NOMANYA ibara ly’omu saija ow’amaani maingi muno ayali abaireho? Ibara lye nuwe Samusoni. Akaba ali mucwi w’emisa ngo. Yahwe nuwe yamu haire amaani. Samusoni obwakaba atakazairwe, Yahwe akagambira nyina ati: ‘Omukasumi akatali ka hara, noija kuzaara omwana w’obwojo. Naija kwebembera kujuna Abaisareri kuruga h’Abafirisiti.’

Abafirisiti bakaba babi muno abakaba nibaikara Kanani. Bakaba baine abarwani baingi kandi bakaba nibarumya n’okusaaliza Abaisareri. Omurundi gumu, Samusoni akaba nagenda nambere Abafirisiti bakaba nibaikara. Entale enkoto ekaija n’ebubura kumwitirana. Baitu Samusoni akagiita n’engaro ze zonka. Akaita n’Abafirisiti ababi baingi muno.

Hanyuma akagonza omukazi ow’ibara Derira. Abakuru b’Abafirisiti bakanihiiza Derira ebicweka by’efeeza 1,100 buli omu kakuba Derira yakubagambiire kiki ekiretera Samusoni kuba n’amaani mangi. Derira akaba nagonza sente ezo zoona. Atabe munywani wa Samusoni ow’amananu n’obu bakuba abantu ba Ruhanga. Akaguma nakaguza Samusoni kiki ekimuletera kuba n’amaani.

Hanyuma, Derira akasobora kusonasona Samusoni kumugambira nambere amaani ge garuga. ‘Orumwiso tirukarabaga omu mutwe gwange,’ nukwo yamugambiire. ‘Kuruga obu nazairwe, Ruhanga akankoma okuba muhereza we ow’embaganiza arukumanywa nk’Omunaziri, kakuba isoke lyange lisarwa, obu nimburwa amaani gange.’

Derira obu yakimanyire akagwijagiza Samusoni ha bibero bye. Nukwo yayeta omusaija yaija, yamusaramu isoke. Samusoni obu yasisimukira akaba atakinyine amaani ge. Abafirisiti bakaija bamukwata bamutwara. Bakamwihamu amaiso ge goona n’okumufoora omwiru wabu.

Kiro kimu Abafirisiti bakaba baine obugenyi bw’okuramya ruhanga wabu Dagoni. Bakaleeta Samusoni kuruga omunkomo kumusekereza. Mu bwire obu isoke lya Samusoni lyali likuzire. Samusoni nubwo yagambiire omwojo akaba amwebembiire amukwasire ha mukono ati: ‘Leka nkwateho ha mpagi ezikwatiriire enju.’ Hanyuma Samusoni akasaba Yahwe okumuha amaani nukwo yakwata ha mpagi. Niraka likoto yayami’ra: ‘Leka nfere hamu n’Abafirisiti.’ Hakaba haroho Abafirisiti 3,000 ha bugenyi bunu. Samusoni obu yainamire n’amaani ge goona hali empagi ez’enju, ekagwa, yaita abantu banu boona ababi.