Nkazaalirwa omu Paddington, ekiikaro ekirumu abantu baingi omu England. Naikaraga na nyina nyowe hamu n’abakuru bange abaisiki basatu. Isiitwe yaijaga n’agenda habw’ekizibu ky’okunywa amaarwa.

Obunkaba nkyali muto, nyina nyowe akanyegesa kusaba buli kiro. Nkaba nyine aka Baibuli akataito akaali karumu Zabuli yonka, kandi nkakoramu ebizina nukwo mbizinege. Ninyijuka ninsoma omu bitabu byange ebya buli kiro ebigambo ebinaikaire nintekerezaaho ebirukugamba ngu: “Akasumi nikaija kuhika otakyaroho.” Ebigambo ebi byandazaaga ntabyamire ekiro obu nintekerezaaho obusumi obw’omu maiso. Nkekaguza nti; ‘Mali obwomeezi bwine kuba bwine ekigendererwa,’ ‘Habwaki ndi mu nsi?’ Nkaba ntarukugonza kufa!

Nkatandika kugonza kumanya ebirukukwata ha buraguzi. Nkalengaho kubaza n’abafu, nyowe n’abanywani bange aba haisomero twagendaga ha bituuro, kandi turora filimu ezirukutiinisa. Byatusemezaaga kandi byongera bitutiinisa.

Nkatandika kusiisikara obunkaba nyine emyaka ikumi yonka. Nkatandika kunywa etaaba, kandi nakwatirayo. Hanyuma nkatandikira kimu kunywa enjaahi. Kandi obunahikize emyaka 11, nkatandika kunywa amaarwa. N’obukiraaba ngu gatanurre, nagonzaaga kutamiira. Ekindi, nagonzaaga kuzina. Obunabaga ninsobora, nagendaga omu magenyi hamu n’omu mabbaara. Natorokaga muka ekiro kandi ngaruka butakakiire. Ekiro ekindi obunabaga njwahire, tinagendaga ha isomero. Kandi obunagendayoga nanyweraga amaarwa omu kilaasi.

Omu mwaka gwange ogw’okumalirra ha isomero nkakora kubi. Habwokuba nyina nyowe akaba atamanyire engeso zange, akabiihirwa muno kandi yankwatirwa ekiniga. Tukakungana kandi naruga omu ka. Nkamara akasumi ninyikara n’omwojo wange Tony, ow’akaba ali muyaayi. Yayejumbiraga omu bucwi bw’ebiragiro, kutunda ebitokooza bwongo, kandi akaba amanyirwe nk’omuntu ayagonzaaga muno kurwana. Hanyuma y’akacu kake, nkatwara enda kandi nkaba nyine emyaka 16 obunazaire omwana omwojo.

Nkabanza kutangatangana Abakaiso ba Yahwe obunkaba ninyikara omu kiikaro nambere haikara abakazi abatali mu buswere baitu baine abaana. Ab’obusobozi nubo baali bampaireyo ekisiika. Abakaiso ba Yahwe babiri abakazi baijayoga kwegesa abakazi abamu Baibuli. Kiro kimu, nanyowe nkabeteranizaaho. Nkaba ningonza kubooleka ngu tibahikire. Baitu bakagarukamu ebikaguzo byange byona batekaine kandi nibakozesa Baibuli. Baali baine embabazi kandi batekaine kandi eki kikansemeza muno. Nahabweki nanyowe nkacwamu kwegesebwa Baibuli.

Hanyuma y’akacu kake, nkeega ekintu kuruga omu Baibuli ekyahindwire obwomeezi bwange. Kurugira kimu omu buto bwange natiinaga kufa. Baitu nkamanya Yesu ekiyayegeseze ha kuhumbuuka! (Yohana 5:28, 29) Ekindi, nkeega ngu Ruhanga n’anfaaho nk’omuntu. (1 Petero 5:7) Nkakwatwaho muno ebigambo ebirukusangwa omu Yeremiya 29:11, ebirukugamba ngu: “Baitu mmanyire ebitekerezo ebindukutekereza namberemuli, agambire [Yahwe], bitekerezo ebyobusinge, kunu tibiri byakabi, okubaha okunihira ha mpero yanyu eyahanyuma.” Nkatandika kwikiriza ngu ninsobora kutunga okunihira okw’okwikara omu Rugonjo orurungi omu nsi.​—Zabuli 37:29.

