ONU omwojo tarukuzooka kurungi? Ibara lye nuwe Samuiri. Omusaija ogu anyakutaire omukono ha mutwe gwa Samuiri nuwe nyakatagara omukuru Eri. Kandi ogu ondi nuwe Erekana, ise wa Samuiri kandi nyina akaba nuwe Hana abaali balesere Samuiri hali Eri.

Samuiri akaba ali nk’ow’emyaka ena rundi etano ey’obukuru. Hati akaba nagenda kwikara omu nju ya Yahwe ey’okusorrokaniramu hamu na Eri n’abanyakatagara abandi. Habwaki Erekana nahayo omuntu omuto ati nka Samuiri kuhereza Yahwe omu nju y’okusorrokaniramu? Leka turole.

Mu myaka y’enyuma kinu kitakabaireho, Hana akaba muntu atuntwire muno. Ensonga ekaba ngu akaba atarukusobora kuzaara omwana, kandi akaba nagonza muno okutunga omwana. Kiro kimu obu akaba abungiire enju y’okusorrokaniramu eya Yahwe, akasaba ati: ‘Ai Yahwe otanyebwa! Kakuba nompa omwana omwojo, nindaganiza ngu ninyija kumukuha akuhereza obwomezi bwe bwoona.’

Yahwe akagarukamu okusaba kwa Hana, kandi mu myezi eyakurasireho akazaara Samuiri. Hana akagonza muno omwojo onu, kandi akatandika kumwegesa ebirukukwata hali Yahwe obwakaba akyali muto muno. Akagambira iba ati: ‘Samuiri obu aliba mukuru kandi obu atakyetaaga kurolererwa, ninyija kumutwara omu nju y’okusorrokaniramu asobole kuhereza Yahwe.’

Kinu nikyo turukurora Erekena na Hana nibakora omu kisisani. Habwokuba Samuiri akaba eyegesiibwe kurungi abazaire be, akatunga omuhimbo gw’amaani okuhereza Yahwe muhema ye. Buli mwaka, Hana na Erekana baijaga kuramya Yahwe muhema ye ey’embaganiza n’okubungira omwana wabu. Kandi buli mwaka Hana yaleterega Samuiri ekanzu.

Emyaka obu yagenzire nehinguraho, Samuiri akeyongera kuhereza Yahwe omunju y’okusorrokaniramu, Yahwe n’abantu bakamugonza muno. Baitu batabani ba Eri, nyakatagara omukuru, Hofuni na Fenehasi, bakaba batali barungi. Bakaba nibakora ebintu bingi ebibi. Nokuletera abandi engeso z’obutahurra Yahwe. Eri akaba aine kubabinga kuruga habwa nyakatagara, baitu kinu atakikole.

Samuiri omuto ataikirize ebibi ebikaba nibikorwa mu nju y’okusorrokaniramu kumulemesa kuhereza Yahwe. Habwokuba bake abakaba mali nibahereza Yahwe, kikaba kitwaireho akasumi Yahwe atarukugamba na muntu wena. Obu Samuiri yakuzireho kinu nikyo kyabaireho.

Samuiri akaba abyamire omunju y’okukusorrokaniramu nubwo iraka lyamwimukize. Yagarukamu ati: ‘Ndi hanu.’ Nukwo yaimuka n’okwirukira owa Eri yamugambira ati: ‘Onyesere kwija, ndi hanu.’

Eri yamugamba ati: ‘Tinkwesere, garukayo obyame.’ Samuiri yagarukayo.

Hanyuma hakabaho iraka, omurundi ogwakabiri liti: ‘Samuiri!’ Nukwo Samuiri kwimuka n’okwirukira owa Eri. ‘Onyesere nyizire.’ Nukwo Eri yagarukamu ati: ‘Tinkwesere, garukayo obyame.’ Samuiri yagarukayo.

‘Samuiri!’ iraka lyayeta omurundi ogwa kasatu. Nabwo Samuiri yairukira owa Eri ati: ‘Ndi hanu. Nikizooka obwire buno onyesere,’ nukwo yagambire. Eri akamanya aine kuba Yahwe nuwe akaba namweta. Nukwo kugambire Samuiri ati: ‘Genda obyame, obu arayeta obundi oine kugarukamu oti: “Gamba Yahwe, omuhereza wawe nahurra.” ’

Kinu nikyo Samuiri yagambire obu Yahwe yagarukire kweta. Yahwe akagambira Samuiri ngu akaba nagenda kufubira Eri n’abatabani be. Hanyuma Hofuni na Fenehasi bakagenda omubulemu n’Abafirisiti, kandi obu Eri yahuliire ebibaireho, akagwa hansi yacweka engoto, nawe yafa. Ekigambo kya Yahwe kikahikirra.

Samuiri akakuru, n’okuba omucwi w’emisango owa Isareri ow’ahamperu. Obu yagurusire, abantu nukwo kumugamba bati: ‘Tukomere omukama atuleme.’ Samuiri akaba atarukugonza kukikora habwokuba Yahwe akaba nuwe ali mukama wabu. Baitu Yahwe akamugamba kuhuliriza abantu.