HANYUMA ya Daudi okwita Goliasi, omukuru w’amahe ga Isareri Abuneri akamutwara hali Saulo. Saulo akasiima muno Daudi. Akamufoora omu ha bakuru abomu ihe lye. Kandi akamutwara kwikara omu kikali kye.

Hanyuma, amahe g’Abaisareri obu gagarukire kuruga kurwana n’Abafirisiti, abakazi bakaba nibazina ngu, ‘Saulo akaita enkumi, baitu Daudi aisire obukumi.’ Kinu kikaleetera Saulo ihali, habwokuba Daudi bakamuha ekitiinisa kingi okukira ekye. Baitu mutabani wa Saulo Yonasani akaba ataine ihali. Akaba nagonza muno Daudi, na Daudi nawe akaba namugonza muno. Nukwo banu babiri bakaragana okwikara bali banywani.

Daudi akaba ali muteezi murungi w’enanga, kandi Saulo akaba nagonza muno ebizina ebya Daudi yaterega. Baitu ekiro kimu, ihali likaletera Saulo kukora ekintu ekibi muno. Daudi obwakaba nateera enanga, Saulo akakwata icumu yalimunagira naagamba ati: ‘Ninyija kucumitira Daudi ha kisiika!’ Baitu litamucumite. Nahati Saulo alemwa kwita Daudi omurundi ogwakabiri, nubwo Daudi yamanyire ati aine kwerinda muno.

Noijuka eki Saulo yanihiize? Akaraganiza ngu ogu weena ayakwisire Goliasi akaba naija kumuha muhara we kuba mukazi we. Hamperu Saulo akagambira Daudi ati nasobora kutunga Mikali nka mukazi we, baitu ngu akaba aine kubanza kwita Abafirisiti 100 abanyanzigwa. Kitekerezeeho! Saulo akaba nanihira ngu Abafirisiti nibaija kwita Daudi. Kyonka batasobole, nukwo Saulo kuha Daudi muhara we kuba mukazi we.

Kiro kimu, Saulo akagambira Yonasani n’abairu be ngu nagenda kwita Daudi. Baitu Yonasani akagambira ise ati: ‘Otakora kubi Daudi, uwe takakukoraga kibi kyona. Byona ebi akozire bibaire nibikugasa. Akateeka obwomezi bwe omu kabi yaita Goliasi, kandi obu yakikozire okasemererwa.’

Saulo akahuliriza mutabani we n’okuraganiza ngu tarukwija kurumya Daudi. Daudi akaletwa omunju ya Saulo okuhereza nk’oku akaba nakora kara. Baitu kiro kimu, Daudi obu akaba nateera enanga, Saulo nabwo akagonza kumucumita n’icumu. Nalinu Daudi akalyehugura lyacumita ekisiika. Gunu gukaba guli murundi gwakasatu. Daudi hati akamanya ati aine kwiruka!

Ekiro ekyo Daudi akagenda omunju ye. Baitu Saulo akatuma basaija okumwita. Mikali akaba namanya entegeka zoona eza ise. Nukwo kugambira Daudi ati: ‘Obwotaruge hanu, ekiro kinu, nyenkya noija kuba oli mufu.’ Mubwire bwekiro ekyo, Mikali akakonyera Daudi kwiruka kuraba omu idirisa. Okumara emyaka musanju, Daudi akaba aine kwesereka mubicweka ebyembaganiza nukwo Saulo aleme kumuzoora.