Obulemu obuli omu Ukraine n’empindahinduka y’obwire byeyongiire kuleetera ebyokulya kukeeha omu biikaro bingi. Kinu kikizire kuba omu mahanga agakyakurakurana nambere kigumira abantu baingi kutunga ebyokulya ebirukumara.

•   “Obulemu, empindahinduka y’obwire, n’emihendo y’amafuta kutemba hamu n’ebindi, biretiire ibura ly’ebyokulya kweyongera.”—António Guterres, UN secretary-general, Julaayi 17, 2023.

•   “Ihanga lya Russia likaruga omu ndagaano erukwikiriza ihanga lya Ukraine kutwara engano omu mahanga agandi. Abakugu nibatebereza ngu emihendo y’ebyoklulya niija kweyongera kutemba omu mahanga amanaku, kukira muno omu matemba ga Afrika n’omu mahanga ag’Abaharabbu.”—Atalayar.com, Julaayi 23, 2023.

 Manya Baibuli eky’ebazaaho ibura ly’ebyokulya n’obusumi obw’omumaiso.

•   Yesu akaranga ngu: ‘Ihanga liriramagira ihanga, n’omukama aliramagira omukama: halibaho enjara.’—Matayo 24:7.

•   Ekitabu kya Baibuli eky’Okusuku’rwa nikibazaaho abavugi b’embaraasi bbana. Omu halibo nakikirra obulemu. Naahonderwa ondi arukukikirra enjara, n’akasumi nambere kirigumira abantu kutunga ebyokulya kandi nibabitunda ha mihendo eya haiguru. “Nkarora embaraasi erukwiragura; n’ogu akaba agiikalireho aine minzaani omu mukono gwe. Nkahurra iraka . . . likagamba, ‘Endengo y’engano niija kugurwa omusaara ogw’ekiro kimu, n’endengo isatu eza sayiri nazo niziija kugurwa omusaara ogw’ekiro kimu.”—Okusuku’rwa 6:5, 6, Contemporary English Version.

 Obunabbi bunu oburukukwata ha ibura ly’ebyokulya nibuhikirra omu kasumi kanu Baibuli akeyeta ‘ebiro ebya hanyuma.’ (2 Timoseo 3:1) Kumanya ebirukukiraho ha biro binu ebya hanyuma n’abavugi b’embaraasi bbana abarukubazibwaho omu Okusuku’rwa, rora vidiyo Ensi Ikaire n’Ehinduka Kuruga omu 1914 kandi osome ekicweka “Abavugi b’Embaraasi Bbana—Nubo Baha?”

•   Baibuli erumu amagezi agasobora kutukonyera kugumira enyikara ezigumangaine, otwaliremu emihendo y’ebyokulya kutemba n’ebyokulya kuba bike. Rora ebyokurorraho ebimu ebiri omu kicweka “Omulingo Osobora Kukozesa Ebintu Bike.”

•   Ekindi, Baibuli etuha okunihira ngu ebintu nibiija kusemera. N’eraganiza akasumi obu “halibaho omweru gw’ebyokulya eby’enjuma omu nsi” kandi buli omu aliba aine ebyokulya bingi. (Zabuli 72:16, NWT) Kumanya ebirukukiraho ebirukukwata ha kunihira Baibuli okweha ha kasumi ak’omumaiso, soma ekicweka “Okunihira Kwonyini okw’Ebiro eby’Omumaiso Ebirungi.”