DORA ensi hanu! Dora nkoku esemiire muno! Dora obunyansi hamu n’emiti, ebimuli hamu n’ebisoro. Nosobora kukomamu enjojo hamu n’entale?

Orugonjo runu orurungi muno ruti rukabaho ruta? Katurole nkoku Ruhanga yatekaniize ensi enu habwaitu.

Okubanza, Ruhanga akakora obunyansi okumera hansi yoona. Hanyuma yahanga emiringo y’ebimera ebike, ebisaka hamu n’emiti. Ebimera binu bikonyera okufoora ensi enu kuzooka kurungi. Baitu bikiraho hali kinu. Ebingi hali binu bituha ebyokulya ebinura mahano.

Hanyumaho, Ruhanga akakora encu okwikara omumaizi n’ebinyonyi okuharrukira omu mwanya. Akakora embwa n’enjangu hamu n’embarasi. Ebisoro ebikooto n’ebitaito. Bisoro ki ebirukwikara haihi n’owanyu? Tikikutusemeza kumanya ngu Ruhanga akahanga ebintu binu byona habwaitu?

Hampero, Ruhanga akakora ekicweka kimu eky’ensi okuba eky’embaganiza. Ekicweka kinu akakyeta orugonjo Adeni. Rukaba ruli rurungi muno. Buli kintu kyona kyali kisemiire muno. Nukwo Ruhanga akaba nagonza ensi yoona kusisana nk’orugonjo orwakaba akozire.

Kyonka cumitiriza hali ekisisani eky’orugonjo runu. Nomanya eki Ruhanga yarozire ngu kibuziremu? Katurole.