HANYUMA ya Daudi okutandika kulemera omu Yerusalemu, Yahwe akaha amahe ga Daudi obusinguzi bw’amaani hali abanyanzigwa babu. Yahwe akaba anihiize okuha ensi ya kanani hali Abaisareri. Habw’obukonyezi bwa Yahwe, ensi yoona eyekaba eraganiziibwe ekafookera kimu yabu.

Daudi akaba ali mulemi murungi. Akaba nagonza muno Yahwe. Ekintu ky’okubanza kukora obu yaamazire kuhamba Yerusalemu nukwo kuleta esanduuko y’endagano ya Yahwe omu Yerusalemu. Akagonza n’okwombeka Yekaru nuho agiteke.

Daudi obu yakuzire, akakora ensobi y’amaani. Daudi akaba amanyire ngu kibi muno kutwara ekintu ekitali kyawe. Baitu rwebagyo rumu, obwakaba ali haiguru y’ekikaali kye, akarora hansi omukazi omurungi muno. Ibara lye niwe Basiseba, kandi iba akaba ali omu h’abasirikale be ayayetwaga Uliya.

Daudi akagonza muno Basiseba. Akatuma nukwo bamumuletera omu kikali kye. Iba akaba ali omubulemu narwana. Daudi akabyama nawe. Hanyuma akesanga nagenda kuzaara omwana. Kinu kikatuntuza muno Daudi. Nukwo yatumaho Yowabu omukuru wa mahe ngu bateeke Uliya mu maiso mubulemu, nukwo asobole kwitwa. Uliya obu yafiire, Daudi akaswera Basiseba.

Yahwe akabihirirwa muno Daudi. Nahabwekyo akamutumira Nasani amugambire ekibi kye. Nosobora kurora Nasani nabaza na Daudi. Daudi akaganya muno habwekyo ekyakaba akozere, nahabwekyo Yahwe taramwisire. Baitu Yahwe akagamba ati: ‘Habwokuba okozire ebibi binu byoona, olitunga emitalibaine omunju yawe.’ Ka mitalibaine y’amaani ei Daudi yatungire!

Ekyokubanza, mutabani wa Basiseba ow’okubanza akafa. Hanyuma omutabani wa Daudi ow’okubanza Amunoni akasanga Tamali munyanya we ali wenka, yamuhamba. Ekikorwa kinu kikabihiza Abusalomu mutabani wa Daudi ondi nukwo kwita Amunoni. Hanyuma, Abusalomu akasikiriza abantu baingi muno kumukuratira kandi yayerangirra ngu nuwe omukama. Hanyuma, Daudi akasingura obulemu kandi Abusalomu yaitwa. Ego, Daudi akatunga emitalibaine nyingi.

Hagati yabinu byoona, Basiseba nuho yazaliire omwana ow’obwojo ou yarukire ibara Sulemani. Daudi obu yagurusire kandi n’okurwara, mutabani we arukwetwa Adoniya akalengaho kwefoora mukama, baitu Daudi akagamba nyakatagara arukwetwa Zadoki kwija kuseesa amagita ha mutwe gwa Sulemani kwoleka ngu Sulemani nuwe akaba naija kufooka omukama. Hanyuma, Daudi akafa ahikize emyaka 70 ey’obukuru. Akalemera emyaka 40, baitu hati Sulemani nuwe akaba nagenda kuba omukama wa Isareri.