EBINTU byona ebirungi ebi twine biruga hali Ruhanga. Akakora izooba kutuha ekyererezi obwire bwanyamusana, kandi omwezi n’enyunyuzi kutuhaho ekyererezi mu bwire bw’ekiro. Ruhanga akatukorra ensi enu tugiikalemuga.

Izooba, omwezi n’enyunyuzi hamu n’ensi tibiri nibyo Ruhanga yabandize kuhanga. Nomanya kintu ki ekiyabandize? Ruhanga akabanza kuhanga abantu abarukumusisana. Titurukusobora kubarora nkoku tutarukusobora kurora Ruhanga. Omu Baibuli abantu banu nibamanywa nka bamaraika. Ruhanga akakora bamaraika okwikara nawe omu iguru.

Maraika ow’okubanza Ruhanga ou yahangire akaba w’embaganiza muno. Akaba ali Mwana wa Ruhanga omuzigaijo. Akakora hamu na Ise ebintu ebindi. Akakonyera Ruhanga okukora izooba, omwezi, enyunyuzi hamu n’ensi yaitu.

Mubwire obu ensi ekaba nesisana eta? Okubanza busaho eyakubaire nasobora kwomera omu nsi. Ensi yoona ekaba ebutikirwe amaizi. Kyonka Ruhanga akagonza ensi ikarwemu abantu. Nukwo yatandikira kugitutegekera. Akakora ki?

Okubanza ensi ekaba n’eyetaaga ekyererezi. Nukwo Ruhanga yakora ekyererezi kuruga ha’izooba kwakira ensi. Akakikora ati nukwo hasobole kubaho obwire bwa nyamusana n’ekiro. Hanyuma Ruhanga akasobozesa ensi kuruga hansi y’amaizi ag’enyanja.

Okubanza hakaba hataroho kintu kyona hansi. Ekaba nesisana nkoku orukurora mu kisisani kinu. Hakaba hataroho bimuli, miti rundi bisoro. Hakaba hatarumu ncu mu nyanja. Ruhanga akaba aine omulimo gw’amaani kukora kufora ensi enu nungi habw’ebisoro n’abantu nukwo bagiikalemuga.