1. Habwaki Omunyoro Omunyesiyopya yasabire kubatizibwa?

“DORA amaizi; kiki ekirukuntanga okubatizibwa?” Ekikaguzo ekyo kikakaguzibwa Omunyoro Omunyesiyopya omu kyasa ky’okubanza. Omukristayo akwetwa Firipo akaba  n’akyaruga kumusoborra ngu Yesu nuwe Masiya ayaraganizibwe. Ebyahandiikirwe ebi yayegere obu byamuhikire ha mutima, Omunyesiyopya akacwamu yasaba kubatizibwa.—Engeso 8:26-36.

2. Habwaki wakutekerize muno ha ky’okubatizibwa?

² Obworaba oikaire n’osoma esuura z’ekitabu kinu ez’enyuma n’omu h’Abakaiso ba Yahwe, nosobora kwekaguza ‘Kiki ekirukuntanga kubatizibwa?’ Nambere ohikire otekwa kuba oyegere ha kuraganiza kwa Ruhanga okw’obwomezi obutahwaho omu Rugonjo rwe. (Luka 23:43; Okusuku’rwa 21:3, 4) Kandi oyegere na ha mulingo ogw’abafu barumu n’okunihira kw’okuhumbuka. (Omugambizi 9:5; Yohana 5:28, 29) Otekwa kuba oikaire noso’rokana n’Abakaiso ba Yahwe kandi okirozire nkoku bakuko’ra ha misingi y’ediini ey’amananu. (Yohana 13:35) Ekikukira muno obukuru, otekwa kuba okulize enkoragana yawe na Yahwe Ruhanga.

3. (a) Kiragiro ki Yesu eki yahaire abakurasi be? (b) Okubatizibwa okw’amaizi kwina kukorwa kuta?

³ Osobora ota kwoleka ngu nogonza kuhereza Ruhanga? Yesu akagambira abakurasi be ‘Mugende muhindule amahanga gona abageswa, nimubabatiza.’ (Matayo 28:19) Yesu wonyini akatekaho eky’okurorraho n’abatizibwa omu maizi. Atamaisirirwe n’obukwakuba kumusesaho busesaho amaizi ha mutwe gwe. (Matayo 3:16) Ekigambo “kubatiza” kiruga omu kigambo ky’Oruyonani ekimanyisa “kwibika.” Nahabwekyo okubatizibwa kw’Ekikristayo kwina kuba kw’okwibiki’ra kimu omu maizi.

4. Okubatizibwa omu maizi kwoleka ki?

⁴ Boona abarukugonza kuba n’enkoragana ennungi na Yahwe Ruhanga nikibetagisa kubatizibwa nibaibikwa omu maizi. Okubatizibwa kwoleka omu rujwire ngu nogonza kuhereza Ruhanga. Ngu nogonza kukora Yahwe eby’agonza. (Zabuli 40:7, 8) Kyonka kuhika ha kubatizibwa haroho amadaara agoina kurabamu.

5. (a) Idaara ki ely’okubanza erirakuhikya ha kubatizibwa? (b) Habwaki ensorrokano z’Ekikristayo nizetagisa?

⁵ Idaara ely’okubanza omazire kulitandika. Olitandikire ota? Noyega amananu agarukukwata hali Yahwe Ruhanga na Yesu Kristo, noraba omu ntekaniza y’okwega Baibuli. (Yohana 17:3) Kyonka hakyaliyo bingi eby’okwega. Abakristayo nibagonza ‘kuijura okumanya Ruhanga ebyagonza.’ (Abakolosai 1:9) Kubahoga omu nsorrokano z’Abakaiso ba Yahwe, kiija kukukonyera muno omu kukora kinu. Kikuru muno kubamuga omu nsorrokano ezo. (Abaheburaniya 10:24, 25) Okubahoga omu nsorrokano butoosa kiija kukukonyera kweyongera kumanya Ruhanga.

