Orukurato rw’Amahanga Ageteraine (COP27) orurukubazaaho empindahinduka y’obwire rukahwa Sande, Novemba 20, 2022. N’obukiraaba ngu hakakorwa endagaano ey’okukonyera amahanga agatarukwesobora nukwo gasobole kwetekaniriza ebigwererezi, baingi bakakyetegereza ngu tibarukusobora kumaraho ebizibu ebireetwa empindahinduka y’obwire.

•   Omu Novemba 19, 2022, António Guterres anyakuli muhandiiki w’ekitebe eky’Amahanga Ageteraine akagamba ati: “Kinsemiize ngu tukozere encwamu enu ey’okwahura sente ezisobora kukonyera abahikirweho ebigwererezi. Baitu tukimanyire ngu kinu kyonka tikirukumara . . . Ensi yaitu esiisikaire muno kandi niija kuhika harulengo ngu busaho asobora kwongera kugisemeza.”

•   “Nikisobora kuba ngu ensi eri haihi kuhikwaho empindahinduka y’obwire ey’erukwija kurugirramu buli omu akabi.”—Mary Robinson, ow’akaba ali mwebembezi w’ihanga lya Ireland kandi akakoraho nka UN High Commissioner for Human Rights, Novemba 20, 2022.

 Ensinganto nizo zikyakizireyo kweralikirra ha busumi obw’omumaiso obw’ensi yaitu. Baitu amahanga nigasobora kuhikiiriza ekigeragire obukirukuhika ha kugira ekigaakoraho kuhindura empindahinduka y’obwire? Baibuli ekibazaaho ki?

 Baibuli eyoleka ngu gavumenti z’abantu n’obuziralengaho kumaraho ebizibu ebireetwa empindahinduka y’obwire, tizirukwija kubimarraho kimu. Wetegereze ensonga ibiri habwaki:

•   “Ekinyakuramaire tikisobora okugurorwa.”—Omugambizi 1:15.

   Eki nikimanyisa ngu: Gavumenti tizirukusobora kukora byona ebizigonza habwokuba abantu batahangwe kwerema. (Yeremiya 10:23) Amahanga n’obugakukwataniza hamu tigasobora kumaraho ebizibu ebiri omu nsi n’obugaralengaho gata.

•   “Abantu baliba abegonza bonka, nabagonza erupiya, . . . nabataterana hamu.”—2 Timoseo 3:2, 3.

   Eki nikimanyisa ngu: Baibuli ekaranga ngu abantu baingi omu kasumi akaturumu baakubaire abarukwegondeza bonka kandi abatarukugonza kukwataniza.

 Obusumi bw’ensi obw’omumaiso tiburukusigikirra ha gavumenti z’abantu. Ruhanga ataireho Yesu Kristo Omulemi arukukira boona kandi Baibuli emubazaaho eti:

•   “Obulemi buliba ha mabegage: nibaralye liriba Wamahano, Muhanuzi, Ruhanga Wobusobozi, Isitwe Atahwaho, Mukuru Wobusinge.”—Isaya 9:6.

 Yesu nuwe Mukama w’Obukama bwa Ruhanga rundi gavumenti ey’omu iguru. (Matayo 6:10) Aine amaani, amagezi, kandi n’agonza kurolerra ensi yaitu n’abantu abagirumu. (Zabuli 72:12, 16) Hansi y’obulemi bwe, gavumenti ey’omu iguru erihwerekereza “abo abahwerekereza ensi,” kandi erigarra ensi buhyaka.—Okusuku’rwa 11:18; Isaya 35:1, 7.

 Kumanya ebirukukiraho ha kirakonyera kumaraho ebizibu ebireswereho empindahinduka y’obwire, soma ekicweka “Empindahinduka y’Obwire n’Obusumi Bwaitu obw’Omu Maiso—Baibuli eky’Egamba.”