MBAGANIZA ki eri mukisisani kinu? Ego, y’abantu abakirimu. Nibo omusaija n’omukazi ab’okubanza. Noha ayabahangire? Nuwe Ruhanga. Nomanya ibara lye? Niryo Yahwe. Kandi omusaija n’omukazi bakeetwa Adamu na Hawa.

Gunu nugwo omulingo Yahwe yahangiremu Adamu. Akakwata ecucu y’itaka yagikoramu omubiri gw’omuntu oguhikiriire. Hanyuma akamuhuhamu orwoya munyindo. Nukwo Adamu yaba mwomezi.

Yahwe Ruhanga akaha Adamu omulimo. Akagambira Adamu okuruka ebisoro byona amabara. Adamu akabanza kwetegereza ebisoro okumara akasumi nukwo asobole kubitungira amabara agabisemerire. Adamu obwakaba naruka ebisoro amabara, aketegereza ekintu kimu. Nomanya kikaba kiri kiki?

Buli kisoro kyali kiine kitaahi kyakyo. Hakaba haroho enjojo ensaija n’enkazi, entale ensaija n’enkazi. Baitu Adamu akaba ataine mutaahi we. Nukwo Yahwe yaletera Adamu oturo tw’amaani, yamwihamu orubaju. Arukukozesa orubaju oru, Yahwe akakorramu Adamu omukazi. Kandi onu akafooka mukazi we.

Kinu kakikasemeza muno Adamu! Cumitiriza omuhimbo Hawa ogu yatungire obu yatairwe omu rugonjo orurungi ruti kurwikaramu! Hati bakaba nibasobora okutunga abaana n’okwikara hamu mukusemererwa.

Yahwe akaba nagonza Adamu na Hawa kwomera ebiro byona. Akaba nagonza bafoole ensi yoona okuba nungi muno nk’orugonjo rwa Adeni. Adamu na Hawa kabakaba n’omuhimbo mwingi obu baagambiirwe okukora eki! Naiwe kyakukusemiize kubagana mukufoora ensi enu orugonjo orurungi? Baitu okusemererwa kw’Adamu na Hawa kutagumeho. Katurole habwaki?