6. Nikikwetagisa kumanya buli kimu ekiri omu Baibuli kusobora kuhika ha kubatizibwa?

⁶ Kyonka tikikwetagisa obanze omanye byoona ebiri omu Baibuli nubwo obatizibwe. Omunyesiyopya akaba ainaho ekyamanyire, kyonka akaba nayetaaga kukonyerwa kwetegereza ebicweka ebimu eby’Ebyahandiikirwe. (Engeso 8:30, 31) Omu mulingo nugwo gumu, okyaina bingi eby’okwega habwokuba kwega hali Ruhanga tikwine hali kuligarukira. (Omugambizi 3:11) Otakabatizibwe, noyetaga kumanya n’okwikiriza okwegesa kwa Baibuli okubandizibwaho. (Abaheburaniya 5:12) Gamba nka, amananu agarukukwata ha mulingo ogw’abafu barumu hamu n’obukuru bw’ibaara lya Ruhanga n’Obukama bwe.

7. Okwega Baibuli kwina kukukoraho ki?

⁷ Okumanya kwonka tikukumara, habwokuba, “Hata[r]oho kuikiriza tikisoboka okumusiimwa [Ruhanga].” (Abaheburaniya 11:6) Baibuli etugambira ngu abantu abamu ab’omu rubuga rwa Kolinso orwa ira obu bahulire amakuru agaresirwe Abakristayo “baikiriza babatizibwa.” (Engeso 18:8) Omu mulingo nugwo gumu, kwega Baibuli kwina kukuletera kwikiriza ngu kiri Kigambo ekyaterekerezibwe Ruhanga. Kusoma Baibuli kwina kukukonyera  kwikiririza omu mirago ya Ruhanga n’omu kihongwa kya Yesu ekitusobozesa kujunwa.—Yosuha 23:14; Engeso 4:12; 2 Timoseo 3:16, 17.

8. Kiki ekirakusikiriza kugambiraho abandi ha by’oyegere?

⁸ Okwikiriza obu kuragenda nikweyongera omu mutima gwawe, noija kukisanga kigumire kuculere’ra eby’oyegere. (Yeremiya 20:9) noija kusikirizibwa kugambiraho abandi hali Ruhanga na ha bigendererwa bye.—2 Abakolinso 4:13.

9, 10. (a) Nibaha ab’okusobora kubanza kugambiraho amananu ga Baibuli? (b) Kiki eky’okusobora kukora kakusangwa oba nogonza kutebeza hamu n’entekaniza ekozerwe Abakaiso ba Yahwe?

⁹ Omu mulingo ogw’amagezi n’osobora kutandika kugambiraho ab’oruganda rwawe, abanywani, abatahi n’abakozi bagenzi baawe ha by’oyegere kuruga omu Baibuli. Hanyuma, noija kuhu’ra nogonza kweteraniza h’Abakaiso ba Yahwe omu mulimu gw’okutebeza. Nosobora kugambira arukukwegesa Baibuli ha kitekerezo kyawe eky’okugonza kutebeza. Obu kiraba nikyeyoleka ngu ohikire kutebeza omu rujwire, entegeka nizija kukorwa iwe n’omwegesa waawe kwitirana abagurusi babiri ab’omukitebe.

¹⁰ Kinu nikija kukukonyera kumanya kurungi abamu h’abagurusi abali omu kitebe, abarole’ra igana lya Ruhanga. (Engeso 20:28; 1 Petero 5:2, 3) Abagurusi banu obu barakirora ngu okwetegereza kurungi kandi ngu okwikiriza ebintu ebibandizibwaho Baibuli eby’eyegesa, okuko’ra ha misingi ya Ruhanga kandi ngu mali nogonza kuba omu hali Abakaiso ba Yahwe, nibaija kukumanyisa ngu noikirizibwa kutebeza omu rujwire nk’omutebezi w’amakuru amarungi atakabatizibwe.

11. Mpindahinduka ki abamu ezi baina kubanza kukora batakaikiriziibwe kutebeza omu rujwire?

¹¹ Obundi noija kukisanga ngu kikukwetagisa kubaho  empinduka ezosemerire kubanza kukora nubwo ohike ha idaara ly’okutebeza omu rujwire. Kinu nikisobora kutwarramu kulekaho ebintu ebimu ebitali birungi eby’obaire n’okora omu nsita. Nahabwekyo, otakasabire kuba mutebezi atakabatizibwe, oina kuba otakyakora ebibi, nk’obusihani, obutamizi n’okukozesa enjahi.—1 Abakolinso 6:9, 10; Abagaratiya 5:19-21.

