1. Habwaki twakugondeze kwega h’abamaraika?

OKUMANYA kurungi omuntu emirundi nyingi kitwarramu kwega ha by’omu maka ge. Omulingo nugwo gumu, kumanya Yahwe Ruhanga kikutwarramu kumanya kurungi ab’omu maka ge, bamaraika. Baibuli eyeta bamaraika “bana ba Ruhanga.” (Yobu 38:7) Hati, baina kikaro ki omu ntekaniza ya Ruhanga? Baina ekibakozereho omu byafayo by’abantu? Bamaraika baina ekibakoraho ha bwomezi bwawe? Obukiraba kiri kityo, bata?

2. Bamaraika bakaruga nkaha, kandi bali baingaha?

² Baibuli ebaza ha bamaraika emirundi nyingi. Ka turoleyo ebimu ha byahandiikirwe ebikubabazaho tutunge eky’okubegaho. Bamaraika bakaruga nkaha? Abakolosai 1:16 rugamba: “Omwogu [Yesu Kristo] ebintu byona numwo byahangirwe, omu iguru na hansi.” Nahabwekyo, ebihangwa byoona eby’omwoyo ebyetwa bamaraika, bikahangwa Yahwe Ruhanga kuraba omu Mwana we omuzigaijo. Bamaraika bali baingaha? Baibuli eyoleka obukumi bw’obukaikuru bwa bamaraika bakahangwa kandi boona b’amaani.—Zabuli 103:20. *

3. Yobu 38:4-7 nizitugambira ki h’abamaraika?

 ³ Ekigambo kya Ruhanga, Baibuli, kitugambira ngu, ensi obu yahangirwe, ‘abaana ba Ruhanga boona obu batokere habw’okusemererwa.’ (Yobu 38:4-7) Kinu kikumanyisa ngu bamaraika bakabaho kara abantu batakahangirwe, n’ensi etakahangirwe. Kandi ekicweka kinu ekya Baibuli kikutwoleka ngu bamaraika baina enyehu’ra, habwokuba oruka’ra rugambire ‘bakatoka habw’okusemere’rwa.’ Wetegereze ngu ‘abaana ba Ruhanga boona’ bakasemererwa hamu. Omu kasumi ako bamaraika boona bakaba bali bumu nibahereza Yahwe Ruhanga.

4. Baibuli eyoleka eta ngu bamaraika bafayo muno ha ebi abaana b’abantu bakora?

⁴ Kuruga obu bayerolire n’agabu akuhangwa kw’abantu ab’okubanza, bamaraika abesigwa baikaire nibafayo muno ha kweyongera kw’abaana b’abantu, n’omulingo ebigendererwa bya Ruhanga okubizire nibitekwa omu nkora. (Enfumo 8:30, 31; 1 Petero 1:11, 12) Kyonka, akasumi obu kagenzere nikarabaho, bamaraika bakakirora ngu abantu abakukira obwingi bakalekaho kuhereza Omuhangi w’abu ow’engonzi. Hataroho kugurukyagurukya kinu kikasaliza muno bamaraika abesigwa. Kyonka, buli muntu weena obwahindukira Yahwe, “haroho okusemererwa omu maiso ga bamaraika.” (Luka 15:10) Habw’okufayo kw’amaani abamaraika okuboleka abahereza ba Ruhanga, tiharoho kugurukyagurukya nikyo Ruhanga aikaire n’abakozesa kugumya n’okulinda abahereza be abesigwa ha nsi. (Abaheburaniya 1:7, 14) Wetegereze eby’okurorraho ebimu.

5. By’okurorraho ki eby’obusagiki bw’abamaraika ebitusanga omu Baibuli?

⁵ Bamaraika babiri bakakonyera omusaija ahikirire Loti n’abahara be kukira okuhwerekera kw’abasiisi ab’omu Sodomu na Gomora obu babembire kubaiha omu kikaro ekyo. (Okubanza 19:15, 16) Ebyasa by’emyaka birabireho, nabbi Danieri  akanagwa omu kiina ky’entale, kyonka atahutazibwe, akagamba: “Ruhanga wange atumire maraika we, yaigarra eminwa y’entale.” (Danieri 6:22) Omu kyasa eky’okubanza, C.E., maraika akasumu’ra omukwenda Petero kuruga omu nkomo. (Engeso 12:6-11) Kandi bamaraika bakakonyera Yesu ha ntandikwa y’obuhereza bwe obwa ha nsi. (Marako 1:13) Kandi Yesu ali haihi kwitwa, maraika akamubonekera “namuga’ramu amani.” (Luka 22:43) Yesu aina kuba yahulire ahumuzibwe omu kasumi akabaire kakuru muno omu bwomezi bwe!

