Omu nsi yoona, abantu baingi nibagonza kutwaza obwomeezi bwabo omu mulingo ogw’okutalya ebisoro, ebinyonyi, ebihuka, n’ebintu byona ebibirugamu rundi ekyetwa omu Rungereeza Vegan Lifestyle.

•   “Abantu abaine enteekereza enu bakora kyona ekibarukusobora kwetantara emiringo yoona ey’okukozesa ebisoro, kubibonabonesa, kubirya, kubiihamu ebintu ebindi nk’engoye rundi kubikozesa omu miringo endi.”—Kusigikirra ha The Vegan Society.

 Kwongerra ha mulingo batwazaamu ebisoro, abantu abamu bakurakuraniza enteekereza enu habw’okugonza kulinda obuhangwa, obwomeezi bwabo, rundi nsonga ez’ediini.

•   “Kwahukanaho n’abantu abacwamu kulya ebyokulya eby’ekiriisa, abantu ab’enteekereza enu ubo bakitwara nk’enyikiriza rundi engeso eibakurakuraniza n’ekigendererwa ky’okufoora ensi ekiikaro ekirungi.”—Kusigikirra ha kitabu Britannica Academic.

 Enteekereza enu niyo erasobozesa ensi kuba nungi omu kasumi ak’omu maiso? Baibuli ekibazaaho ki?

 Baibuli eyoleka ngu Omuhangi waitu, Yahwe Ruhanga, a arora abantu nk’ab’omuhendo muno kukira ebisoro kandi abahaire obusobozi obw’okubirema. (Okubanza 1:27, 28) Hanyuma, Ruhanga akaikiriza abantu kulya ebisoro. (Okubanza 9:3) Baitu nabwo, taikiriza abantu kubibonabonesa.—Enfumo 12:10.

 Kusigikirra ha Baibuli, kulya enyama eri ncwamu ya buli muntu. b Encwamu eitukora teri niyo etufoora bantu abarungi omu maiso ga Ruhanga. (1 Abakolinso 8:8) Busaho muntu ow’asemeriire kujumirra encwamu y’omuntu ondi obukirukuhika ha byokulya.—Abarumi 14:3.

 Baibuli n’eyoleka ngu omulingo tucwamu kutwaza obwomeezi bwaitu tigurukwija kumaraho ebizibu omu nsi. Ebizibu ebirukukira obwingi biretwaho eby’obulemi, enyetwaza y’abantu hamu n’eby’entaahya, kandi abantu tibasobora kubimaraho. Baibuli egamba ngu:

•   “Eki ekinyakuramaire tikisobora okugororwa.”—Omugambizi 1:15.

 Omuhangi waitu nuwe arukwija kumaraho ebizibu ebiturabamu. Baibuli ekozesa orulimi orw’akokurorraho kusoborra ekyalikora.

•   “Nkarora iguru erihyaka nensi empyaka: baitu iguru eryokubanza nensi eyokubanza bihoireho; nenyanja tekiroho.”—Okusuku’rwa 21:1.

 Omu kiikaro kya gavumenti z’abantu, rundi “iguru eryokubanza,” Ruhanga naija kugarramu “iguru erihyaka,” kandi egi niyo gavumenti y’Obukama bwe obw’omu iguru. Obukama bwe nibwija kwihaho “ensi eyokubanza,” rundi abantu ababi, kandi nibwija kulema “ensi empyaka,” rundi abo aborobera obusobozi bw’Obukama.

 Omu Bulemi bw’Obukama bwa Ruhanga honka nuho abantu barukwija kwega omulingo gw’okwikara omu bumu n’ebisoro hamu n’ebintu ebibetoroire.—Isaya 11:6-9.