Nk’Oku Yahandiikirwe Yohana 8:12-59
8 12 Nubwo Yesu yayongera yabagambira ati: “Ninyowe kyererezi ky’ensi. Ogu weena ow’ampondera talirubatira omu mwirima, baitu alitunga ekyererezi eky’obwomeezi.”
13 Abafalisaayo baamugambira bati: “Iwe oyeheera obwakaiso, baitu obwakaiso bwawe tibuli bw’amananu.”
14 Yesu yabagarukamu ati: “N’obu kiraaba ngu ninyeheera obwakaiso, obwakaiso bwange bw’amananu habwokuba nimmanya nambere narugire kandi nambere ndukugenda. Baitu timumanyire nambere narugire kandi nambere ndukugenda.
15 Mucwa omusango nimusigikirra ha nzooka y’omuntu; baitu nyowe tincwera muntu weena omusango.
16 Kandi n’obu naakucwa omusango, ngucwa omu mananu habwokuba tindi nyenka baitu ndi hamu na Isenyowe ayantumire.
17 Ekindi, omu Biragiro byanyu kikahandiikwa kiti: ‘Obwakaiso obw’abantu babiri bw’amananu.’
18 Ninyowe ayeheera obwakaiso oburukunkwataho kandi na Isenyowe ayantumire ampeera obwakaiso.”
19 Nubwo baamukaguza bati: “So ali nkaha?” Yesu yabagarukamu ati: “Timummanyire kandi na Isenyowe timumumanyire. Kakuba mubaire mummanyire, na Isenyowe mwakubaire mumumanyire.”
20 Akabaza ebigambo ebi naayegesa omu yekaru ali omu kiikaro nambere obusanduuko bwa sente bwateekwaga. Baitu busaho n’omu ayamukwasire habwokuba obwire bwe bukaba butakahikire.
21 Yayongera yabagambira ati: “Ningenda, kandi nimwija kunserra, baitu nimwija kufeera omu bibi byanyu. Nambere ndukugenda timusobora kwijayo.”
22 Abayudaaya baatandika kugamba bati: “Onu naagenda kweyita? Habwokuba naagamba ati, ‘Nambere ndukugenda timusobora kwijayo.’”
23 Yagumizaamu naabagambira ati: “Inywe muruga hansi baitu nyowe nduga haiguru. Inywe nimuruga omu nsi enu, baitu nyowe tindi w’omu nsi enu.
24 Enu niyo ensonga habwaki mbagambiire nti: Mulifeera omu bibi byanyu. Obu muraaba mutarukwikiriza ngu ninyowe ogu, nimwija kufeera omu bibi byanyu.”
25 Nubwo baatandika kumukaguza bati: “Niiwe oha?” Yesu yabagarukamu ati: “Baitu habwaki nimbaza na inywe?
26 Habwokuba nyine bingi eby’okubabazaaho, n’ensonga nyingi ez’okusigikirraho kucwa omusango. Ky’amananu ngu Ogu ayantumire w’amananu, kandi ebintu byonyini ebi nahuliire kuruga hali uwe nibyo mbaza omu nsi.”
27 Baitu bateetegereze ngu akaba naabazaaho Ise.
28 Nubwo Yesu yagamba ati: “Obu mulimara kuhanika Omwana w’omuntu, nubwo mulimanya ngu ninyowe ogu kandi nk’oku ntakora ekintu kyona habwange nyenka, baitu ebintu binu mbibaza nk’oku Isenyowe yanyegeseze.
29 Kandi ayantumire ali hamu na nyowe, atandekeho habwokuba nyikara ninkora ebintu ebirukumusemeza.”
30 Obu akaba naabaza ebintu binu, baingi baamwikiririzaamu.
31 Nubwo Yesu yagambira Abayudaaya abamwikiririzeemu ati: “Obu muraikara omu kigambo kyange, nubwo murukwija kuba begeswa bange mali,
32 nimwija kumanya amananu, kandi amananu galibafoora b’obugabe.”
33 Baamugambira bati: “Tuli baijukuru ba Iburahimu kandi titukabahoga bairu b’omuntu weena. Habwaki n’ogamba ngu, ‘Mulifooka b’obugabe’?”
