ORARAGANIZE ekintu kyoona kandi okasanga kigumire okukihikiriza? Omusaija ow’orukurora omukisisani akakikora, kandi niyo nsonga habwaki taine kusemererwa kwoona. Omusaija onu nomucwi w’emisango emanzi mu Isareri. Nayetwa Yefuta.

Yefuta akomeera omubwire obu Abaisareri bakaba batarukuramya Yahwe. Bakaba nibakora ebibi byonka. Nukwo Yahwe yabalekera Abamoni okubarumya. Kinu kikaleetera Abaisareri okukungira Yahwe bati: ‘Tukusisire muno. Bambi tujune!’

Abantu bakatuntura muno habwebyo ebi bakaba bakozire. Bakoleka okusalirwa kwabo nibagarukira kuramya Yahwe. Hati Yahwe agaruka abakonyera.

Yefuta akakomwa abantu okurwana n’Abamoni abaali babi muno. Yefuta akagonza muno obukonyezi bwa Yahwe mu bulemu. Nubwo yaraganize Yahwe ati: ‘Kakuba ompa obusinguzi hali Abamoni, omuntu ow’okubanza araruga omu nju yange okwija kuntangirra obu ndigaruka n’obusinguzi ndimukuha.’

Yahwe akahurra okweraganiza kwa Yefuta kandi akamukonyera kutunga obusinguzi. Nomanya Yefuta obu yagarukire omuka noha ayamutangiriire? Akaba muhara we. Nuwe wenka akaba aine! ‘Zimboine mwana wange!’ nukwo Yefuta yalizire. ‘Ondetiire okutuntura muno. Baitu nkaraganiza Yahwe, tinsobora kukihingisa.’

Muhara wa Yefuta obu yakimanyire okubanza akahurra kubi muno. Kikamanyisa ngu akaba aine kuleka ise hamu n’abanywani be. Akaba aine okumara obwire bwoona nahereza Yahwe mu nju y’okusorrokaniramu omu Silo. Nukwo kugambira ise ati: ‘Obworaba waraganize Yahwe oine kukihikiriza.’

Muhara wa Yefuta nukwo kugenda Silo okumara obwomezi bwe bwoona nahereza Yahwe omu nju y’okusorrokaniramu. Ebiro bbina buli mwaka abakazi ba Isareri bagendaga kumubungira n’okubaza nawe. Abantu bagonzaga muno muhara wa Yefuta habwokuba akaba muhereza wa Yahwe murungi.