OMWISIKI onu ow’orukurora hanu aine emyaka 12. Yesu akwasire omukono gwe, kandi nyina na ise bemeriire haihi. Nomanya habwaki nibazooka basemeriirwe muno? Katukizoole.

Ise omwisiki musaija w’ekitiinisa arukwetwa Yairo. Kiro kimu, omuhara we akarwara, kandi bamubyamya. Baitu tiyasobora kuba kurungi. Akaikara nasereba. Yairo n’omukyara we bakeralikirra muno habw’okuba omwisiki wabo omuto nagenda kufa. Nuwe mwana wabo ow’obuhara ou baine. Yairo nukwo kugenda kuseerra Yesu. Akaba amanyisibwe ha by’amahano Yesu eby’arukukora.

Yairo obu yazoire Yesu, yasanga ekitebe ky’abantu kigomere kimwehingulirize. Baitu Yairo abarabamu kandi agwa ha bigere bya Yesu. Agamba: ‘Omwana wange murwaire muno. Nkwesengerize ija omukize.’ Yesu agamba ngu naija kwija.

Obu baba nibarubatira hamu, ekitebe ky’abantu basindikangana kumwirra haihi. Ahonaho, Yesu ayemerra. Akaguza: ‘Noha ankwasireho?’ Yesu akahurra amaani nigamurugamu, nukwo akimanya ngu haroho amukwasireho. Baitu noha? N’omukazi ataaha arwaire kumara emyaka 12. Nuwe yaizire hali Yesu kandi yakwata ha ngoye ze, kandi yakizibwa!

Kinu kihumuza Yairo habw’okuba arozere nkoku kyanguhire Yesu okukiza omuntu. Baitu omuntu omutumwa aija. Agambira Yairo ati: ‘Oteyongera kutalibaniza Yesu; omwana wawe afiire.’ Yesu ahurra ebigambo binu kandi agambira Yairo ati: ‘Otatiina, naija kuba kurungi.’

Hanyuma obu bamara kuhika ha nju ya Yairo, abantu baba nibarra n’okusalirwa kwingi. Baitu Yesu abagamba: ‘Muleke kurra. Omwana tafiire, abyamire bubyama.’ Baitu baseka, kandi basekereza Yesu, habw’okuba bamanyire ngu afiire.

Aho Yesu atwara ise na nyina w’omwisiki n’abasatu h’abakwenda be mukisiika nambere omwisiki abyamire. Akwata omukono gwe kandi agamba: ‘Imuka!’ Omwisiki agaruka kuba mwomezi, nkoku orukurora hanu. Kandi ayimuka atandika n’okurubatarubata! Niyo nsonga habwaki nyina na ise basemeriirwe muno.

Onu talinuwe omuntu ow’okubanza Yesu kuhumbuura omu bafu. Ow’okubanza Baibuli ow’egambaho nuwe omutabani w’omufakati ayaikaraga mu rubuga rwa Naini. Hanyuma, Yesu ahumbuura Lazaro, munyanya wa Malyamu na Maliza. Yesu obu alirema nk’omukama ateirweho Ruhanga, naija kuhumbuura abantu baingi. Tikituhikiriire kusemererwa habw’ekyo?