Omu 2022, gavumenti omu nsi yoona zikakozesa doola obusiriira 2.24 obwa sente kusagika amahe ekintu ekitakabahoga omu byafaayo. Kinu kiri kiti habwa Russia kutahirra ihanga lya Ukraine. Okuseruliiriza kunu kukakorwa ekitongole ekya Stockholm International Peace Research Institute (SIPRI) omu mwaka 2022 kandi kyaturukya ripooti egi omu Apuli 2023:

•   Sente ezakozesiibwe kusagika eby’amahe omu Bulaaya zikeyongera obucweka 13 hali 100 omu mwaka ogu 2022 kandi kinu kyagufoora omuhendo gwa sente ogukyakizireyo kuturukibwa gavumenti eza Bulaaya kuruga omu bulemu obwabaireho omu 1991.”

•   “Russia n’eteberezebwa kuba yayongiire ha nturukya yayo, obucweka 9.2 hali 100, ekyagiihire omu kiikaro ekyakatano yafooka ihanga eryakasatu erikyakizireyo kuturukya sente omu nsi yoona.”

•   Ihanga erya Amerika niryo likyakizireyo kuturukya sente nyingi kusagika eby’amahe, habwokuba likaturukya sente ezirukuhika “obucweka 39 hali 100 kusagika eby’amahe.”

 Dr. Nan Tian, omumyoka w’ekitongole ekya SIPRI repooti, akagamba ati: “Okweyongera kw’enturukya ya sente kusagika eby’amahe omu nsi yoona omu myaka ey’enyumaho, kali kokurorraho akarukwoleka ngu tuli omu nsi ey’erukweyongera kutabamu obulinzi.”

 Baibuli ekaranga okweyongera kw’okusika omuguha hagati y’amahanga kirimaani omu kasumi kanu kandi etugambira n’ekintu kyonka ekisobora kutuletera obusinge bwonyini.

•   Baibuli eyeta ebiro ebiturumu ‘akasumi akahanyuma.’—Danieri 8:19.

•   Ekitabu kya Danieri kikaranga ngu omu akasumi ako, hakubaireho amahanga kirimaani ‘agarukuhakanizangana.’ Amahanga kirimaani ‘gakusindikirengana’ rundi kwoleka ngu nigakirangana. Okusindikangana kunu omu by’amahe kwakutwaliiremu kuturukya “ebyomuhendo,” bingi muno rundi sente nyingi.—Danieri 11:40, 42, 43.

 Kumanya ebirukukiraho ebirukukwata ha bunabbi bunu oburukusikiriza, rora vidiyo Fulfilled Prophecy—Daniel Chapter 11.

•   Baibuli egamba ngu Ruhanga naija kwihaho gavumenti ez’abantu. “Alimukya obukama, obutalihwerekerezebwa ebiro byona, nobukwakuba okulema kwabo tikulisigirwa ihanga erindi; baitu bulicwacwana nubumaraho obukama obu bwona, kandi buligumaho ebiro nebiro.”—Danieri 2:44.

•   Omu kasumi akatali kahara, Yahwe a Ruhanga, naija kukora ekintu ekiremere abantu kukora kandi eki nikyo kuleetaho obusinge bwonyini kandi oburaikaraho ebiro n’ebiro. Omu mulingo ki? Obukama bwe obw’omu iguru nibwija kuhwerekereza eby’okurwanisa byona kandi bumaleho n’okurwana kwona.—Zabuli 46:8, 9.

 Kumanya ebirukukiraho ha bintu Obukama bwa Ruhanga buli kora, soma ekicweka “Hansi y’Obukama bwa Ruhanga Halibaho Obusinge Bwingi.”