NOSOBORA kurora enyunyuzi erukwaka muno, ei omu h’abasaija banu nambere arukwoleka orukumu? Obu barugire Yerusalemu, enyunyuzi ekeyoleka. Abasaija banu nibaruga Buruga-izooba, kandi nibo betegereza eby’enyunyuzi. Nibaikiriza ngu enyunyuzi enu empyaka nebebembera kubahikya ha muntu ow’ekitiinisa.

Abasaija obu bahikire Yerusalemu, bakakaguza bati: ‘Omwana orukwija kuba omukama w’Abayudaya ali nkaha?’ “Abayudaya” ibara rindi ery’Abaisareri. Abasaija bagamba: ‘Tukabanza kurora enyunyuzi y’omwana obu tukaba tuli Buruga-izooba, kandi twizire kumuramya.’

Herode nuwe akaba ali omukama mu Yerusalemu, obu yahulire kinu, akeralikirra. Akaba atarukugonza omukama ondi kutwara omwanya gwe. Herode nikyo yayetiire banyakatagara abakuru kandi akabakaguza ati: ‘Omukama ayanihiziibwe naija kuzaalirwa nkaha?’ Bamugarukamu bati: ‘Baibuli n’egamba mu Beterehemu.’

Herode nukwo kweta abasaija abaarugire Buruga-izoba kandi akabagamba ati: ‘Mugende muserre omwana ogu omuto. Obu muramuzoora, muumanyise. Ninyenda kugenda kumuramya.’ Baitu mananu, Herode akaba nayenda kuzoora omwana nukwo amwite!

Enyunyuzi yayebembera abasaija kubatwara Beterehemu kandi yayemerra mu mwanya omwana nambere aka ali. Abasaija obu bataahire omunju, basanga Malyamu n’omwana Yesu. Basumurra ebisembo n’okubiha Yesu. Hanyuma, Yahwe abarabura mukirooto butagaruka owa Herode. Nahabwekyo bagaruka mu nsi y’owabu nibaraba mumuhanda ogundi.

Herode obu yakimanyire nti abasaija abarugire Buruga-izooba bagarukire owabubo, akabihirwa muno. Akaragira nti abaana b’obwojo mu Beterehemu ab’emyaka ebiri na hansi baitwe. Baitu Yahwe yarabura Yusufu omu kirooto bukyali, kandi Yusufu n’ab’omuka ye bagenda Misiri. Hanyuma, Yusufu obu yakimanyire nti Herode akaba afiire, atwara Malyamu na Yesu Nazalesi. Kunu nuho Yesu yakuliire.

Iwe notekereza noha ayaretiire enyunyuzi egi empyaka okwaka? Ijuka, abasaija bakabanza kugenda Yerusalemu obu bamazire kurora enyunyuzi. Setani Diabolo akaba nagonza kwita Omwana wa Ruhanga, kandi akaba nakimanya ngu Herode omukama wa Yerusalemu yakulengereho kumwita. Kale mali Setani nuwe aine kuba yaletiire enyunyuzi egi okwaka.