NOMANYA abasaija banu Yakobo abarukubaza nabo? Hanyuma y’orugendo orw’ebiro bingi, Yakobo akasanga abasaija abo ha iziba. Baali nibeesera entaama zabo. Yakobo akabakaguza: ‘Nimuruga nkaha?’

Bamugarukamu, ‘Harani.’

Yakobo yagaruka kubakaguza ati; ‘Nimumanya Labani?’

Bagarukamu bati: ‘Ego. Dora na muhara we Rakeri naija nigana ly’entaama.’ Nosobora kurora Rakeri naija?

Yakobo obu yarozire Rakeri hamu n’entaama za nyinarumi Labani, akagenda yaihaho ibale ha munwa gw’iziba nukwo entaama zisobole kunywa amaizi. Hanyuma Yakobo akanywegera Rakeri kandi yamweyanjurra. Rakeri akasemererwa muno, akairuka yagaruka omuka kugambira ise Labani.

Labani akasemererwa muno okwikara na Yakobo. Yakobo obu yasabire ngu aswere Rakeri, Labani akakisemerererwa. Baitu akasaba Yakobo okumulimira omu musiri gwe okumara emyaka musanju nukwo amuhe Rakeri nk’omukazi we. Habwokuba Yakobo akaba nagonza muno Rakeri kinu akakikora. Baitu akasumi obu kahikire Yakobo kutahya Rakeri, nomanya kiki ekyabaireho?

Labani akaha Yakobo omuhara we omukuru Leya mukikaro kya Rakeri. Yakobo akaikiriza kumukorra emyaka endi musanju, nubwo Labani yamuhaire Rakeri nk’omukazi we. Mu biro ebyo Ruhanga akaba naikiriza abasaija kuswera abakazi abarukukira hali omu. Baitu hati Baibuli eyoleka ngu omusaija aine kuba n’omukazi omu wenka.