YUSUFU akaikara omunkomo okumara emyaka endi ebiri. Omwambukya taramwijukiire kimu. Hanyuma, ekiro kimu Faraho akaroota ebirooto bibiri eby’omugaso muno, kandi akagonza muno okumanya amakuru gabyo. Nomurora nkoku abyamire? Obwire obu bwakiire, Faraho akeeta abasaija be boona abagezi yabarotorra eki akaba aroosire. Baitu batasobole kumusoborra amakuru g’ebirooto bye.

Mu kasumi kanu nubwo omwambukya yaijukire Yusufu. Yagambira Faraho: ‘Obu nkaba ndi munkomo, hakabayo omusaija eyasoboire kundotorra ebirooto byoona.’ Mubwangu Faraho akatuma baleete Yusufu kuruga munkomo.

Faraho akagambira Yusufu ebirooto bye: ‘Nkarora ente musanju kandi zaali igomokere. Hanyuma narora ente musanju ezidodokere. Kandi ente embi zikalya ente enungi.’

‘Omu kirooto ekyakabiri, nkarora entwe musanju z’engano ezinyesere. Hanyuma narora entwe musanju ezindi enke. Kandi entwe zinu zatandika kumira entwe musanju ezinyesire ez’engano.’

Yusufu akagambira Faraho ati: ‘Ebirooto byombi nibimanyisa ekintu kimu. Ente musanju ezigomokere n’entwe musanju enungi nibimanyisa ngu halibaho emyaka musanju y’omweru omwingi omu Misiri, n’ente musanju ezanukiire hamu n’entwe musanju embi ez’engano nikimanyisa ngu halibaho n’emyaka endi musanju. Halibaho emyaka musanju ey’omweru omu Misiri. Hanyuma haligarukaho emyaka musanju endi ey’ibura ly’ebyokulya.’

Hampero, Yusufu yagambira Faraho: ‘Okome omusaija owa magezi omuteke mukusoroza ebyokulya mumyaka musanju ey’omweru. Kinu kikaba nikiija kukonyera abantu obutafa mubwire bw’enjara obw’emyaka musanju eyakukurasireho.’

Faraho akasiima ekitekerezo kinu. Nukwo yakoma Yusufu okusooroza ebyokulya n’okubihunika. Yusufu akafooka owakabiri hali Faraho.

Hanyuma y’emyaka munaana, mubwire bw’enjara, Yusufu akarora abasaija nibaija. Nomanya bakaba nibaha? Baali bagenzi be 10! Isebo Yakobo akaba abatumire omu Misiri habwokuba ebyokulya byaali bibakehereho omu Kanani. Yusufu akabetegereza, baitu bo batasobole kumumanyirra. Nomanya habwaki? Habwokuba Yusufu akaba akuzire kandi ajwaire ebijwaro eby’embaganiza.

Yusufu akaijuka ebi yaroosire obu akaba akyali musigazi ngu bagenzi be nibaija nibamwinamira. Nokijuka ngu okakisomaho? Yusufu akamanya ngu Ruhanga nuwe akaba amuherize omu Misiri ha bw’ensonga nungi. Hati kiki Yusufu eki yakozire? Katurole.