6. (a) Bamaraika balinda bata abantu ba Ruhanga biro binu? (b) Bikaguzo ki ebitukugenda kucumitirizaho?

⁶ Biro binu, bamaraika tibakyabonekera abantu ba Ruhanga ha nsi. Nobubaraba batakusobora kurorwa n’amaiso gaitu, bamaraika ba Ruhanga ab’amaani balinda abantu be, kukira muno obutahikwaho akabi omu by’omwoyo. Baibuli egamba: “Maraika wa Mukama atema enkande okwehinguliriza abanyakumutina, kandi abajuna.” (Zabuli 34:7) Habwaki ebigambo ebyo byakutuhumwize muno? Habwokuba haroho ebihangwa eby’omwoyo eby’akabi muno ebikugonza kutuhwerekereza! Nibyo biraha? Bikaruga nkaha? Birengaho bita kutukora kubi? Kumanya binu, leka omu bugufu tucumitirizeho hali ekyo ekyabaireho ha ntandikwa y’ebyafayo by’abantu.

7. Setani akahika nkaha kuhabisa abantu kuruga hali Ruhanga?

⁷ Nkoku twayegere omu Suura 3 ey’ekitabu kinu, omu ha bamaraika akegomba kulema abaandi kandi yatandika kuhakaniza Ruhanga. Hanyuma maraika onu akatandika kumanywa nka Setani Omuhangirizi. (Okusuku’rwa 12:9) Omu byasa 16 ebyahondiireho amazire kuhabisa Hawa, Setani akasobora kuhabisa haihi abantu boona abali omu nsi kuruga hali Ruhanga oihireho abesigwa abataito muno, nk’Aberi, Enoka, na Nuha.—Abaheburaniya 11:4, 5, 7.

8. (a)  Bamaraika abamu bakafooka bata badaimoni? (b) Kukira okusandaara kw’obusumi bwa Nuha, badaimoni bakaba baina kukora ki?

 ⁸ Omu busumi bwa Nuha, bamaraika abaandi bakajemera Yahwe. Bakaleka ebiikaro by’abu omu maka ga Ruhanga omuiguru, baija ha nsi bajwara emibiri y’enyama. Habwaki? Tusoma tuti omu Okubanza 6:2: “Abana ba Ruhanga bakarora abahara b’abantu bali barungi; basweraga abakazi omu bona ababakomeremu.” Baitu Yahwe Ruhanga ataikirize ebikorwa by’abamaraika banu ababi, ebyarugireho obusiisi kweyongera omu bantu kugenda omu maiso. Akaleta okusandaara kw’amaizi gasandara ensi yoona, gahwerekereza abantu boona ababi, yakizaho bataito ababaire bahereza be abesigwa.  (Okubanza 7:17, 23) Kityo nu, abamaraika abajemu, rundi badaimoni, bakahambirizibwa kwejuura emibiri ey’enyama bagarukayo omuiguru nk’ebihangwa eby’omwoyo. Bakaba beteraniza hali Omuhangirizi ayafookere “mulemi w’abadaimoni.”—Matayo 9:34, NW.

9. (a) Kiki ekyahikire ha badaimoni obu bagarukireyo omuiguru? (b) Kiki ekitukugenda kwetegereza ha bikwatiraine n’abadaimoni?

⁹ Bamaraika abajemu banu obu bagarukireyo omuiguru, bakatwara nk’abakyenerwe nk’omulemi wabu Setani. (2 Petero 2:4) Nobubaraba batakyasobora kwejweka emibiri y’abantu, bakyaina omulingo ogu baleteramu abantu kukora ebitahikire. N’ayekonyeza badaimoni banu, Setani “arukubihabiha ensi zona.” (Okusuku’rwa 12:9; 1 Yohana 5:19) Akikora omu mulingo ki? Kukira muno badaimoni bakozesa obukodyo bw’okuhabisa abantu. (2 Abakolinso 2:11) Katurole emu ha miringo enu.

10. Oburogo nikyo kiki?

¹⁰ Kusobora kuhabisa abantu, badaimoni bakozesa eby’oburogo. Oburogo kuba kukoraganira kimu na badaimoni rundi kuraba omu mufumu. Baibuli ejumi’ra eby’oburogo kandi etutere’ra twetantale ekintu kyoona ekiina endugirro ya Setani. (Abagaratiya 5:19-21) Badaimoni bakozesa eby’oburogo kukwasa rundi kuhabisa abantu nka omusohi okw’akukozesa omuniongorozi kukwasa encu. Omusohi akozesa ebintu eby’enyahukana ha ndobo n’akwata encu. Omulingo nugwo gumu, emyoyo emibi ekozesa eby’oburogo eby’enyahukana kuteka abantu eb’enyahukana hansi y’obusobozi bwayo.

