DORA omwojo onu nkoku aine obujune kandi atuntwire muno. Onu nuwe Yusufu. Bagenzi be baali bamazire ira kumuguza hali abasaija abo ababaka nibagenda Misiri. Yusufu naija kufoorwa omwiru rubale. Habwaki abaana baise banu bakozire ekintu kinu ekibi? Habwokuba bakamukwatirwa ihali.

Isebo, Yakobo akaba nagonza Yusufu muno. Kinu akakyoleka n’okumukorra ekanzu enungi muno. Bagenzi be 10 obu baroziire nkoku Yakobo arukugonza Yusufu, bakatandika kumukwatirwa ihali n’okumunoba. Baitu hakabaho n’ensonga endi habwaki bamunobire.

Yusufu akaroota ebirooto bibiri. Mu birooto binu ebya Yusufu hakaba harumu ekirikwoleka ngu bagenzi be baali nibamwinamira. Yusufu obu yaarotoriire bagenzi be, obwiko bwabwo bukeyongerra kimu.

Kiro kimu bagenzi ba Yusufu abakuru obu bakaba nibaliisa entaama za isebo, Yakobo akasaba Yusufu okugenda okurora nkoku bali. Bagenzi be obu bamulebere naija, abamu bakagamba bati: ‘Katumwite!’ Kyonka Reubeni mukuru wabu akagamba ngu: ‘Nangwa, mutakora ekyo!’ Kwihaho bakamukwata bamunaga omu kiina omukaba mutali maizi. Hanyuma bakaikarra hansi nukwo bacwemu ekibaramukora.

Mukasumi ako, Abaisameri bakaba nibarabaho. Nukwo Yuda kugambira bagenzi be ati: ‘Katumuguze Abaisameri.’ Kandi kinu nikyo bakozire. Bakatunda Yusufu ebicweka by’efeeza 20. Eki bakozire kakikaba kintu ekitakwoleka mbabazi hamu n’ekisa!

Aboojo banu baakugambiire ki isebo? Bakaita embuzi, baibika ekanzu ya Yusufu omusagama yayo. Bagitwarra isebo Yakobo n’okumugamba: ‘Dora ekitusangire. Gyetegereze kurungi orole bweraba etaali niyo kanzu ya Yusufu.’

Yakobo obu yagyetegerize yasanga ngu niyo. ‘Enyamaiswa n’ezooka kuba emwisire,’ akarra muno. Kinu nikyo bagenzi ba Yusufu bagondeze isebo okwikiriza. Yakobo akatuntura muno. Akamara ebiro bingi nacura. Baitu Yusufu akaba atafiire. Katurole kiki ekyamuhikireho nambere bamutwaire.