DORA hati ekiri hanu! Ogu nuwe Musa n’omwigo gwe agugoroire h’amaizi ag’Enyanja Erukutukura. Abo abali nawe ha rubaju nibo Baisareri. Baitu Faraho n’amahe ge goona bakafeera omunyanja. Katurole nkoku kyabaireho.

Nkoku twayegere, Faraho akagambira Abaisareri kuruga omu Misiri hanyuma ya Ruhanga okuleta emihito 10 hali Abamisiri. Abasaija b’Abaisareri nka 600,000 nubo barugireyo hamu n’abakazi, n’abaana. Otaireho n’ekitebe ekikooto ky’abantu abandi abakaba bafookere Abaikiriza omuli Yahwe, nabo bakarugayo hamu n’Abaisareri. Bakarugayo n’entaama, n’ente hamu n’embuzi zabu.

Obu bakaba batakarugire omu Misiri, Abaisareri bakasaba aba Misiri okubaha ebijwaro n’ebintu ebya zabbu hamu n’efeeza. Abamisiri bakaba batiinire muno habw’omuhito ogwa hampero ogwali gubaireho. Nahabwekyo bakahayo kyoona eki Abaisareri baali nibasaba.

Hanyuma y’ebiro bike, Abaisareri bakahika ha Nyanja Erukutukura. Aho nuho bahumuliire. Omu bwire obu, Faraho n’abasaija be bakaba nibeijukya habwaki baikirize Abaisareri okubarugaho. ‘Tulekere abairu baitu okugenda!’ nukwo bagambire.

Faraho akahinduraho ekitekerezo kye. Akatekaniza amagali ge ag’obulemu hamu n’abamahe ge. Yatandika kuhambya Abaisareri n’amagali 600 agaali marungi muno hamu n’amagali agandi agaali omu Misiri.

Abaisareri obu baboine Faraho n’amahe ge, nibabasemberra, batiina muno. Baitu hali hataroho h’okwirukira. Enyanja Erukutukura orubaju orumu n’Abamisiri abakaba orubaju orundi. Baitu Yahwe akateka ekicu hagati y’abantu be n’Abamisiri. Nahabwekyo kinu kikagumira muno Abamisiri okurora Abaisareri n’okubarumba.

Yahwe akaragira Musa okwimukya omwigo gwe hali Enyanja Erukutukura. Obu yakikozire, Yahwe akaleeta ihunga ly’amaani. Likateera amaizi ag’enyanja, nukwo kwebaganizamu, n’okusigara gemerire ha mbaju zombi.

Abaisareri bakatandika kuraba omunyanja haitaka eryomere. Kikatwara omwanya obukaikuru n’obukaikuru bw’abantu boona kucwanganiza enyanja hamu n’ebisoro byabo. Obu Abamisiri bagarukire kurora Abaisareri, abairu baabu baali babagenzireho ira! Nukwo kwirukira mu nyanja banguhe basobole kubakwata.

Obu bakozire kinu, Ruhanga akaihaho enyamuziga za magali gabu. Nahabwekyo Abamisiri bakatandika kutiina muno n’okukunga ngu: ‘Yahwe narwanirra Abaisareri. Katwiruke tugaruke enyuma!’ Baitu kikaba kitakyasoboka nakake.

Omu kasumi kanu nuho Yahwe yagambiire Musa kugorra omwigo gwe hali Enyanja Erukutukura nkoku murukurora omukisisani. Musa obu yakikozire ati, ebisiika by’amaizi bikagaruka, byaterana byahwerekereza Abamisiri boona, n’amagali gabu. Busawo n’omu h’Abamisiri ayakizireho!

Abantu ba Ruhanga kabakaba n’omuhimbo gwa mani muno habw’okukizibwaho! Abasaija bakazina ekizina eky’okusiima Yahwe bati: ‘Yahwe asingire obulemu obw’ekitinisa. Anagire embarasi hamu nabazibaireho omunyanja.’ Munyanya Musa, Miryamu akakwata ijugo lye hamu n’abakazi boona bamukurata hamu n’amajugo gabu. Nibazina n’omuhimbo, nibazinira hamu ekizina eky’abasaija eki baali nibazina: ‘Yahwe asingire obulemu bw’ekitinisa. Anagire embarasi hamu nabo abazibaireho omu nyanja.’