NOMANYA omukazi onu anyakuli omu kisisani? Ibara lye nuwe Rebeka. Kandi omusaija owarukwija kutangatangana nuwe Isaka. Nagenda kuba mukazi we. Kinu kikabaho kita?

Ise Isaka, Iburahimu, akagonza atungire mutabani we omukazi omurungi. Atagonze Isaka kuswera abakazi ab’omu nsi ya Kanani, habwokuba abantu banu baali nibaramya baruhanga ab’ebisuba. Iburahimu akeeta omwiru we yamutererra ngu: ‘Ningonza ogarukeyo Harani mubene baitu, otungire mutabani wange Isaaka omukazi.’

Omwiru wa Iburahimu akatwara engamira ikumi yatandikiraho orugendo. Obu yahikire haihi abanyabuzaale ba Iburahimu nambere baali nibaikara yayemerra ha iziba. Bwali bwire bw’orwebagyo, obwire abakazi ab’omurubuga obu batahiramu amaizi. Omwiru wa Iburahimu yasaba Yahwe: ‘Nkanihire omukazi arantahira amaizi hamu n’engamira zange araba ogu owokomere kuba mukazi wa Isaka.’

Mubwire obu, Rebeka akaija kutaha amaizi. Omwiru nukwo kumusaba amaizi g’okunywa, nukwo kugamuha. Aho Rebeka akagenda omu maiso n’okutahira engamira zoona amaizi ezikaba ziine iroho. Gunu gukaba guli mulimu gw’amaani habwokuba engamira enywa amaizi maingi muno.

Rebeka abu yamazire kukora ebi byoona, omwiru wa Iburahimu nukwo kumukaguza ibara lyaise. Kandi akamusaba arale owabu. Akamugambira ati: “Ibara lyaise nyowe nuwe Besueri, kandi haroho ekissika nambere hosobora kurara.” Omwiru wa Iburahimu akamanya ngu Besueri akaba ali mwana wa mugenzi wa Iburahimu arukwetwa Nahora. Omwiru akateeza amaju yasiima Yahwe habw’okumwebembera kumuhikya ha banyabuzaale ba Iburahimu.

Mu kiro ekyo, omwiru wa Iburahimu akagambira Besueri na munyanya wa Rebeka, Labani kiki ekyali kimulesiire. Boona bakaikiriza ngu Rebeka agende nawe aswerwe Isaka. Rebeka, obu bamukagwize akagamba ki? Akagarukamu ati: ‘Ego,’ akaba nagonza kugenda. Nahabwekyo ekiro ekyakurasireho, bakatemba engamira batandika orugendo rwabo okugaruka omu Kanani.

Bakahika Kanani mu rwebagyo. Rebeka akarora omusaija narubata omu musiri. Akaba ali Isaka. Akasemererwa muno kurora Rebeka. Nyina wa Isaka akaba amazire emyaka esatu afiire, akaba akyaali mubujune. Baitu Isaka akagonza muno Rebeka kandi yagarukamu kuba muntu w’omuhimbo nk’ogwakara.