KAKUBA otangatangana omuntu araihire muno kandi omutwe gwe niguhika mukasolya k’enju, wakutekerize ki? Ogu nuguba guntu! Mubwire obwaira hakaba haroho agantu ganu omu nsi. Baibuli neyoleka ngu bakazaarwa bamaraika kuruga omu iguru. Kinu kikabaho kita?

Ijuka ngu maraika onu omubi Setani akaba eyefubirire okutabura ebintu byona. Nahabwekyo akaba nayenda n’okujemesa bamaraika ba Ruhanga. Hanyuma yakasumi, abamu ha bamaraika bakatandika okuhuliriza Setani. Bakalekeraho kukora emirimo Ruhanga akaba abahaire omu iguru. Bakaija omu nsi, bayekorra emibiri nk’ey’abantu. Nomanya habwaki?

Baibuli egamba ngu abaana ba Ruhanga banu bakarora abakazi abarungi abaali omu nsi, babegomba kwikara nabo. Hanyuma bakaija omu nsi baswera abakazi banu. Baibuli egamba ngu kinu kikaba kibi muno, habwokuba Ruhanga akahanga bamaraika okwikara omu iguru.

Bamaraika obu bazairemu abakazi banu abaana, abaana banu baali bembaganiza. Hakubanza okaba otarukusobora kurora embaganiza yoona. Baitu bakeyongera okukura, okunyeeta muno, n’okuraiha n’okuba n’amaani maingi okuhikya obu bafookere agantu ag’amaani.

Ganu agantu gaali gabi muno. Gaali g’amaani muno, gakooto muno kandi gaali nigatuntuza abantu abandi. Gaali nigahambiriza buli muntu okukora nkago.

Obu, Enoka akaba amazire ira kufa. Kyonka hakaba haroho omusaija omu wenka owakaba ali murungi. Ibara lye nuwe Nuha. Akaba nakora Ruhanga ebyakaba nagonza.

Kiro kimu Ruhanga akagambira Nuha ngu obwire bwali buhikire obwokuhwerekerezamu abantu ababi boona. Baitu Ruhanga akaba nagenda kujuna Nuha n’amaka ge hamu n’ebisoro. Leka turole nkoku Ruhanga yakikozere.