Abakaiso ba Yahwe bakanyoleka okugonza kwonyini. Omurundi ogw’okubanza obunagenzere omu nsorrokano zaabo, bakansemerererwa, bantangirra, kandi banyoleka okugonza! (Yohana 13:34, 35) Omulingo baantwaizeemu gukahukanira kimu ha mulingo natwazibwemu obunagenzere ha kanisa. Abakaiso ba Yahwe bakantangirra n’obukiraaba ngu nkaba ntarukuzooka kurungi. Bakampa obwire, banfaaho, bampuliiriza kandi bankonyera. Nkehurra ngu ndi kicweka ky’eka emu enkooto kandi enyakwijwire okugonza.

Obunkaba ninyega, nkakyetegereza ngu nyine kukora empindahinduka omu bwomeezi bwange nukwo buhikaane n’endengo za Ruhanga ezirukukwata ha ngeso. Kitanyanguhire kuleka kunywa etaaba. Ha murundi nugwo gumu, nkakyetegereza ngu ebizina ebimu byanyekambisaaga kweyongera kunywa enjaahi, nahabweki nkahinduramu ebizina nahuliirizaaga. Habwokuba nkaba ningonza kwikara ntekaine, nkaleka kugenda mu magenyi n’omu mabbaara nambere nasikirizibwaga kutamiira. Ekindi, nkakomamu abanywani abarungi abaakunkonyire kuhinduramu obw’omeezi bwange.​—Enfumo 13:20.

Tony nauwe akaba aliyo n’ayega Baibuli n’Abakaiso ba Yahwe. Abakaiso ba Yahwe obubaali nibagarukamu ebikaguzo bye nibakozesa Baibuli, akakigumya ngu eby’akaba n’ayega nugo mananu. Akakora empindahinduka ez’amaani omu bwomeezi bwe: akecwaho abanywani be abagonzaaga kurwana, yaleka kucwa ebiragiro n’okunywa enjaahi. Kusobora kweyongera kusemeza Yahwe, itwena tukakyetegereza ngu twine kuleka engeso embi nukwo tusobole kukuza kurungi mutabani waitu. Tukataaha obuswere omu 1982.

Ninyijuka ninseruliirizaho ebicweka omu Watchtower na Awake! * ebirukwoleka ebyokurorraho by’abantu abaasoboire kukora empindahinduka ezinkaba ningonza kukora. Ebyokurorraho byabo bikangarramu amaani! Bikanyekambisa kwikara nindegaho kukora empindahinduka n’okutajwaha. Nkaikara ninsaba Yahwe akonyere ntajwaha. Nyowe na Tony tukabatizibwa nk’Abakaiso ba Yahwe omu Julaayi 1982.

Kukurakuraniza enkoragana yange na Yahwe Ruhanga kikajuna obwomeezi bwange. Ekindi, nyowe na Tony turozere omulingo Yahwe arukutusagikamu obuturukuba nituraba omu busumi obugumire. Twegere kwesiga Ruhanga omu busumi obugumire, kandi nituhurra ngu aikaire n’atukonyera kandi n’afaaho eka yaitu.​—Zabuli 55:22.

Kikansemeza kukonyera mutabani waitu na muhara waitu kumanya Yahwe nk’oku nanyowe mumanyire. Hati mpurra okusemererwa nukwo kumu obundora abaana baabo nabo nibakurakurana omu kumanya Ruhanga.

Tinkyaraara ntabyamire habw’okweralikirra ha busumi obw’omu maiso rundi ha kufa. Nyowe na Tony hati twine omugisa ogw’okubungira ebitebe by’Abakaiso ba Yahwe eby’embaganiza n’okubagarramu amaani buli wiiki. Tubeteranizaaho omu kwegesa abandi ngu nabo kakuba baikiririza omuli Yesu, nibasobora kwegondeza omu bwomeezi obutahwaho.