Badaimoni Bekambisa Abantu Kujeemera Ruhanga
Baitu habwaki Sitaani na badaimoni be bakora n’amaani kuhabisa abantu? Habwokuba nibagonza tubeteranizeeho omu bujeemu bwabo. Nibagonza tubaramye. Nibagonza twikiririze omu bisuba byabo kandi tukole n’ebintu ebya Yahwe atarukugonza. Ebintu nk’ebi nibitwarramu emigenzo enyakwine akakwate n’abafu.
Okufa kw’omugonzebwa kituleetera obusaasi bwingi n’okuganya. Hanyuma y’okufa kwa munywani we Lazaro, Yesu, ‘akarra amaizi.’—Yohana 11:35.
Haroho emigenzo nyingi enyakwine akakwate n’abafu, kandi n’eyahukana omu biikaro bingi eby’ensi. Eyerukukira obwingi tehakaniza emisingi ya Baibuli. Baitu emigenzo emu n’esigikirra ha ntekereza erukugamba ngu abafu boomiire kandi nibasobora n’okurora abomeezi. Kuraara ha murro, kurra ekihinguraine, hamu n’emikoro ey’okuziika ey’amaani byona nibikorwa habw’okutiina kubiihiza emyoyo y’abafu. Baitu nk’oku abafu batamanyire “kigambo nekimu,” abantu abakora emigenzo enu baba nibakurakuraniza ebisuba bya Sitaani.—Omugambizi 9:5.
Emigenzo endi rundi emikoro eruga omu ntekereza erukugamba ngu abafu nibetaaga obukonyezi kuruga hali abomeezi kandi kakuba batabasemeza nibaija kubahikyaho akabi. Omu nsi ezimu, bakora obugenyi rundi batekaniza ebihongwa hanyuma y’ebiro 40 rundi omwaka gumu omuntu afiire. Kinu bakikora kusobozesa omufu kwacwanganiza akagenda omu kiikaro eky’emyoyo. Omugenzo ogundi ogukanyire nukwo kuha abafu eby’okulya n’ebyokunywa.
Ebintu binu tibihikire habwokuba nibikurakuraniza ebisuba bya Sitaani ebirukukwata hali Abafu. Yahwe n’asobora kutusiima kakuba twejumbira omu migenzo erukusigikirra ha nyegesa za badaimoni? Nangwa!—2 Abakolinso 6:14-18.
Abaheereza ba Ruhanga ow’amananu tibejumbira omu migenzo yoona erukusagika ebisuba bya Sitaani. Oihireho, n’okugonza okwingi bateeka omutima ha kukonyera abomeezi n’okubahumuza. Bakimanyire ngu omuntu obwamara kufa, Yahwe nuwe wenka asobora kumukonyera.—Yobu 14:14, 15.
Ruhanga n’Anoba eby’Oburaguzi
Abantu abamu babaza na badaimoni rundi barabira omu muntu arukubandwa. Obu nubwo bwetwa oburaguzi. Voodoo, obufumu, amasano, kuragura eby’omu maiso, hamu n’okwekaguzaaho abafu byona bikorwa by’oburaguzi.
Baibuli ejumirra ebintu binu eti: “Hatalizoka naiwe omuntu wena . . . atera engisa, nobwakuba omuntu aragura ebiriija, nobwakuba omurogo, nobwakuba owamasano, nobwakuba omufumo, nobwakuba arukubandwa omuzimu, nebwekuba embandwa mali, nobwakuba akaguza abafiire. Baitu omuntu wena anyakukora ebigambo ebi nikyo kinugwa hali Mukama.”—Ekyebiragiro 18:10-12.
Habwaki Yahwe n’atutangira kimu ebikorwa ebi?
Yahwe n’atutangira kimu ebikorwa byona eby’oburaguzi habwokuba n’atugondeza ebirungi. Agonza kandi afaaho abantu, kandi akimanya ngu abo abejumbira omu bikorwa bya badaimoni babonabona.
Omu ha bantu ababonabonesiibwe badaimoni nuwe Nilda, ow’akaba n’abandwa emyoyo omu ihanga lya Brazil. Badaimoni bakamubonabonesa muno. Nagamba ati: “Emyoyo . . . ekantaahamu, yandagira ekyokukora. Obwire obumu nayetegerezaaga baitu obwire obundi nabaga ntakwetegereza, kandi naikaraga nintabuka omutwe. Badaimoni bampiganiza muno nahika na hakurwara ebinywa. Namiraga emibazi erukuleeta oturo kandi nkatandika n’okunywa amarwa n’etaaba buli kaire. Kinu kikamara emyaka nyingi.”
Obwire bukahika, habwobukonyezi bwa Yahwe hamu n’Abakaiso be omu nsi, Nilda akecwaho badaimoni kandi hati aine obwomeezi oburungi mali. Nagamba ati: “Nintererra boona ngu batalirengaho n’obugwakuba omurundi gumu gwonka, kuba n’akakwate n’emyoyo embi.”