12. Habwaki okw’egarukamu kukwetagisa?

¹² Haroho amadaara agandi agorukutekwa kuhikaho otakahikire ha kubatizibwa. Omukwenda Petero akagamba: “Nukwo mwegarukemu, muhinduke, ebibi byanyu biragazibwe.” (Engeso 3:19) Kwegarukamu nikimanyisa kuba n’enyehu’ra ey’okusalirwa okw’omumutima habw’ekibi eky’okozere. Okwegarukamu nikwetagwa kira muno hali omuntu abaire nakora ebibi eby’amaani, kyonka n’ogwo abaire atakukora ebibi eby’amaani aina kw’egarukamu. Habwaki? Habwokuba abantu boona basiisi kandi bakwetaga okuganyirwa Ruhanga. (Abarumi 3:23; 5:12) Obwokaba otakatandikire kusoma Baibuli okaba otamanyire Ruhanga eby’agonza. Hati obwo wakusoboire ota kwikara omu mulingo ogukumusemeza? Nahabwekyo okwegarukamu kukwetagisa.

13. Okuhinduka nikyo kiki?

¹³ Okwegarukamu kwina kuhonderwa okuhinduka. Toina kugarukira ha kusalirwa ebibi byawe kyonka. Oina kulekerayo kimu engeso zaawe ezaira kandi oyehereyo kimu kukora ebihikire ebiro byoona. Okwegarukamu n’okuhinduka nigo madaara agoina kuhikaho otakabatizibwe.

14. Idaara ki erindi erikuru ery’okutekwa kuhikaho otakabatizibwe?

¹⁴ Haroho idaara erindi erikuru ery’oina kuhikaho otakabatizibwe. Oina kwehayo hali Yahwe Ruhanga.

15, 16. Nikimanyisa ki okwehayo hali Ruhanga, kandi kiki ekiretera omuntu kukikora?

 ¹⁵ Obwoyehayo hali Yahwe Ruhanga omu kusaba, oraganiza kuhereza uwe wenka omu bwijwire ebiro byoona. (Ekyebiragiro 6:15) Baitu habwaki omuntu yakugondeze kukora atyo? Kugarukamu ekikaguzo ekyo, tekereza ha musaija akugonza kuswera omukazi. Buli obwayeyongera kumumanya n’emiringo ye ennungi ayeyonge’ra kimu kumugonza. Hanyuma, kiba ky’obuhangwa kumusaba amuswerwe. Ky’amananu, kuswera kuba kweyongeraho obujunanizibwa. Baitu okugonza okwaba nakwo kumuletera kukikora.

¹⁶ Obwomanya kandi okatandika kugonza Yahwe, omuhereza n’omutima gwaawe gwoona otakwikiriza kintu kyoona kukulemesa kumuramya. Omuntu wena akugonza kukuratira Omwana wa Ruhanga, Yesu Kristo, aina “kweyangisa.” (Marako 8:34) Tweyangisa itwenka nitumali’ra butaleka ebigendererwa n’okwegomba kwaitu kutulemesa kworobera Ruhanga. Nahabwekyo otakabatizibwe, oina kwebembeza kukora Yahwe Ruhanga eby’agonza nk’ekigendererwa ekikuru omu bwomezi bwawe.—1 Petero 4:2.

17. Habwaki abamu babandara kwehayo hali Yahwe?

¹⁷ Abamu batiina kwehayo hali Yahwe habw’okutiina obujunanizibwa obw’okucwamu okwo. Nibasobora kutiina Ruhanga kubajunana nk’Abakristayo abeheireyo. Nibatiina ngu basobora kulemwa kuhikiriza obujunanizibwa bwabu hali Yahwe kandi bakamubihiza, kibaletera kutekereza ngu buteherayo kimu hali we nikyo kikukira.

18. Kiki ekikusobora kukuletera kwehayo hali Yahwe?

¹⁸ Obw’oragenda n’oyeyongera kugonza Yahwe, noija kugonza kwehayo nambere ali kandi owekambe kukuhikiriza. (Omugambizi 5:4) Hanyuma y’okwehayo, noija kugonza “kugenda kurungi nk’oku kisemerire Mukama  waitu obw’okusimwa kwona.” (Abakolosai 1:10, NW) Habw’okugonza Ruhanga tokwija kukisanga kigumire kukora eby’agonza. Hataroho kugurukyagurukya noija kwiki’raniza n’omukwenda Yohana ayahandiikire: “Kunu nukwo kugonza Ruhanga, itwe tukwate ebiragirobye: kandi ebiragirobye tibirukulemera.”—1 Yohana 5:3.

