Sitaani hamu na badaimoni baikaire n’itima kandi bakabi muno. Omu busumi bwa kara, Sitaani akaita igana hamu n’abaheereza b’omusaija omwesigwa Yobu. Hanyum akaita batabani be 10 obuyaleesere “ekiyaga kingi” ekyahwerekeriize enju eibakaba barumu. Hanyuma y’okukora eki, akaleetera Yobu “ebizimba ebyobujune okuruga ha mara gekigere nokuhikya ha [mutwe gwe].”—Yobu 1:7-19; 2:7.

Omu kasumi ka Yesu, badaimoni baleteraga abantu kufwa eminwa n’amaiso. (Matayo 9:32, 33; 12:22) haroho omusaija oubabonaboneseze kandi bamuleetera kwikara nayesara n’amabaale. (Marako 5:5) Badaimoni bakaleetera n’omusigazi kukunga, kumuteera hansi, obu natagurwa kubi muno.—Luka 9:42.

 N’omu kasumi kanu, Sitaani na badaimoni bakyali baisi nk’oku bakaba bali kuruga kara. Amananu gali, ebikorwa byabo ebibi byeyongiire kwiha banagwa kuruga omu iguru. Ripooti kuruga omu nsi yoona nizooleka obwakaiso oburukwoleka itima lye. Babonabonesa abantu obu nibabaleetera oburwaire. Babonabonesa abandi omu bwire bw’ekiro, nibabalemesa kubyama kandi babarootesa ebirooto ebibi. Abandi babahamba. Kandi abandi babagwisa iraro, babaleetera kwita rundi kweyita.

Lintina, arukwikara omu Suriname, nagamba ngu daimoni rundi omwoyo omubi gukaita abanyabuzaale be 16 kandi gwamubonabonesa omu mubiri n’omubiteekerezo kumara emyaka 18. Kusigikirra ha biyarabiremu nagamba ngu badaimoni “begondeza omu kubonabonesa abantu abatarukugonza kukoragana nabo kuhikya obu babaita.”

Baitu Yahwe n’asobora kulinda abaheereza be hali okutahirra kwa Sitaani.—Enfumo 18:10.