Omu Mizaano eya Summer Olympics ey’omwaka 2024, nikiteberezebwa ngu obuhumbi butaano bw’abantu nibaija kurora abantu abarayejumbira omu mizaano enu abarukuruga omu mahanga 206. Thomas Bach anyakuli Purezidenti wa International Olympic Committee akagamba ngu: “Leka tuteekemu ekitiinisa ekitekerezo ekikurakuranizibwa emizaano eya Olympics ekirukugamba ngu abantu boona basemeriire kwikara omu businge kandi babe omu bumu n’obu baraaba batarukusisana.”

 Emizaano eya Olympics n’esobora kuhikiriza ebigendererwa binu ebirungi? Haroho okunihira kwona ngu halibaho obusinge n’obumu?

 Emizaano eya Olympics ey’omwaka gunu tegarukiire ha by’emizaano kyonka. Emizaano etaire omutima ha nsonga ez’abantu n’ez’eby’obulemi ezibaganizaamu abantu. Ensonga zinu nizitwarramu obugabe bw’abantu, kusoroora omu rangi, kusoroora omu by’ediini, hamu n’obutainganaingana.

 Emizaano ey’ensi yoona nk’eya Olympics esemeza abantu. Baitu nabwo, emizaano enu eyoleka kandi ekurakuraniza omutima n’ebikorwa eby’okwebaganizaamu omu kiikaro ky’okuleeta obusinge n’obumu eby’orutekerro.

 Baibuli ekaranga engeso ezakugumanganiize abantu omu nsi yoona kuba omu bumu. (2 Timoseo 3:1-5) Kusobora kumanya ebirukukiraho ha bunabbi bunu, soma ekicweka “Baibuli Ekaranga Omulingo Abantu Batekereza Kandi Betwaza Kasumi Kanu?”

 Omu Baibuli harumu okunihira kwonyini okw’obusinge n’obumu omu nsi yoona. Neraganiza ngu abantu boona omu nsi nibaija kuba omu bumu hansi ya gavumenti ey’omu iguru ey’erukwetwa ‘Obukama bwa Ruhanga.’—Luka 4:43; Matayo 6:10.

 Omukama w’Obukama obu kandi ogu nuwe Yesu Kristo, naija kuleetaho obusinge omu nsi yoona. Baibuli egamba eti:

•   “Abahikiriire balibona omugisa; nobusinge bwingi.”—Zabuli 72:7.

•   “Alijuna omunaku obwakunga; . . . Alicungura obwomezi bwabu omu kwenderezebwa nitima.”—Zabuli 72:12, 14.

 N’omu kasumi kanu, enyegesa za Yesu ziteraniize hamu obukaikuru bw’abantu kuruga omu mahanga 239. Nk’Abakristaayo, Abakaiso ba Yahwe omu nsi yoona beegere kuba abantu ab’obusinge. Kusobora kumanya omulingo kinu kisobokere, soma magaziiini eya Omunaara gw’Omulinzi ey’ine omutwe “Omulingo Tusobora Kusingura Enobi.”