19. Habwaki titwine kutiina kwehayo hali Ruhanga?

¹⁹ Kwehayo hali Ruhanga tikikukwetagisa kuba ohikirire. Yahwe amanyire nambere obusobozi bwawe bukugarukira kandi tarukukunihira kukora eby’otarukusobora. (Zabuli 103:14) Nagonza osingule kandi naija n’okukukonyera. (Isaya 41:10) Nosobora kukigumya ngu obw’orayesiga Yahwe  n’omutima gwawe gwoona “aliterekereza emihanda yawe.”—Enfumo 3:5, 6.

20. Habwaki okwehayo hali Yahwe kutakusobora kusigara kuli kw’ensita

²⁰ Okucumitiriza ha bintu ebikuruga kubazibwaho haiguru, kisobora kukukonyera okwehayo hali Yahwe noraba omu kusaba. Buli muntu wena arukugonza Ruhanga mali aina “kwatura omu rujuire nukwo atunge kujunwa.” (Abarumi 10:10) Kinu nosobora kukikora ota?

21, 22. Nosobora ota kwatura omu rujwire’ okwikiriza kwawe?

 ²¹ Manyisa omuteraniza w’ekitebe ky’abagurusi omu kitebe kyawe ngu nogonza kubatizibwa. Naija kutekaniza oikarre n’abagurusi mu cumitirizeho ha bikaguzo ebimu ebirukukwata ha nyegesa za Baibuli ezibandizibwaho. Abagurusi banu obu barakisanga ngu nohikiriza ebikwetagisa, nibaija kukugambira ngu nosobora kubatizibwa omugisa gw’okubatizibwa hali gurakazokera. * Orubazo orukwoleka amakuru g’okubatizibwa rukira kuheebwa ha nsorrokano nk’ezo. Hanyuma omugambi atangi’ra abarukugenda kubatizibwa boona kugarukamu ebikaguzo bibiri ebyanguhire guli mulingo ‘gw’okwatura omu rujwire’ okwikiriza kwabu.

²² Okubatizibwa nukwo kwonka okukukwoleka kuba muntu amazire ira kwehayo hali Ruhanga kandi obwo, oba ofokere omu h’Abakaiso ba Yahwe. Abo boona ababatizibwa baibikwa omu maizi kwoleka omu rujwire ngu behaireyo hali Yahwe.

23. Kimanyisa ki kubatizibwa omu ‘ibara lya Isiitwe n’Omwana n’omwoyo ogurukwera’?

²³ Yesu akagamba ngu abegeswa be bakubatizibwe ‘omu ibara lya Isiitwe n’ery’Omwana n’ery’omwoyo ogurukwera.’ (Matayo 28:19) Kinu nikimanyisa ngu arukugenda kubatizibwa naikiriza obukuru bwa Yahwe Ruhanga n’obwa Yesu Kristo. (Zabuli 83:18; Matayo 28:18) Kandi ngu namanya omulimo gw’omwoyo gwa Ruhanga ogurukwera rundi amaani ge agakora.—Abagaratiya 5:22, 23; 2 Petero 1:21.

24, 25. (a) Okubatizibwa kwoleka ki? (b) Bikaguzo ki ebiina kugarukwamu?

²⁴ Kyonka okubatizibwa tikuli kwoga bwoga. Baitu eri  manyikirizo y’ekintu ekikuru muno. Kwibikwa hansi omu maizi kyeme’raho habw’okufa omu ngeso zawe eza ira. Okwibururwa kuruga omu maizi kyoleka, oyomezibwe okole Ruhanga eby’agonza. Kandi kijuke ngu oyehaireyo hali Yahwe Ruhanga wenka, hatali omulimo, rundi omuntu wena rundi ekitebe kyoona. Okwehayo kwawe n’okubatizibwa niyo ntandikwa y’obuganjaine obw’amaani na Ruhanga.—Zabuli 25:14.

²⁵ Okubatizibwa tikimanyisa ngu mu buli mulingo oina kutunga okujunwa. Omukwenda Paulo akahandiika: “Mukole’rege okujunwa kwanyu nimutiina nokutukumira.” (Abafiripi 2:12, NW) Okubatizibwa eri ntandikwa butandikwa. Ekikaguzo kiri, osobora ota kusigara omu kugonza kwa Ruhanga? Esuura yaitu ekusembayo nija kutuha eky’okugarukamu.