Ebiikaro bingi omu nsi byeyongiire kwokya kandi kinu kiresereho ebizibu ebindi bingi. Wetegereze ripooti ezolekerwe hansi:

•   “Okwezi kunu okwa mukaaga nukwo kukyakizireyo kwokya kuruga abantu batandika kupima obutagasi nk’emyaka 174 enyuma.”—National Oceanic and Atmospheric Administration, U.S. Department of Commerce, Julaayi 13, 2023.

•   “Omu ihanga lya Italy, Spain, France, Germany na Poland ekirro kyeyongiire kandi nikinihirwa ngu ha kizinga Sicily na Sardinia obutagasi nibwija kweyongera kuhikira kimu obucweka 48°C [118°F]. Kandi bunu nubwo butagasi oburukukirayo omu byafaayo omu Bulaaya.”—European Space Agency, Julaayi 13, 2023.

•   “Nk’oku ensi eyeyongiire kwokya, nitunihira enjura ey’amaani kugwa muno, ekirukwija kuleetaho kusandaara kw’amaizi omu biikaro bingi.”—Stefan Uhlenbrook, director of hydrology, water and cryosphere at the World Meteorological Organization, Julaayi 17, 2023.

 Ripooti zinu ezirukwoleka kweyongera kw’obutagasi omu nsi nizikweraliikiriza? Wetegereze Baibuli eky’egamba ha nsonga enu enkuru.

 Ego. Ensi kweyongera kwokya n’ebigwererezi ebiretwaho empindahinduka y’obwire, biine akakwate n’ebintu Baibuli yarangire ngu biribaho omu kasumi kanu. Ekyokurorraho, Yesu akaranga ngu twakurozere ‘ebirukukanga,’ rundi “ebirukutiinisa.” (Luka 21:11; Good News Translation) Ekirro ekirukweyongera omu nsi yoona, kiretiire abantu baingi kutiina ngu ensi niija kuhwerekerra.

 Nangwa. Ruhanga akahanga ensi abantu bagiikalemu ebiro n’ebiro. (Zabuli 115:16; Omugambizi 1:4) Talireka abantu kugihwerekereza, oihireho n’araganiza ngu naija ‘kuhwerekereza abo abahwerekereza ensi.’—Okusuku’rwa 11:18.

 Baibuli eyoleka ngu Ruhanga naija kulinda ensi nukwo etahikwaho akabi akasobora kuleetwaho empindahinduka y’obwire.

•   “[Ruhanga] ayanura ihunga, nukwo ebigonzi byalyo biculera.” (Zabuli 107:29) Ruhanga aine amaani ag’okulema amaani g’obuhangwa. N’asobora kumaraho ebizibu ebireserweho empindahinduka y’obwire ebirukuleetera abantu kubonabona habw’ensi kweyongera kwokya.

•   “[Orolerra kurungi] ensi, noginagira enjura, ogitungisa itungo lingi.” (Zabuli 65:9) Ruhanga naija kuha ensi omugisa kandi agifoole orugonjo orurungi.

 Kumanya ebirukukiraho ha murago gwa Baibuli ogw’okugarra buhyaka eby’obuhangwa, rora ekicweka “Nooha Alijuna Ensi?”