Omu mwaka 2023 abakugu omu by’obwomeezi bakakyetegereza ngu kuba n’amasu kiri kizibu ky’amaani eki basemeriire kurwanisa omu bwangu. Haroho ekintu kyona ekisobora kukorwa kurwanisa amasu?

•   Dr. Vivek Murthy, U.S. surgeon general nagamba ati “Obu twehurra twine amasu kandi tukesorora h’abantu abandi, nitusobora kuhikyaho obwomeezi bwaitu akabi kandi tukaburwa n’okusemererwa.” Ayongera agamba ati: “Haroho ekintu eki tusobora kukoraho.” Kintu ki? “Nitusobora kukora ebintu bike buli kiro kusobora kugumya enkoragana yaitu n’abantu abandi.” a

 Tituhurra amasu obu tuba twesoroire kyonka. Abandi bahurra amasu n’obu barukuba bali n’abantu baingi. Keebe nsonga ki ei etuleetera kuhurra amasu, Baibuli nesobora kutukonyera. Erumu amagezi agasobora kutukonyera kurwanisa amasu obu nitugumya enkoragana yaitu n’abantu abandi.

 Ba muntu ow’arukubaza kandi arukuhuliiriza kurungi. Kinu tikirukutwarramu kugambira abandi omulingo turukwehurra kyonka, baitu n’okuhuliiriza kurungi abandi obu barukuba nubakugambira omulingo barukwehurra. Obu oyeyongera kwoleka ngu nofaaho abandi, oyeyongera kugumya enkoragana yaawe na bo.

•   Omusingi kuruga omu Baibuli: “Kunu mutarora omu omu ha bigambo byanyu inywenka, baitu inywena murole nebyabandi.”—Abafiripi 2:4.

 Tunga abanywani abarukwahukana. Ikara oyetekaniize kunywana abantu abakuzire rundi abali hansi y’emyaka yaawe, abarukuruga omu buhangwa oburukwahukana rundi ihanga erirukukwahukana n’eryawe.

•   Omusingi kuruga omu Baibuli: “Mugalihe.”—2 Abakolinso 6:13.

 Kumanya ebirukukiraho ha mulingo osobora kukurakuraniza enkoragana ey’amaani n’abandi, soma ekicweka “Omulingo Osobora Kutunga Abanywani Abarungi.”