ABANTU obu bayeyongire okukanya omunsi, baingi halibo bakakora ebintu ebibi nka Kaini. Baitu omusaija omu akaba ali w’embaganiza. Omusaija onu nuwe Enoka. Enoka akaba ali mumanzi. Abantu abali bamwehigulirize baali nibakora ebibi byonka, baitu Enoka akeyongera kuhereza Ruhanga.

Nomanya habwaki abantu baali nibakora ebintu ebibi? Noijuka noha ayaletiire Adamu na Hawa okujeemera Ruhanga, n’okulya ha muti ogu Ruhanga akaba abatangire? Ego, akaba maraika omubi. Baibuli emweta Setani. Kandi nalengaho okwohya buli muntu okuba mubi.

Kiro kimu Yahwe Ruhanga akagambira Enoka ngu agambire abantu ekintu eki bali batarukugonza kuhurra. Kikaba nikigamba kiti: ‘Kiro kimu Ruhanga nagenda kuhwerekereza abantu ababi boona.’ Abantu bakabihirwa muno kuhurra kinu. Basobora kuba balengereho n’okwita Enoka. Kyali nikyetagisa obumanzi hali Enoka kugambira abantu ekyo Ruhanga akaba nagenda kukora.

Ruhanga ataikirize Enoka kwomera omwanya muraira mu bantu ababi nkabo. Enoka akoomera emyaka 365 yonka. Habwaki nitugamba “emyaka 365 yonka”? Habwokuba abantu mubusumi obu baali b’amaani muno okukira aba hati. Bayomeraga emyaka nyingi. Manya Metusela mutabani wa Enoka akomeera emyaka 969!

Hanyuma y’okufa kwa Enoka, abantu bakeyongerra kimu okuba ababi muno. Baibuli negamba ngu ‘nokulengera kwona okwebitekerezo by’omutima gwabu kukaba kuli kubi, n’ensi yoona ekaijuramu obubi.

Nomanya habwaki ensi ekaba ijwiremu emihito mubiro ebyo? Habwokuba Setani akaba atungireyo omuhanda omuhyaka gw’okuleteramu abantu okukora ebintu ebibi. Nitwija kugwegaho.