DORA eki omusaijja ogu arukuziika omuhema ye! Orugoye orurungi, n’ezabbu hamu n’ebicweka by’efeza. Akaba abihire omu rubuga orwa Yeriko. Beitu kiki ekikaba kine kukorwa ebintu ebyomu Yeriko? Noijuka?

Bikaba biine kuhwerekerezebwa, baitu zabbu n’efeeza bikaba biine kutekebwa mulyahurro ly’ehema ya Yahwe. Nahabwekyo abantu banu bakaba bajemiire Ruhanga. Bakaba baibire ebintu bya Ruhanga. Ibara ly’omusaija onu nuwe Akani, n’abo abakaba alinabo baali bantu b’omu nju ye. Leka turole ekyabaireho.

Akani obu yamazire kwiba ebintu binu, Yosuha akatuma abamu ha basaija kurwanisa orubuga orwa Ai. Baitu bakasingurwa muno n’abamu baitwa n’abandi bairuka. Yosuha akahurra kubi muno. Akajumara hansi n’okusaba Yahwe ati: ‘Habwaki olekere ekintu kinu okutubaho?’

Yahwe akagarukamu ati: ‘Imuka hansi! Abaisareri basiisire. Batwaire ebintu ebikaba biine kuhwerekerezebwa n’ebikaba biine kutekebwa mu lyahurro ly’ehema ya Yahwe. Baibire orugoye orurungi barwahura munsita. Tindisobora kubaha mugisa kwihaho mumazire kukihwerekereza n’ogu eyabitwaire.’ Yahwe akagamba ngu naija kwoleka Yosuha omusaija ou akaba ali ogu omubi noha!

Hanyuma Yosuha akasoroza abantu boona hamu. Yahwe akasororamu omusaija omubi Akani. Nahabwekyo Akani akagamba ati: ‘Nsiisire, nkarora orugoye orurungi muno n’empanu y’ezabbu n’efeeza nabyegomba muno nabitwara. Nimwija kubisanga mbizikiire muhema yange.’

Obu ebintu binu byoona byazoirwe bikaleterwa Yosuha. Akagambira Akani ati: ‘Habwaki watuletiire emihito enu yoona? Hati Yahwe naija kukusasura habwebyo byoona ebi watuletiire!’ Ekyakurasireho, abantu bateera Akani n’amaka ge goona amabale okuhikya obu bafiire. Kinu tikikutwoleka ngu titwine kutwara ekintu kyoona ekitali kyaitu?

Hanyuma y’ebyo Abaisareri bakagarukayo kuramagira Ai. Baitu omurundi gunu, Yahwe akakonyera abantu be okusingura obulemu.