EKIKAGUZO 1
Ndi Muntu wa Mulingo Ki?
WAKUKOZERE KI?
Tekerezaaho kinu: Karen agenzere ha bugenyi. Atakamazire n’edakiika ikumi ahurra munywani we n’amweta.
“Kiki koyemeriire kwonka?”
Karen obwahinduka, arora munywani we Jessica akwasire ecupa ibiri. Karen akirora ngu munywani we akwasire ecupa za biya. Jessica amukwasa ecupa emu kandi amugamba, “Tokyali mwana muto, kwata naiwe onyweho!”
Karen agonza kwanga, baitu habwokuba Jessica munywani we, tarukugonza kumubiihiza. Karen ateekereza, Jessca amanyirwe nk’omu ha baisiki ab’engeso enungi. Nahabwekyo, Jessica obwaraaba n’anywa, nanyowe ninsobora kunywaho. Karen agamba, ‘kasita kuli kunywa bunywa.’
Kakuba niiwe Karen, wakukozere ki?
TEKEREZA HALI KINU!
Kusobora kucwamu kurungi, oine kuba n’oyemanya. Omuntu ayemanyire kurungi aba aine engeso enungi ezahondera kandi kimugumirra obwatahondera engeso zinu. Omuntu nk’ogu ayecweramu ekyarakora mukiikaro ky’okuleka abandi kumucweramu.—1 Abakolinso 9:26, 27.
Kiki ekirakukonyera kugumira hali ebi ebyomanyire ngu bihikire? Kugarukamu ebikaguzo ebirukuhonderaho nikiija kukukonyera.
1 BIRUNGI KI EBI NYEMANYIREHO?
Okumanya obusobozi bwawe n’emiringo yawe enungi kikukonyera okutegaya.
EKYOKURORRAHO KURUGA OMU BAIBULI: Omukwenda Paulo akahandiika n’agamba ati: “Baitu nobundi mudomadoma omu kubaza, tindi mudomadoma omu kumanya.” (2 Abakolinso 11:6) Paulo atatiine abamuhakanizaaga habwokuba akaba amanyire kurungi Ebyahandiikirwe. Ataikirize ebigambo byabo kumumaramu amaani.—2 Abakolinso 10:10; 11:5.
WEKEBERE OROLE: Handiika hansi hanu ekisembo ekyoine rundi ekintu eky’okora kurungi.
Yoleka hanu gumu ha miringo ennungi ey’oine. (Ekyokurorraho, n’ofaayo hali abantu abandi? ogaba? n’oyesigwa? Olinda obwire?)
2 BUZIBU KI OBU NYINE?
Omuntu arukwemanya kurungi amanya ebintu eby’atakora kurungi, baitu tibiri nibyo aikara n’atekerezaaho habwokuba aba akimanyire ngu ekyo nikisobora kumumaramu amaani.
EKYOKURORRAHO KURUGA OMU BAIBULI: Paulo akaba amanyire obuceke bwe. Akagamba ati: “Baitu ninsemere’rwa ebiragiro bya Ruhanga omu muntu womunda: baitu mboine ebiragiro ebindi omu bicweka byange, ebirukurwana nebiragiro ebyamagezi gange, kandi nibinfora omuhambwa hali ebiragiro ebyekibi, ebiri omu bicweka byange.”—Abarumi 7:22, 23.
WEKEBERE OROLE. Nyine buzibu ki obu nsemeriire kurwanisa?
3 BIGENDERERWA KI EBI NYINE?
N’osobora kutemba motoka okagambira omuvugi wayo kukwetorooza kuhikya amagita gahoiremu? Eki tikiba kintu eky’amagezi baitu kuba kusiisa sente!
Ekiturukwegamu? Obwoba oine ebigendererwa, kikukonyera kumanya eby’osemeriire kukora mukiikaro ky’okwikara ha kintu kimu. Baitu oba omanyire kurungi eky’orukugonza kukora n’omulingo orahikirizaamu ebigendererwa byawe.
EKYOKURORRAHO KURUGA OMU BAIBULI: Paulo akagamba: “Nanyowe nukwo nyiruka nti, tikuli nkanyakuhabahaba.” (1 Abakolinso 9:26) Mukiikaro ky’okutwarwa buli ekikaizire kyona, Paulo aketeraho ebigendererwa kandi akakora n’amaani kurora byahikirra.—Abafiripi 3:12-14.
WEKEBERE OROLE. Handiika hansi hanu ebintu bisatu eby’orukugonza kuhikiriza omu mwaka gumu.
4 BINTU KI EBINDUKWIKIRIRIZAAMU?
Obw’oba otarukugumya ngu ekintu kihikire, tokora encwamu ennungi. Nk’enyapimpina okwikara n’eyehindura erangi, naiwe noija kwikara n’ogendera ha biteekerezo by’abagenzi baawe kusobora kusisana n’abo—eki nikiija kwoleka ngu torukwemanya.
Omuntu arukwemanya kurungi ali nk’omuti ogwine emihama egumire. N’obuguteerwa omuyaga ogw’amaani, gusigara gwemeriire
Baitu obw’okora kusigikirra ha by’orukweikiririzaamu, kiba nikyoleka ngu noyemanya—kandi torukugendera ha by’abandi barukukora.
EKYOKURORRAHO KURUGA OMU BAIBULI: Nikisoboka ngu Danieri obwakaba akyali musigazi, “akamali’ra omu mutimagwe” kworobera ebiragiro bya Ruhanga n’obwaraaba yali atarukwikara n’abanyabuzaale be. (Danieri 1:8) Kinu kikamukonyera, kusigara ali muntu arukweikiririzaamu.
WEKEBERE OROLE. Bintu ki ebindukwikiririzaamu? Ekyokurorraho: N’oikiririza omuli Ruhanga? Obukiraaba nukwo kiri, habwaki? Bintu ki ebirukukugumya ngu Ruhanga aroho?
Nokiikiriza ngu Ruhanga eby’arukutwegesa ha bikwatiraine n’engeso nibitugasira? Obukiraaba nukwo kiri, habwaki?
Wakugondeze kuba muntu wa mulingo ki?—nk’ekikoora ekirukutwarwa omuyaga, rundi nk’omuti ogurukugumira ekiyaga ky’amaani? Weyongere kumanya eby’orukwikiririzaamu nukwo obe nk’omuti. Kinu nikiija kukukonyera kugarukamu ekikaguzo kinu, Ndi Muntu wa Mulingo Ki?
Nosobora Kugonza na Binu;
EBITEKEREZO KURUGA OMU BAGENZI BAWE
Ninyowe Oha?
Kumanya eky’okugarukamu eky’ekikaguzo kinu nikiija kukukonyera kusingura emitalibaine eyoratunga.
