu kyona omu nsita, obu aba naagonza kumanywa abantu. Obu oraaba nookora ebintu binu, weyoleke hali ensi.”
5 Bagenzi be, bakaba batarukumwikiririzaamu.
6 Yesu yabagambira ati: “Akasumi kange tikakahikire baitu inywe obwire bwanyu bwikaraho.
7 Tiharoho ensonga yoona esobora kuleetera ensi kubanoba, nyowe ennoba habwokuba mbazaaho ebikorwa byayo ebibi.
8 Inywe mugende ha bugenyi; nyowe tinkabaire kugenda ha bugenyi habwokuba akasumi kange tikakahikire.”
9 Hanyuma y’okubagambira ebi, yaikara omu Galiraaya.
10 Bagenzi be obu bakaba bamazire kugenda ha bugenyi, na uwe yagendayo baitu omu nsita.
11 Hanyuma, Abayudaaya baatandika kumuserra ha bugenyi nibagamba bati: “Omusaija ogu ali nkaha?”
12 Kandi haabaho okubalizangana ebihwa kwingi omu bantu abakaba bali omu kitebe. Abamu bakaba nibagamba bati: “Muntu murungi.” Kandi abandi nibagamba bati: “Nangwa, aliyo naahabisa ebitebe by’abantu.”
13 Baitu busaho n’omu akaba naasobora kumubazaaho omu rwijwire habw’okutiina Abayudaaya.
14 Obugenyi obu bukaba buhikire hagati, Yesu yagenda omu yekaru, yatandika kwegesa.
15 Kandi Abayudaaya baahunirra nibagamba bati: “Omusaija onu akamanya ata kurungi Ebyahandiikirwe kandi kunu ategesebwe omu masomero g’ediini?”
16 Yesu yabagarukamu ati: “Ebi ndukwegesa tibiri byange, baitu by’Ogu ayantumire.
17 Ogu weena arukugonza kukora Ruhanga ebi agonza, naija kumanya ebi ndukwegesa obu biraaba nibiruga hali Ruhanga rundi ebi ndukubaza obu biraaba byange habwange.
18 Ogu weena anyakwegesa ebye habwe aba naayeserurra ekitiinisa; baitu anyakuserra ekitiinisa ekiruga hali Ogu ayamutumire, ogu nuwe ow’amananu kandi omuli uwe tiharumu okutahikirra kwona.
19 Ebiragiro mutabiheebwe Musa? Baitu busaho n’omu hali inywe arukworobera Ebiragiro. Habwaki nimugonza kunyita?”
20 Abantu baamugarukamu bati: “Oroho daimooni. Nooha arukugonza kukwita?”
21 Yesu yabagarukamu ati: “Nkakora ekintu kimu, inywena mwahunirra.
22 Enu niyo ensonga habwaki Musa yabahaire ekiragiro eky’okusarwa—tikiri ngu nikiruga hali Musa, baitu kikaruga hali baisenkuruitwe—kandi musara omusaija ha kiro kya sabbiti.
23 Obu muraaba musara omusaija ha kiro kya sabbiti nukwo mutacwa Ebiragiro bya Musa, habwaki nimumbiihirirwa muno habw’okukiza omuntu ha sabbiti?
24 Muleke kucwa omusango nimusigikirra ha nzooka eya haruguru, baitu mucwe omusango omu kuhikirra.”
25 Nubwo bamu h’abaikazi ab’omu Yerusalemu baatandika kugamba bati: “Onu tinuwe musaija ou baliyo nibaserra kwita?
26 Kandi dora! aliyo naabaza omu rwijwire rw’abantu, kandi tibaine eki barukumubazaaho. Nikisoboka kuba ngu abalemi bakimanyire ngu nuwe Kristo?
27 Baitu nabwo tumanyire omusaija onu nambere arukuruga; baitu Kristo obu aliija, busaho n’omu alimanya nambere arukuruga.”
28 Hanyuma Yesu obu akaba naayegesa omu yekaru, yatokera haiguru naagamba ati: “Mummanyire kandi mumanyire nambere nduga. Kandi tinyizire habwange nyenka, baitu Ogu ayantumire aroho kwo kandi timumumanyire.