11. Okuraguza nikyo kiki, kandi habwaki twaku kwetantaire?

¹¹ Omutego ogumu Setani ogw’akozesa nukwo kuraguza. Okuraguza nikyo kiki? Nukwo kulengaho kuse’ra kumanya, eby’omumaiso, rundi ebitarukumanywa. Omu kuraguza bakozesa; enyunyuzi, okwezi, obucanisi, endo’rwamu, ebitabu rundi kurotorra ebiroto. Gonze abantu baingi batekereza ngu  kwetahya omu by’oburaguzi busamu kabi koona, Baibuli ekyoleka kurungi ngu abaraguzi bakoragana n’emyoyo emibi. Nk’eky’okurorraho, Engeso ezabakwenda 16:16-18 zibaza ha ‘daimoni ekuragura’ eyasobozesaga omuisiki “okuragura.” Omuisiki ogu akalekaho kuragura aho-naho obu bamubingireho daimoni.

12. Habwaki kiri ky’akabi muno kulengaho kubaza n’abafu?

¹² Omulingo ogundi badaimoni ogu bahabisizamu abantu nukwo kubaletera kwekaguza h’abafiire. Abantu abaliri’ra abagonzebwa babu abafiire, mirundi nyingi babihwabihwa ha bikwatiraine n’abafu. Omuraguzi nasobora kuha amakuru g’embaganiza, rundi kubaza niraka erikusisana n’ery’omuntu eyafiire. N’ekirugamu, abantu baingi nibasobora kukiikiriza ngu mali abafu bomiire ngu kandi kuba n’enkoragana n’abo nikiija kubahumuza. Omu mananu “okuhumura” okwo kw’ebisuba kandi kw’akabi. Habwaki? Habwokuba badaimoni basobora kusubiriza iraka ly’ogu ayafiire kandi nibaha omuraguzi amakuru agarukukwata hali ogu ayafiire.  (1 Samuiri 28:3-19) Kyonka, nkoku twayegere omu Suura 6, omuntu obw’afa aba atakyaroho. (Zabuli 115:17) Nahabwekyo, ‘omuntu wena anyakubaza n’abafu’ aba ahabisiibwe n’emyoyo emibi kandi aba nahakaniza ebiragiro bya Ruhanga. (Ekyebiragiro 18:10, 11; Isaya 8:19) Hati nu, werinde otagwa omu mutego gunu ogwa kabi badaimoni ogu bakozesa.

13. Kiki baingi hali abo abatiinaga badaimoni, ekibasoboire kukora?

¹³ Emyoyo emibi tegarukira ha kubihabiha bantu kyonka, erengaho n’okubatinisiriza. Biro binu, Setani n’abadaimoni be bamanyire basigaizeyo “akacu kake” babohwe, baine itima lingi muno kukira okubabaire kara. (Okusuku’rwa 12:12, 17) Nobukiraba kiri kityo, enkumi n’enkumi z’abantu abaikaire hansi y’okumigirizibwa emyoyo egyo embi, basoboire kugyecwaho. Kinu bakikozere bata? Kiki omuntu eky’akusobora kukora gonze aba asangirwe nakora eby’oburaguzi?

14. Kusisanaho Abakristayo ab’omukyasa eky’okubanza omu Efeso, nitusobora tuta kwecwa ha myoyo emibi?

¹⁴ Baibuli etugambira omulingo gw’okwetantaramu emyoyo emibi kandi n’omulingo gw’okugyecwaho. Cumitiriza ha ky’okurorraho ky’Abakristayo ab’omu kyasa eky’okubanza omu rubuga rwa Efeso. Abamu hali bo baraguraga batakafokere Bakristayo. Obu bacwiremu kwecwa ha by’oburaguzi kiki eki bakozere? Baibuli egamba: “Baingi hali abo abakoraga eby’okuragura bakasoroza ahamu ebitabu byabu, babyokeza omu maiso gabantu bona.” (Engeso 19:19) Omu kuhwerekereza ebitabu byabu eby’amasano, Abakristayo abahyaka abo, bakateraho boona abakugonza kwetantara emyoyo emibi eky’okurorraho. Abantu abakugonza kuhereza Yahwe baina kweihiraho kimu buli ky’oburaguzi kyoona. Binu bikutwarramu, ebitabu, entambi za vidiyo, ebipande, etambi z’ebizina byoona ebikusagika ebikorwa by’oburaguzi nibibifoora kuba biri birungi, ehirizi n’ebintu ebindi abantu  ebi bajwara bibalinde butahikwaho akabi.—1 Abakolinso 10:21.

