DORA omusaija ogu omu maizi. Ali mukabi k’amaani muno, tinukwo? Encu eri haihi kumumira! Nomanya omusaija ogu noha? Ibara lye nuwe Yona. Katurole akabi kanu koona nambere karugiriire.

Yona akaba ali murangi wa Yahwe. Hakaba hatakahingwireho akasumi kaingi hanyuma y’okufa kw’omurangi Erisa obu Yahwe yagambira Yona ati: ‘Genda murubuga orukooto orwa Nineve. Ninyenda ogende obagambire h’abubi bwabu bwingi muno.’

Baitu Yona akaba atarukugonza kugendayo. Nukwo kukwata eryato akagenda mukiikaro ekindi ekitali Nineve. Kinu kitasemeze Yahwe habwa Yona okwiruka. Nukwo Yahwe kuleeta ihunga ly’amaani. Likaba libi muno n’eryato rikaba liri haihi kudikira omu maizi. Abalimba bakatiina muno, kandi batandika kukungira baruhanga babu okubakonyera.

Hampero, Yona abagambira ati: ‘Nindamya Yahwe, Ruhanga ayahangire iguru n’ensi. Kandi nuwe ndukwiruka ndeke kukora ebi angambiire kukora.’ Nukwo abalimba kumukaguza bati: ‘Hali tukukoleki nukwo enyanja esobole kuculera?’

‘Muunage omunyanja obwo neija kuculera,’ nukwo Yona abagambira. Kyonka abalimba batagonze kukikora. Enyanja obu yeyongire kuba mbi muno nubwo hampero banagire Yona omu nyanja. Ahonaho omuyaga n’enyanja biculeera.

Obu Yona yabaire nagenda hansi omu maizi,encu enkooto muno ekamumira. Baitu atafe. Akamara omunda y’encu ebiro bisatu nyamisana n’ekiro. Yona akeyijukya habwaki atarahuliire Yahwe okugenda Nineve. Nomanya ekiyakozere?

Yona akasaba Yahwe obukonyezi. Yahwe nukwo kuletera encu okumutanaka ha musa gw’enyanja. Hanyuma, Yona akagenda Nineve. Kinu tikirukutwegesa omugaso gw’okworobera byona Yahwe ebyatugamba?