ABAFIRISITI bakaija omurundi ogundi okurwanisa Abaisareri. Bagenzi ba Daudi abasatu bakaba bali mwihe lya Saulo. Kiro kimu, Yese akagambira Daudi ati: ‘Twarra bagenzi bawe ekirengo ky’enkole n’emigaati, orole nkoku bali.’

Daudi obu yahikire omu rukande, yaimuka kugenda omu nkarra z’ihe kurora bagenzi be. Omufirisiti omu ow’amaani muno Goliasi akaija kugaya Abaisareri. Kinu akaba akikozire okumara emirundi 40 nyamisana n’ekiro. Akatokera haiguru ati: ‘Mukomemu omusaija omu turwane. Obu aransingura akanyita turaaba bairu banyu. Baitu kakuba ndamusingura nkamwita muraaba bairu baitu. Mbagambiire, mukome omuntu andwanise.’

Daudi akakaguza abasirikale ati: ‘Omusaija aliita Omufirisiti n’okucungura Isareri kuruga mukihemu alitunga ki?’

Bamugarukamu bati: ‘Saulo alimuha itungo lingi kandi n’okumuha muhara we okuba omukazi we.’

Baitu Abaisareri boona bakaba nibatiina muno Goliasi habwokuba akaba ali mukooto muno, kandi muraira muno. Akaba ali wa fuuti 9 n’okukiraho (rundi mita 3). Akaba aine n’omusirikale ayamukwatiraga engabu ye.

Abasirikale abamu bakagenda bagambira Saulo ngu Daudi nagonza kurwanisa Goliasi. Nukwo Saulo kugambira Daudi ati: ‘Tosobora kurwana n’Omufirisiti ogu. Okyali mwojo muto muno, baitu uwe abaire musirikale obwomezi bwe bwoona.’ Daudi akagarukamu ati: ‘Nkaita edubu n’entale ezaali zitwaire entaama za tata. Nonu Omufirisiti naija kuba nkazo. Yahwe naija kunkonyera.’ Nukwo Saulo kugamba ati: ‘Genda, Yahwe abe naiwe.’

Daudi akasirimuka ha mugera yakomayo amabale amarungi ataano, agekulingirire, yagata omunsahu ye. Aho akakwata omwesuso gwe, yagenda kwitirana engundu y’omusaija. Goliasi obu yamuboine, akaba atarukukiikiriza. Akaba natekereza ngu kikaba nikigenda kwanguha kwita Daudi.

Goliasi akagamba ati: ‘Ija nambere ndi nyaburaiwe, ndahayo omurambo gwawe hali empungu z’omu mwanya na hali ebisoro eby’omukisaka okulya.’ Baitu Daudi uwe akagamba ati: ‘Iwe oizire nambere ndi na busitama n’icumu n’empirima baitu nyowe ninyija nambere oli omw’ibara lya Yahwe. Kiro kya hati Yahwe arakuhayo omu mukono gwange nyowe ndakwita.’

Daudi akanguha kwirra haihi na Goliasi, akaihamu ibale munsahu ye, yalita omu mwesuso gwe yalihungura n’amaani ge goona. Ibale likatera Goliasi omubuso, yagwa hansi kandi yafa! Abafirisiti obu baboine emanzi yabu egwire hansi, boona bakahinduka nibataraaka. Abaisareri bakabahambya basingura obulemu.