DORA ekintu ekibi muno ekiroho! Yesu naitwa. Bamuhanikire ha muti. Emisumali etiirwe mu mikono ye n’omubigere bye. Habwaki omuntu weena yakukozere Yesu ekintu nka kinu?

Nahabwokuba abantu abamu banobere Yesu. Omanyire nibo baha? Omu halibo ni maraika omubi Setani Diabolo. Nuwe yaletiire Adamu na Hawa kujemera Yahwe. Kandi na Setani nuwe yaletiire abanyanzigwa ba Yesu kukora ekikorwa kinu ekibi muno.

Na Yesu obwakaba atakahanikirwe ha muti hanu, abanyanzigwa be bakamukora ebintu ebindi ebirukusaaliza. Noijuka nkoku baizire murugonjo Gesesamane kandi bakamutwara? Abanyanzigwa abo bakaba bali baaha? Mali bakaba bali abakuru b’ediini. Kale katurole ebyakurasireho.

Yesu obu yatwairwe abakuru b’ediini, abakwenda be bakamwirukaho. Bakaleka Yesu ali wenka n’abanyanzigwa be, habwokuba bakatiina. Baitu abakwenda Petero na Yohana bo batagende hara. Bakahondera kurora kiki ekirahika hali Yesu.

Abanyakatagara bakatwara Yesu hali omugurusi Ana, ayabaireho nyakatagara omukuru. Ekitebe ky’abantu kitaikale muno hanu. Hanyuma batwara Yesu munju ya Kayafa, hati ali nyakatagara omukuru. Abakuru b’ediini baingi bateraniire munju ye.

Hanu munju ya Kayafa batekaho orukurato rw’okumujunana. Abantu abokubihirra Yesu baletebwa. Abakuru b’ediini boona bagamba bati: ‘Yesu esemerire kwitwa.’ Nubwo bamucwera ebicwanta mu maiso, kandi bamuteera n’entomi.

Binu byona obubikaba nibigenda mu maiso, Petero akaba ali aheru omuzigati. Kiro ky’obutiti, kandi nikyo abantu bahembeire omu’ro. Obu bakaba niboota omu’ro, omuzaana arora Petero kandi agamba ati: ‘Onu omusaija nawe abaire na Yesu.’

‘Nangwa, timbaire nawe!’ Petero ayehakana.

Emirundi esatu abantu bagamba ngu Petero akaba ali hamu na Yesu. Baitu buli murundi, Petero ayehakana. Omurundi gw’akasatu Petero obu yagambire kinu, Yesu ahinduka kandi amurora. Petero akwatwa ensoni habw’okugamba ebisuba binu, kandi arugaho arra.

Izooba obu lyaturukire ha Kyakatano nyenka kara, banyakatagara batwara Yesu mu mukisiika kyabu eky’okuteraniramu. Hanu babazaho ekibaragenda kumukora. Bamutwara owa Pontio Pilato omulemi w’ekicweka kya Buyudaya.

‘Onu musaija mubi. Asemerire kwitwa.’ Abanyakatagara baba nukwo bagambira Pilato. Hanyuma y’okukaguza Yesu ebikaguzo, Pilato agamba ati: ‘Tinkurora kibi kyona ekyakozere.’ Hanyuma Pilato atuma batwale Yesu owa Herode Antipa. Herode nuwe mulemi wa Galiraya, baitu naikara Yerusalemu. Nawe Herode tarukurora ekintu kyona eki Yesu asobeze, nahabwekyo, atuma bamugarrayo owa Pilato.

Pilato nayenda kusumurra Yesu. Baitu abanyanzigwa ba Yesu nibagonza omunyankomo ondi nuwe asumururwe mukiikaro kye. Omusaija onu nuwe Baraba omunyagi. Hati ziri haihi saaha mukaaga eza nyamusana Pilato bwaleta Yesu aheru. Agambira abantu ati: ‘Dora! Omukama Wanyu!’ Baitu banyakatagara n’abakuru batokera haiguru: ‘Mwiheho! Mwite! Mwite!’ Nukwo Pilato asumurra Baraba, kandi batwara Yesu aitibwe.

Karaho Kyakatano mwihangwe Yesu ahanikibwa ha muti. Tosobora kubarora mukisisani, baitu buli rubaju rwa Yesu haroho omunyabibi ahanikirwe ha muti. Akasumi kake atakafiire, omu hali banu amugambira: ‘Onyijuke obwolitaaha mu bukama bwawe.’ Kandi Yesu amugarukamu ati: ‘Ninkunihiza ngu oliba nanyowe mu Rugonjo.’

Oku tikuli kunihiza kurungi? N’omanya orugonjo Yesu arwarukugambaho? Orugonjo Ruhanga oru yakozire mukutandika rukaba ruri nkaha? Mali omu nsi. Kandi obu aliba nalema nk’omukama w’omwiguru, alihumbuura omusaija onu asemerererwe omu rugonjo omu nsi. Naitwe titusemeriire kusemererwa habwekyo?