Emyoyo eroho! Omu kiikaro eky’emyoyo ekitutarukurora n’amaiso, harumu emyoyo emirungi n’emyoyo emibi. Abo, bantu ababaireho omu nsi kandi hanyuma baafa?

Nangwa, tinukwo kiri. Omuntu obwafa, tagenda omu nsi ey’emyoyo nk’oku abantu baingi batekereza. Eki nitukimanya tuta? Habw’okuba Baibuli nikyo egamba. Baibuli kiri kitabu eky’amananu ekirukuruga hali Ruhanga omu ow’amananu, arukwetwa Yahwe. Yahwe akahanga abantu; nahabweki namanya kurungi kiki ekibahikaho obubafa.—Zabuli 83:18; 2 Timoseo 3:16.

Baibuli n’egamba ngu Ruhanga akakora omuntu ow’okubanza arukwetwa Adamu kuruga “omu cucu yitaka.” (Okubanza 2:7) Ruhanga akamuta omu kiikaro ekirungi muno, kandi oru nurwo orugonjo rwa Adeni. Kakuba Adamu yali ayorobiire ekiragiro kya Yahwe, akaba atarukwija kufa; yakubaire akyali mwomeezi omu nsi. Baitu Adamu obuyacwire ekiragiro kya Ruhanga akigenderiire, Ruhanga akamugambira ati: “Okuhikya obwoligaruka omu itaka; baitu omu nuho waihirwe: baitu oli cucu, kandi omu cucu numwo oligaruka.”—Okubanza 3:19.

Eki nikimanyisa ki? Banza oyekaguze, Adamu akaba ali nkaha Yahwe obwakaba atakamuhangire kuruga omu itaka? Busaho nambere akaba ali. Akaba atali mwoyo ogutakazairwe omu iguru. Akaba ataloho. Nahabweki Yahwe obuyagambire Adamu ngu “omu cucu numwo oligaruka,” akaba namanyisa ngu Adamu akaba naija kufa. Atagende omu kiikaro eky’emyoyo. Adamu obuyafiire, akaba atakyaine bwomeezi, atakyaloho. Okufa nukwo okutaba n’obwomeezi.

Baitu kandi abantu abandi abaafiire? Nabo tibaloho? Baibuli negamba ngu:

• “Byona [abantu n’ebisoro] bihika omu kiikaro kimu; byona biruga omu cucu, kandi byona bigaruka okufoka ecucu.”—Omugambizi 3:20.

• “Abafire tibamanyire kigambo nekimu.”—Omugambizi 9:5.

• “Nokugonza kwabu, nokunoba kwabu, nihali ryabu, byona bihoireho.”—Omugambizi 9:6.

• “Tiharoho mulimo, nobukwakuba okuhanura, nobukwakuba okumanya, nobugakuba amagezi, okuzimu nambere orukugenda.”—Omugambizi 9:10.

• “[Omuntu] agaruka hali itaka lye; Omu kiro eki ebitekerezobye nubwo bihwaho.”—Zabuli 146:4.

 Nikikugumira kwikiriza ebyandiikirwe binu? Obu kiraaba nukwo kiri, tekerezaaho kinu: Omu maka maingi, omusaija nuwe akora sente ezirasagika eka ye. Omusaija obwafa, eka ye eraba omu bizibu bingi. Obwire obumu mukazi we n’abaana be basigara bataine na sente ezirukumara kugura ebyokulya. Obwire obumu abanyanzigwa b’omusaija ogu babatalibaniza muno. Hati wekaguze: ‘omusaija ogu obwaraaba ayomiire omu kiikaro eky’emyoyo, habwaki atasobora kugumizaamu n’arolerra eka ye? Habwaki atasobora kulinda eka ye hali abantu ababi? Ensonga eri habwokuba ebyahandiikirwe bihikire. Omusaija takyali mwomeezi, taine eky’asobora kukora.—Zabuli 115:17.

Eki nikimanyisa ngu abaafiire tibalyongera kufooka bomeezi? Nangwa, tikirukumanyisa eki. Nitwija kubazaaho okuhumbuuka mumaiso. Oihireho nikimanyisa ngu abantu abaafiire tibamanyire eky’oliyo n’okora. Tibasobora kukurora, kukuhurra, rundi kubaza naiwe. Tosemeriire kubatiina. Tibasobora kukukonyera, kandi tibasobora kukukora kubi.—Omugambizi 9:4; Isaya 26:14.