29 Nyowe mmumanyire habwokuba nkaruga hali uwe naija kumukikirra kandi Ogu nuwe ayantumire.”
30 Nubwo baatandika kuserra omulingo baramukwata, baitu busaho ayamukwasire habwokuba obwire bwe bukaba butakahikire.
31 Baitu nabwo abantu baingi bakamwikiririzaamu kandi bakaba nibagamba bati: “Kristo obu aliija, mali alikora ebyamahano ebirukukira omusaija onu ebi akozere?”
32 Abafalisaayo baahurra abantu nibagambirangana ebintu ebi ebirukumukwataho omu bihwa, nubwo banyakatagara n’Abafalisaayo baasindika abaserikale kumukwata.
33 Nubwo Yesu yabagambira ati: “Ndi na inywe habw’akasumi kake ntakagarukire hali Ogu ayantumire.
34 Mulinserra baitu timulinzoora, kandi nambere ndukugenda timusobora kwijayo.”
35 Nahabweki, Abayudaaya baagambirangana bati: “Omusaija ogu naagonza kugenda nkaha, nambere tutasobora kumuzoora? Naagonza kugenda omu Bayudaaya abaararangiire omu Buyonaani nukwo ayegese Abayonaani?
36 Hati amanyisize ki obu agambire ngu, ‘Nimwija kunserra, baitu timulinzoora, kandi ngu nambere ndukugenda timusobora kwijayo’?”
37 Ha kiro eky’okumalirra eky’obugenyi, kandi eki nikyo ekiro ekirukukirayo obukuru, Yesu akemerra yatokera haiguru naagamba ati: “Omuntu weena anyakwine iroho, aije nambere ndi anywe amaizi.
38 Ogu weena anyakunyikiririzaamu nk’oku kyahandiikirwe kiti: ‘Kuruga omu nda omuli uwe haligera ebyambu eby’amaizi ag’obwomeezi.’”
39 Baitu akabazaaho ebi naamanyisa omwoyo, abo abarukumwikiririzaamu ogu bakaba bali haihi kutunga; omu kasumi ako bakaba batakatungire omwoyo, habwokuba Yesu akaba atakanyumiziibwe.
40 Bamu hali abo abakaba bali omu kitebe ky’abantu, baatandika kugamba bati: “Mali onu Nabbi.”
41 Abandi bakaba nibagamba bati: “Onu nuwe Kristo.” Baitu abamu bakaba nibagamba bati: “Kristo w’okuruga Galiraaya?
42 Ebyahandiikirwe tibigamba ngu Kristo w’okuruga omu baijukuru ba Daudi, kandi omu Beterehemu, ekyaro nambere Daudi yaikaire?”
43 Nahabweki ekitebe ky’abantu baayebaganizaamu habwe.
44 Abamu bakagonza kumukwata, baitu busaho n’omu ayamukwasireho.
45 Hanyuma abaserikale baagaruka hali banyakatagara abakuru n’Abafalisaayo kandi baakaguza abaserikale banu bati: “Habwaki mutamulesere hanu?”
46 Nubwo Abaserikale baabagarukamu bati: “Busaho muntu ayakabazaaga omu mulingo ogu.”
47 Abafalisaayo baabakaguza bati: “Na inywe muhabisiibwe?
48 Haroho n’omu h’abalemi rundi Abafalisaayo arukumwikiririzaamu?
49 Baitu ekitebe ky’abantu banu abatamanyire Ebiragiro bakakyenwa.”
50 Nikodemu ow’akaba asangirwe aizire hali Yesu kandi ow’akaba ali omu hali bo, yabakaguza ati:
51 “Ebiragiro byaitu biikiriza kucwera omuntu omusango atakabandize kwetonganaho n’okumanya eki akozere?”
52 Baamugarukamu bati: “Na iwe toruga Galiraaya? Seruliiriza orole, noija kukizoora ngu busaho nabbi weena asemeriire kuruga Galiraaya.”
Obugambo Obuli Hansi
^ Rora, Kusoborra Ebigambo. “Obugenyi obw’Obusiisira.”
