ORAHULIREYO enkaina erukubaza? Nosobora kugamba oti: ‘Nangwa, ebisoro tibirikusobora kubaza.’ Baitu Baibuli etugambira ha nkaina eyabalize. Katurole nkoku kyabaireho.

Abaisareri bakaba bali haihi kutaaha omu nsi ya Kanani. Baraka, omukama wa Moabu, akatiina muno Abaisareri. Akatuma omusaija ow’amagezi muno owakaba nayetwa Baramu kukyena Abaisareri. Baraka akamunihiza sente nyingi muno. Nahabwekyo Baramu akatemba enkaina ye okugenda kwitirana Baraka.

Yahwe atagonze Baramu okukyena abantu be. Nikyo yatumiire maraika na busitama enyakuraihire okwemerra omu muhanda kutanga Baramu. Baramu akaba atarukusobora kurora maraika, baitu enkaina ekaba n’emurora. Nahabwekyo, enkaina ekaba negonza kwetantara maraika n’okukubutuka. Hampero ekabyama hansi mu muhanda. Kinu kikabihiza muno Baramu nukwo kuteera enkaina ye n’omwigo.

Yahwe akasobozesa Baramu okuhurra enkaina ye n’ebaza nawe eti: ‘Nyowe nkukozere ki nukwo ontere oti?’ nukwo enkaina yakagwize.

Baramu nukwo kugamba ati: ‘Onfoire nk’omuntu ataine magezi. Kakuba mbaire na busitama yange nakukwisire.’

“Ndakukozere kintu nka kinu?” enkaina emukaguza.

Baramu agarukamu ati: “Nangwa.”

Hanyuma Yahwe akaigura amaiso ga Baramu garora maraika na busitama ayemerire omu muhanda. Nukwo maraika kugamba ati: ‘Habwaki otiire oti enkaina yawe? Nyizire kukutanga obutagenda kukyena Isareri. Kakuba enkaina yawe tenyehugwire kuruga omu muhanda, nakukwisire, baitu nindeka enkaina yawe nyomezi.’

Baramu nukwo kugarukamu ati: ‘Nsiisire, mbaire ntamanyire ngu oyemerire omu muhanda.’ Maraika aleka Baramu okugenda okwitirana Baraka. Kandi akeyongera kulengaho okukyena Isareri, baitu mikiikaro ky’emikyeno, Yahwe akamuletera kuha Isareri emigisa emirundi esatu.