34 Yesu yabagarukamu ati: “Mananu kwo nimbagambira nti, weena anyakukora ekibi, aba mwiru w’ekibi.
35 Ekindi, omwiru taikara omuka ebiro n’ebiro; baitu omwana aikaramu ebiro n’ebiro.
36 Nahabweki, Omwana obu araaba abafoire b’obugabe nimwija kuba b’obugabe mali.
37 Nkimanyire ngu muli baijukuru ba Iburahimu. Baitu nimugonza kunyita habwokuba timwikiriza ebi ndukwegesa.
38 Nyowe mbaza ebintu ebi narozere obu nkaba ndi na Isenyowe, baitu inywe mukora ebintu ebi muhuliire kuruga hali isiinywe.”
39 Baamugarukamu bati: “Iburahimu nuwe isiitwe.” Yesu yabagambira ati: “Kakuba mubaire muli baana ba Iburahimu, mwakubaire nimukora Iburahimu ebi yakoraga.
40 Baitu hati inywe nimugonza kunyita, nyowe anyakubagambiire amananu aganahuliire kuruga hali Ruhanga. Iburahimu eki atakikole.
41 Nimukora ebikorwa bya isiinywe.” Baamugambira bati: “Tutazaalirwe omu busiihani; twine Isiitwe omu, Ruhanga.”
42 Yesu yabagambira ati: “Kakuba Ruhanga nuwe abaire Isiinywe, mwakungondeze, habwokuba nkaruga hali Ruhanga kandi ndi hanu. Ntaije habwange nyenka baitu Ogu nuwe yantumire.
43 Habwaki mutarukwetegereza ebi ndukugamba? Habwokuba timurukuhuliiriza ebigambo byange.
44 Muruga hali isiinywe Sitaani* kandi mugonza kukora isiinywe ebi agonza. Ogu akaba ali mwisi kuruga ha kubanza, kandi ataikale omu mananu habwokuba amananu tigali omuli uwe. Obu abaza ebisuba, ayoleka kiki kyonyini eki ali, habwokuba mubiihi w’ebisuba kandi nuwe ise ebisuba.
45 Baitu habwokuba nyowe nimbagambira amananu, timurukunyikiriza.
46 Nooha omuli inywe arukunjunaana ekibi? Obu ndaaba nimbaza amananu, hati habwaki mutarukwikiriza ebi ndukugamba?
47 Ogu arukuruga hali Ruhanga ahuliiriza Ruhanga ebi agamba. Egi niyo ensonga habwaki mutarukuhuliiriza, habwokuba timurukuruga hali Ruhanga.”
48 Abayudaaya baamugarukamu bati: “Tituhikire kugamba ngu, ‘Oli Musamaliya* kandi oroho daimooni’?”
49 Yesu yabagarukamu ati: “Tindoho daimooni, baitu nintamu Isenyowe ekitiinisa, kandi inywe timurukuntamu ekitiinisa.
50 Nyowe tinkweserurra ekitiinisa; haroho Omu arukukiserra kandi acwa omusango.
51 Mananu kwo nimbagambira nti, ogu weena ow’ayorobera ekigambo kyange, talifa naakake.”
52 Abayudaaya baamugambira bati: “Hati twakigumya kwo ngu oroho daimooni. Iburahimu akafa kandi na banabbi baafa, baitu iwe noogamba oti, ‘Ogu weena ow’ayorobera ekigambo kyange talifa naakake.’
53 Iwe n’okira isiitwe Iburahimu ayafiire? Na banabbi na bo bakafa. Iwe noyeyeta oha?”
54 Yesu yabagarukamu ati: “Obu ndayenyumiza nyenka, okwenyumiza kwange nikuba kwa busa. Isenyowe ou murukugamba ngu nuwe Ruhanga wanyu, nuwe anyumiza.
55 Kandi timumumanyire baitu nyowe mmumanyire. Kakuba ngamba ngu timmumanyire, nimba nasisana na inywe ababiihi b’ebisuba. Baitu nyowe mmumanyire kandi nyorobera ekigambo kye.
56 Isiinywe Iburahimu akasemererwa habwokuba n’okunihira okw’okurora ekiro kyange, kandi akakirora yasemererwa.”
57 Nubwo Abayudaaya baamukaguza bati: “Tokahikize n’emyaka 50, hati nikisoboka kita ngu okarora Iburahimu?”
58 Yesu yabagarukamu ati: “Mananu kwo nimbagambira nti, Iburahimu atakabaireho nyowe nkaba ndoho.”
59 Nahabweki, baakoma amabaale kugamuteera, baitu Yesu yayesereka kandi yaruga omu yekaru.
Obugambo Obuli Hansi
^ “Omu Ruyonaani, diabolos, ekirukumanyisa ‘omuhangirizi.’”
^ Rora, Kusoborra Ebigambo. “Abasamaliya.”