15. Kusobora kwetangira emyoyo emibi, kiki eki twina kukora?

¹⁵ Harabireho emyaka hanyuma y’Abakristayo b’omu Efeso kwokya ebitabu by’abu eby’okuragura, omukwenda Paulo akabahandiikira ati: ‘Tukufukana n’emyoyo emibi.’ (Abefeso 6:12) Abadaimoni bakaba batabihoireho. Bakaba nibakyalengaho kukozesa emiringo endi. Hati kiki ekindi Abakristayo abo eki bakaba baina kukora? Paulo akagamba: ‘Nokukira byoona mukwasire engabo ey’okwikiriza, niyo eribasoboza okuraza emisogi yoona ey’omurro ey’omubi Setani.’ (Abefeso 6:16) Engabu yaitu ey’okwikiriza hali ekuhikya kuba ngumu nuho n’amaani gaitu garaingana ag’okurwanisa emyoyo emibi.—Matayo 17:20.

16. Nitusobora tuta kugumya okwikiriza kwaitu?

¹⁶ Hati, nitusobora tuta kugumya okwikiriza kwaitu? Obu twesomesa Baibuli. Obugumu bw’ekisiika busigikira ha bugumu bw’omusingi. Omu mulingo nugwo gumu, okwikiriza kwaitu kuba kugumire kiija kusigikira ha bugumu bw’omusingi, nukwo okumanya okuhikire okw’Ekigambo kya Ruhanga, Baibuli. Obu tusoma kandi tukega Baibuli butosa, okwikiriza kwaitu kwija kuba kugumire. Okusisanaho ekisiika ekigumire, okwikiriza nk’okwo kwija kutulinda butarumbwa emyoyo emibi.—1 Yohana 5:5.

17. Kintu ki eki twina kukora kusobora kwerinda emyoyo emibi?

¹⁷ Kintu ki ekindi Abakristayo b’omu Efeso bakaba baina kukora? Bakaba baina kweyongera kuse’ra obulinzi habwokuba orubuga oru baali balimu rwali rujwire eby’oburaguzi. Nikyo Paulo yabagambiire: ‘Nimusabaga bwona omu mwoyo nokwesengereza kwona.’ (Abefeso 6:18) Naitwe nkoku tuli omu nsi ijwire eby’oburaguzi, kwekamba kusaba Yahwe kutuha obulinzi, kintu kikuru muno omu kurwanisa emyoyo emibi. Twina kukozesa ibara lya Yahwe, omu kusaba kwaitu. (Enfumo 18:10) Kityo nu, tweyongere kumusaba “atujune hali omubi,” Setani Omuhangirizi. (Matayo 6:13) Yahwe naija  kugarukamu okusaba okwo okurugire ha mutima.—Zabuli 145:19.

18, 19. (a) Habwaki nitusobora kukigumya ngu nitwija kusingura obulemu bw’okurwanisa emyoyo emibi? (b) Kikaguzo ki ekiragarukwamu omu suura ekuhonderaho?

¹⁸ Emyoyo emibi y’akabi muno, kyonka obu turagyetantara kandi tukagumya enkoragana yaitu na Yahwe nitukora eby’agonza titukwija kwikara nitugitiina. (Yakobo 4:7, 8) Amaani g’emyoyo emibi gaina hagagarukira. Bakafubirwa omu busumi bwa Nuha, kandi balindirire kucwerwa omusango omu kasumi ak’omu maiso. (Yuda 6) Kandi ijuka, ngu twina obulinzi bw’abamaraika ba Yahwe ab’amaani. (2 Kyabakama 6:15-17) Bamaraika banu bafayo muno kurora ngu nitusingura omu kurwanisa emyoyo emibi kandi batuga’ramu amaani. Nahabwekyo, katweyongere kugumya enkoragana yaitu na Yahwe, n’abamaraika abesigwa. Kandi tulengeho kwetantara ekintu kyoona eky’oburogo kandi twikale nituko’ra ha kuhabura kw’Ekigambo kya Ruhanga. (1 Petero 5:6, 7; 2 Petero 2:9) Obwo nubwo twija kuba n’okugumya ngu turarwanisa kandi tusingule emyoyo emibi.

¹⁹ Baitu habwaki Ruhanga agumisirize emyoyo emibi n’obubi obuleteire abantu baingi okubonabona kw’amaani? Ekikaguzo ekyo nikiija kugarukwamu omu suura eragarukaho.